- 1
- Na, ka korerotia atu e te Atua enei kupu katoa, ka mea,
- 2
- Ko Ihowa ahau ko tou Atua, naku koe i whakaputa mai i te whenua o Ihipa, i te whare pononga.
- 3
- Aua etahi atua ke atu mou ki mua atu i a au.
- 4
- Kei hanga koe i te whakapakoko mou, i tetahi ritenga ranei o nga mea o te rangi i runga, o te whenua ranei i raro, o te wai ranei i raro i te whenua:
- 5
- Kei koropiko koe ki ena mea, kei mahi ranei ki ena mea; ko Ihowa hoki ahau ko tou Atua, he Atua hae e mea ana i nga hara o nga mātua kia tau iho ki nga tamariki, a, te toru, te wha ra ano o nga whakatupuranga o te hunga e kino ana ki a au;
- 6
- E whakaputa aroha ana hoki ki nga mano, ki te hunga e aroha ana ki a au, a e whakarite ana i aku ture.
- 7
- Kei whakahuatia noatia e koe te ingoa o Ihowa o tou Atua; e kore hoki a Ihowa e mea, he hara-kore te tangata e whakahua noa ana i tona ingoa.
- 8
- Kia mahara ki te ra hapati, kia whakatapua.
- 9
- E ono nga ra e mahi ai koe, e mea ai hoki i au mea katoa;
- 10
- Tena ko te ra whitu, he hapati no Ihowa, no tou Atua: kaua e mahia tetahi mahi i reira e koe, e to tamaiti, e to tamahine, e to pononga tane, e to pononga wahine, e o kararehe hoki, me to tangata ke i roto i ou tatau;
- 11
- E ono hoki nga ra i hangā ai e Ihowa te rangi, me te whenua, te moana, me nga mea katoa i roto, a okioki ana te ra whitu: no reira i whakapaingia ai te ra hapati e Ihowa, a whakatapua ana.
- 12
- Whakahonoretia e koe tou papa me tou whaea; kia roa ai ou ra ki te whenua e homai nei e Ihowa e tou Atua ki a koe.
- 13
- Kaua e patu.
- 14
- Kaua e puremu.
- 15
- Kaua e tahae.
- 16
- Kaua e whakapae teka ki tou hoa.
- 17
- Kaua e hiahia ki te whare o tou hoa, kaua e hiahia ki te wahine a tou hoa, ki tana pononga tane ranei, ki tana pononga wahine ranei ki tana kau ranei, ki tana kaihe ranei, ki tetahi mea ranei a tou hoa.
- 18
- A i kite te iwi katoa i nga whatitiri, me nga uira, me te tangi o te tetere, me te maunga hoki e paowa ana: a, te kitenga o te iwi, na, ka neke atu ratou, a, tu rawa mai i tawhiti.
- 19
- A ka mea ratou ki a Mohi, Mau e korero mai ki a matou, a ka whakarongo atu matou; a kaua te Atua e korero ki a matou, kei mate matou.
- 20
- Na, ka mea a Mohi ki te iwi, Kaua koutou e wehi: he whakamatau hoki i a koutou i haere mai ai te Atua, kia mau ai hoki tona wehi ki o koutou kanohi, kei hara koutou.
- 21
- A tu mai ana te iwi i tawhiti; ko Mohi ia, i whakatata atu ki te pouri i noho ai te Atua.
- 22
- A ka mea mai a Ihowa ki a Mohi, Kia penei tau kupu ki nga tamariki a Iharaira, Ka kite koutou kua korero iho ahau i runga i te rangi ki a koutou.
- 23
- Kei hangā, hei atua ngatahi me au, he mea hiriwa, kei hangā ano hoki he atua koura mo koutou.
- 24
- Hangā e koe he aata oneone maku, a ki runga patu ai koe i o tahunga tinana, me au whakamarietanga, i o hipi, me o kau: ka haere mai ahau ka manaaki i a koe, ki nga wahi katoa e whakamaharatia ai e ahau toku ingoa.
- 25
- A ki te hangā koe i te aata kohatu maku, kei hanga e koe ki te kohatu hahau; ta te mea, ki te hapai koe i to toki ki runga i taua mea, kua whakanoatia e koe.
- 26
- Kaua ano hoki e piki na te arawhata ki toku aata, kei kitea i runga tetahi wahi ou e takoto kau ana.
Address: 
Phone: 
Email: