- 1
- Na, ka korero mai a Ihowa ki a Mohi, ka mea,
- 2
- Korero atu ki nga tamariki a Iharaira, kia maua mai e ratou he whakahere maku: me tango e koutou te whakahere maku i nga tangata katoa e hihiko noa mai ana o ratou ngakau.
- 3
- A ko te whakahere tenei e tangohia e koutou i a ratou; he koura, he hiriwa, he parahi,
- 4
- Me te kakahu puuru, me te papura, me te ngangana, me te rinena pai, me te huruhuru koati,
- 5
- Me nga hiako hipi kua oti te whakawhero, me nga hiako pateri, me etahi rakau—he hitimi;
- 6
- Te hinu mo te whakamārama, nga mea kakara mo te hinu whakawahi, mo te whakakakara reka hoki,
- 7
- Nga kohatu onika, me nga kohatu hei whakanoho ki te epora, ki te kouma.
- 8
- A kia hangā e ratou he wahi tapu moku; kia noho ai ahau i waenganui i a ratou.
- 9
- Kia rite a koutou e hangā ai ki nga mea katoa e whakakitea atu nei e ahau ki a koe, ki te tauira o te tapenakara, ki te tauira hoki o ona mea katoa.
- 10
- Me hanga ano hoki e ratou he aaka, ki te hitimi he rakau: kia rua nga whatianga me te hawhe tona roa, kia kotahi whatianga me te hawhe tona whanui, a kia kotahi whatianga me te hawhe tona teitei.
- 11
- A me whakakikorua e koe ki te koura para-kore; me whakakikorua e koe taua mea a roto, a waho, me hanga ano hoki e koe he niao koura, a tawhio noa.
- 12
- Kia wha ano hoki nga mowhiti koura e whakarewaia e koe mo taua mea, ka whakanoho ai ki nga poti e wha; kia rua ano hoki mowhiti ki tetahi taha ona, kia rua hoki mowhiti ki tetahi taha ona.
- 13
- Me hanga ano e koe etahi rakau amo, ki te hitimi te rakau, ka whakakikorua hoki ki te koura.
- 14
- Ka kuhu ai i nga rakau amo ki roto ki nga mowhiti i nga taha o te aaka, kia ai aua mea hei maunga mo te aaka.
- 15
- Hei roto tonu nga amo i nga mowhiti o te aaka; kaua e unuhia mai ki waho.
- 16
- A me hoatu e koe ki roto ki te aaka te whakaaturanga e hoatu e ahau ki a koe.
- 17
- Me hanga ano e koe te taupoki whakamarietanga ki te koura para-kore: kia rua nga whatianga me te hawhe tona roa, kia kotahi hoki whatianga me te hawhe tona whanui.
- 18
- Me hanga ano hoki e koe etahi kerupima koura, kia rua, kia kotahi tonu aua mea ina hangā e koe, a puta noa, mo nga pito e rua o te taupoki whakamarietanga.
- 19
- Me hanga hoki tetahi kerupi ki tetahi pito, me tetahi kerupi ki tetahi pito: kia kotahi ano te mea e hangā ai nga kerupima me te taupoki whakamarietanga; ki nga pito e rua ano hoki o taua mea.
- 20
- A ka roha whakarunga nga parirau o nga kerupima, me te uhi ano i te taupoki whakamarietanga ki o raua parirau, a ka anga o raua mata ki a raua; ka anga ki te taupoki whakamarietanga nga mata o nga kerupima.
- 21
- A me whakanoho e koe te taupoki whakamarietanga ki runga ki te aaka; me hoatu ano hoki ki roto ki te aaka te whakaaturanga e hoatu e ahau ki a koe.
- 22
- A ka tutaki ahau ki a koe ki reira, ka korerotia atu ano hoki e ahau ki a koe i runga i te taupoki whakamarietanga i waenganui i nga kerupima e rua, i era i runga i te aaka o te whakaaturanga, nga mea katoa e whakahau ahau ki a koe kia korerotia ki nga tamariki a Iharaira.
- 23
- Me hanga ano hoki e koe tetahi tepara, ki te hitimi he rakau: kia rua nga whatianga tona roa, kia kotahi ano hoki whatianga tona whanui, kia kotahi whatianga hoki me te hawhe tona teitei.
- 24
- Me whakakikorua ano hoki e koe taua mea ki te koura para-kore, ka hanga ai i tetahi niao koura mona, a tawhio noa.
- 25
- Me hanga ano hoki he awhi mo taua mea, hei te whanuitanga ringaringa te nui, a tawhio noa; me hanga ano e koe he niao koura mo tona awhi, a tawhio noa.
- 26
- Me hanga ano e koe etahi mowhiti koura, kia wha, mo taua mea, ka whakanoho ai i nga mowhiti ki nga poti e wha ki ona waewae e wha.
- 27
- Hei te ritenga ake o te awhi nga mowhiti, hei kuhunga mo nga amo hei maunga mo te tepara.
- 28
- Ko te hitimi ano hoki te rakau e hangā ai e koe nga amo; me whakakikorua ano hoki ki te koura; a ka ai aua mea hei maunga mo te tepara.
- 29
- Me hanga ano e koe ona rihi, ona koko, ona kapa, me nga peihana mo nga ringihanga: me hanga e koe aua mea ki te koura para-kore.
- 30
- Me whakatakoto tonu ano hoki e koe te taro aroaro ki runga ki te tepara, ki toku aroaro.
- 31
- Me hanga ano e koe te turanga-rama ki te koura para-kore: kia kotahi tonu te turanga-rama ina hangā, a puta noa: me pera ano tona take, me ona peka, ona kapa, ona puku, me ona puawai.
- 32
- A kia ono nga peka e puta ake i ona taha; e toru nga peka o te turanga-rama i tetahi taha, e toru hoki nga peka o te turanga-rama i tetahi taha:
- 33
- Kia toru nga kapa, he mea rite ki te aramona, me te puku me te puawai ki te peka kotahi; me nga kapa e toru, he mea rite ki te aramona ki tetahi atu peka, me te puku me te puawai: me pera tonu i nga peka e ono e puta ake ana i te turanga-rama.
- 34
- Kia wha ia nga kapa o te turanga-rama, kia rite ki te aramona, me te puku me te puawai, o tetahi o tetahi.
- 35
- A e rua ona peka, kia kotahi puku o raro ake; e rua ona peka, kia kotahi ano hoki puku o raro ake; e rua ona peka, kia kotahi ano hoki puku o raro ake; me whakarite ki nga peka e ono e puta mai ana i te turanga-rama.
- 36
- Kia kotahi ano te koura o nga puku o nga peka me koura para-kore katoa; kia kotahi tonu ano hoki, a puta noa.
- 37
- Me hanga ano hoki e koe ona rama e whitu: a me tahu ona rama e ratou, hei whakamārama atu i te tikanga atu o taua mea.
- 38
- Me koura para-kore ano hoki ona kuku me ona takotoranga ngarahu.
- 39
- Kia kotahi ano taranata koura para-kore e hangā ai e ia taua mea, me ena oko katoa.
- 40
- Kia tupato ano hoki kia hangā aua mea kia rite ki te tauira i whakakitea atu ki a koe i te maunga.
Address: 
Phone: 
Email: