- 1
- Na, ka korero mai a Ihowa ki a Mohi, ka mea,
- 2
- Korerotia atu ki nga tamariki a Iharaira, kia tahuri kia noho ki te ritenga atu o Pihahirota, i te takiwa o Mikitoro o te moana, ki te ritenga atu o Paara-hepona: hei te wahi e hangai tonu atu ana ki reira, hei te taha o te moana koutou noho ai.
- 3
- A e kiia nga tamariki a Iharaira e Parao, E pohehe ana ratou i te whenua, kua tutakina mai ratou e te koraha.
- 4
- A maku e whakapakeke te ngakau o Parao, kia whai ai ia i a ratou: a ka whai kororia ahau i a Parao, ratou ko tona nuinga katoa; a ka mohio nga Ihipiana ko Ihowa ahau; a peratia ana e ratou.
- 5
- A ka korerotia atu ki te kingi o Ihipa, kua whati te iwi: katahi ka puta ke te ngakau o Parao, ratou ko ona tangata, ki te iwi, a ka mea ratou, Na te aha tenei mahi a tatou, i tukua ai a Iharaira kia haere atu i a tatou mahi?
- 6
- Na, ka here ia i tana hariata, i tangohia ano hoki e ia tona iwi:
- 7
- A takiritia ake e ia e ono rau hariata, whiriwhiri rawa, me nga hariata katoa o Ihipa, rite katoa i te rangatira.
- 8
- Heoi, whakapakeke ana a Ihowa i te ngakau o Parao o te kingi o Ihipa, te tino whainga atu i muri i nga tamariki a Iharaira: tena ko nga tamariki a Iharaira, kei runga tonu te ringaringa i haere atu ai ratou.
- 9
- Na, whai ana nga Ihipiana i a ratou, nga hoiho katoa, nga hariata a Parao, me ana hoia eke hoiho, me ana mano, a mau rawa atu ratou, i a ratou e noho ana i te tahatai i Pihahirota, e titiro atu ano ki Paara-hepona.
- 10
- A te whakatatanga atu a Parao, na ka anga ake nga kanohi o nga tamariki a Iharaira, na, ko nga Ihipiana e whai mai ana i muri i a ratou; a tino wehi ana ratou: na, ka karanga atu nga tamariki a Iharaira ki a Ihowa.
- 11
- A ka mea ratou ki a Mohi, He onge koia no te urupa o Ihipa i kahaki mai ai koe i a matou ki te koraha mate ai? He aha ra tenei mahi au ki a matou, i arahina mai nei matou e koe i Ihipa?
- 12
- Ehara koia tenei i ta matou kupu i ki atu ra ki a koe i Ihipa, i mea ra, Waiho ra matou kia whakamahia ana e nga Ihipiana? ta te mea, engari kia whakamahia matou e nga Ihipiana, kei mate matou ki te koraha.
- 13
- Na, ko te meatanga mai a Mohi ki te iwi, Kaua ra koutou e wehi; tu marie, ka titiro atu ki te whakaoranga a Ihowa e whakaputaina mai e ia ki a koutou i tenei ra: na, nga Ihipiana e kitea atu ra e koutou i tenei ra, e kore e kitea ano e koutou a muri atu nei.
- 14
- Ma Ihowa ta koutou pakanga; ko koutou ia e kore e hamumu.
- 15
- Na, ko te meatanga atu a Ihowa ki a Mohi, He aha koe i karanga ai ki a au? korerotia atu ki nga tamariki a Iharaira kia haere atu:
- 16
- Otiia hapainga e koe to tokotoko, ka whakamaro atu ai i tou ringaringa ki runga ake i te moana, kia wehea ai; na ka haere atu nga tamariki a Iharaira ma waenga moana, i te wahi maroke.
- 17
- A ko au, ina, maku e whakapakeke nga ngakau o nga Ihipiana, a ka whai ratou i muri i a ratou: a ka whai kororia ahau i a Parao, me ana mano, me ana hariata, me ana hoia eke hoiho.
- 18
- A ka mohio nga Ihipiana ko Ihowa ahau, ina whai kororia ahau i a Parao, i ana hariata, me ana hoia eke hoiho.
- 19
- Na, ka whakatika atu te anahera a te Atua, i haere ra i mua i te ope o Iharaira, a haere mai ana ki muri i a ratou; ko te pou kapua hoki i neke atu i to ratou aroaro, a tu rawa mai i muri i a ratou:
- 20
- I haere mai hoki ki waenganui o te nohoanga o nga Ihipiana, o te nohoanga hoki o Iharaira; hei kapua hei pouri ki era, hei whakamārama ia i te po mo enei: a kihai ratou i whakatata atu tetahi ki tetahi a pau katoa te po.
- 21
- Na, torona atu ana e Mohi tona ringaringa ki runga ake o te moana; a panā ana e Ihowa te moana ki tetahi hau nui, ki te marangai, i te roanga o taua po, a whakamaroketia ana te moana, na tuwhera pu ana nga wai.
- 22
- A haere ana nga tamariki a Iharaira ki waenganui o te moana ra te wahi maroke: a hei taiepa nga wai ki a ratou i te taha ki matau, ki maui.
- 23
- Na, ka whai atu nga Ihipiana, a haere ana i muri i a ratou, nga hoiho katoa a Parao, ana hariata, me ana hoia eke hoiho, ki waenganui o te moana.
- 24
- A i to te ata whakaaraara, na, ka titiro atu a Ihowa ki te ope o nga Ihipiana, i roto i te pou ahi raua ko te kapua, ka whakararu hoki i te ope o nga Ihipiana,
- 25
- A whakamareretia ana e ia nga wira o nga hariata, kia puhoi ai te haere: a ka mea nga Ihipiana, Kia oma atu tatou i te aroaro o Iharaira: kei roto hoki i a ratou a Ihowa e whawhai mai ana ki nga Ihipiana.
- 26
- Na, ka mea a Ihowa ki a Mohi, Whakamarokia atu tou ringa ki runga i te moana, kia hoki mai ai nga wai ki runga ki nga Ihipiana, ki a ratou hariata, me a ratou hoia eke hoiho.
- 27
- A te whakamarokanga atu o te ringaringa o Mohi ki runga i te moana, na, takiri rawa ake te ata, kua hoki mai te moana ki tona tūturutanga; tutataki pu ki nga Ihipiana e rere ana; a taia iho nga Ihipiana e Ihowa ki waenga moana.
- 28
- A hoki mai ana nga wai, taupokina iho nga hariata, me nga hoia eke hoiho, me te ope katoa o Parao, i haere i muri i a ratou ki te moana: kihai tetahi o ratou i toe.
- 29
- Tena ko nga tamariki a Iharaira, i haere ratou ra te wahi maroke i waenganui o te moana; ko nga wai hoki hei taiepa ki a ratou, ki te taha matau, ki te taha maui.
- 30
- A whakaorangia ana e Ihowa a Iharaira i taua ra i nga ringa o nga Ihipiana; a ka kite a Iharaira i nga Ihipiana i te tahatai, he tupapaku katoa.
- 31
- A i kite a Iharaira i te ringaringa nui i whakaputaina mai e Ihowa ki nga Ihipiana: a ka wehi te iwi i a Ihowa, a whakapono ana ki a Ihowa, ki tana pononga hoki ki a Mohi.
Address: 
Phone: 
Email: