- 1
- Na, ka haere tetahi tangata o te whare o Riwai, a ka tango i tetahi tamahine a Riwai.
- 2
- A ka hapu te wahine, ka whanau he tane: a ka kitea ia he tamaiti pai, na e toru nga marama i hunā ai ia e ia.
- 3
- A tē ahei ia te huna tonu i a ia, na ka tango ia i tetahi aaka kakaho mona, pani rawa ki te uku ki te ware, a whaowhina ana te tamaiti ki roto; a whakatakotoria iho ki roto ki nga wiwi, i te pareparenga o te awa.
- 4
- A tu mai ana i tawhiti tona tuahine, kia kite e ahatia ranei ia.
- 5
- Na, ko te haerenga iho o te tamahine a Parao ki te awa, ki te horoi; ko ana kotiro hoki e haere ana i te taha o te awa; a ka kite ia i te aaka i roto i nga wiwi, na ka ngare atu i tana kotiro ki te tiki.
- 6
- A tana hurahanga ake, ka kite i te tamaiti; na, ka tangi te tamaiti. A ka aroha ia ki a ia, ka mea, No nga tamariki a nga Hiperu tenei.
- 7
- Katahi ka mea tona tuahine ki te tamahine a Parao, Kia haere au ki te karanga i tetahi o nga wahine a nga Hiperu hei whakangote? a ko ia hei kai whakangote mau i te tamaiti nei.
- 8
- A ka ki mai te tamahine a Parao ki a ia, Haere: a haere ana te kotiro, a karanga ana i te whaea o te tamaiti.
- 9
- A ka mea atu te tamahine a Parao ki a ia, Tangohia te tamaiti nei, whakangotea hei tamaiti maku, a maku e hoatu he utu ki a koe. Na, tango ana te wahine i te tamaiti, a whakangotea ana e ia.
- 10
- A ka nui te tamaiti, na, ka kawea e ia ki te tamahine a Parao, a ka waiho ia hei tamaiti mana. A huaina iho e ia tona ingoa ko Mohi: i mea hoki, No te mea i toia ake ia i roto i te wai.
- 11
- A i aua ra, ka kaumatuatia a Mohi, na ka haere atu ki ona tuakana, ka titiro hoki ki a ratou kawenga: a ka kite ia i tetahi o nga Ihipiana e patu ana i tetahi o nga Hiperu, no ona tuakana.
- 12
- Na, ka tirotiro ia ki tenei wahi ki tera wahi, a ka kite kahore he tangata, patua iho e ia te Ihipiana, a hunā iho e ia ki te onepu.
- 13
- A ka haere atu ia i te rua o nga ra, na, tokorua nga tangata o nga Hiperu e whawhai ana ki a raua: a ka mea atu ia ki te tangata nana te kino, He aha koe i patu ai i tou hoa?
- 14
- Na, ko te meatanga mai a tera, Na wai koe i ki hei rangatira, hei kai whakarite whakawa mo matou? E mea ana koe ki te patu i a au me koe i patu ra i te Ihipiana? A ka wehi a Mohi, ka mea, Koia hoki, kua rangona tenei mea.
- 15
- A ka rongo a Parao i taua mea, na, ka rapu ia kia patua a Mohi. Otiia i rere a Mohi i te aroaro o Parao, a noho ana i te whenua o Miriana: a ka noho ia ki te taha o tetahi puna.
- 16
- Na, tokowhitu nga tamahine a te tohunga o Miriana: a ka haere mai ratou, ka utuutu wai, ka whakaki i nga kumete, hei whakainu i nga hipi a to ratou papa.
- 17
- A te haerenga mai o nga hepara, kei te atiati i a ratou: a ka whakatika a Mohi ka araarai i a ratou, ka whakainu hoki i a ratou hipi.
- 18
- A ka tae atu ratou ki a Reuere ki to ratou papa, ka mea mai ia, Na te aha koutou i hohoro mai ai inaianei?
- 19
- A ka mea ratou, Na tetahi tangata o nga Ihipiana i ora ai matou i te ringaringa o nga hepara, nana ano i utuutu he wai ma matou, i whakainu hoki nga hipi.
- 20
- Na ka mea ia ki ana tamahine, A kei hea ia? He aha i waiho atu ai e koutou tena tangata? karangatia atu ki te kai taro.
- 21
- A i pai a Mohi ki te noho ki taua tangata; a ka hoatu e ia a Hipora tana tamahine ki a Mohi.
- 22
- A ka whanau ia he tane, a huaina iho e ia tona ingoa ko Kerehoma. I mea hoki ia, He manene ahau i te whenua ke.
- 23
- Na, i muri iho i nga ra e maha, na ka mate te kingi o Ihipa; a ka hotu te manawa o nga tamariki a Iharaira i te whakamahinga, a aue ana ratou; a ka puta ake to ratou aue ki te Atua, no ratou hoki e whakamahia ana.
- 24
- A ka rongo te Atua ki to ratou tangi, a ka mahara te Atua ki tana kawenata ki a Aperahama, ki a Ihaka, ki a Hakopa.
- 25
- A ka titiro iho te Atua ki nga tamariki a Iharaira, a ka mohio te Atua ki a ratou.
Address: 
Phone: 
Email: