- 1
- A ko tenei tau e mea ai ki a ratou, ina whakatapu i a ratou hei tohunga maku: Tangohia tetahi puru, hei te kuao, me nga hipi toa e rua, hei te mea koha-kore,
- 2
- Me tetahi taro rewena-kore, me nga keke rewena-kore, ki nga mea i konatunatua ki te hinu, me etahi mea angiangi ano hoki, ki nga mea rewena-kore, i pania hoki ki te hinu: me hanga e koe aua mea ki te paraoa witi.
- 3
- Na, ka makā e koe aua mea ki te kete kotahi, a ka kawea mai i roto i te kete, me te puru, me nga hipi toa e rua.
- 4
- Na, ka kawe mai koe i a Arona, ratou ko ana tama, ki te whatitoka o te tapenakara o te whakaminenga, ka horoi hoki i a ratou ki te wai.
- 5
- Na, ka mau koe ki nga kakahu, a ka whakakakahuria a Arona ki te koti, ki te koroka o te epora, ki te epora, ki te kouma, ka whitiki hoki i a ia ki te whitiki whakairo o te epora:
- 6
- A ka potaea ano e koe tona mātenga ki te potae tohunga, ka meatia iho ano hoki te karauna tapu ki runga ki te potae.
- 7
- Na, ka mau koe ki te hinu whakawahi, ka riringi hoki ki runga ki tona mātenga, a ka whakawahia ia e koe.
- 8
- A, ka kawea mai ano e koe ana tama, ka whakakakahuria hoki ratou ki nga koti.
- 9
- Me whitiki ano ratou e koe, a Arona, ratou ko ana tama, ka potae ano hoki nga potae ki a ratou: a ma ratou te mahi tohunga: kia pumau tonu ano hoki tenei tikanga; na, ka whakatohunga koe i a Arona, ratou ko ana tama.
- 10
- Na, ka mea koe kia kawea mai tetahi puru ki mua o te tapenakara o te whakaminenga: a ka popoki iho nga ringa o Arona, ratou ko ana tama, ki runga ki te pane o te puru.
- 11
- Katahi ka patua e koe te puru ki te aroaro o Ihowa, ki te whatitoka o te tapenakara o te whakaminenga.
- 12
- Na, ka tango koe i tetahi wahi o te toto o te puru, a ka pania e tou ringa ki nga haona o te aata, ka riringi katoa ai i nga toto ki te turanga o te aata.
- 13
- Na, ka tango koe i te ngako katoa e whiwhiwhiwhi ana ki nga whekau, me te pa i runga ake i te ate, me nga whatukuhu e rua, me te pa i aua mea, ka tahu ai ki runga ki te aata.
- 14
- Ko te kikokiko ia o te puru, me tona hiako, me ona paru, me tahu e koe ki te ahi ki waho o te puni: he whakahere hara hoki tena mea.
- 15
- Na, ka mau koe ki tetahi o nga hipi toa; a ka popoki iho nga ringaringa o Arona ratou ko ana tama ki runga ki te mātenga o te hipi.
- 16
- Na, ka patu koe i te hipi, a ka tango i ona toto, ka tauhi ai ki te aata, a tawhio noa.
- 17
- Na, ka tapatapahia e koe te hipi, a ka horoia ona whekau, me ona waewae, ka maka ai ki runga ki nga wahi ona i tapahia, ki runga hoki i tona mātenga.
- 18
- Katahi ka tahuna e koe te hipi katoa ki runga ki te aata: he tahunga tinana tena mea ki a Ihowa, he kakara reka, he whakahere ahi ki a Ihowa.
- 19
- Na, ka mau koe ki te rua o nga hipi, a ka popoki iho nga ringaringa o Arona ratou ko ana tama ki runga ki te mātenga o te hipi.
- 20
- Na, ka patu koe i te hipi, a ka tango i tetahi wahi o ona toto, ka pani atu ki te matamata o te taringa matau o Arona, ki te matamata ano hoki o nga taringa matau o ana tama, ki te koromatua ano hoki o o ratou ringa matau, ki te koromatua ano hoki o o ratou waewae matau, me tauhiuhi atu ano hoki te toto ki te aata, a tawhio noa.
- 21
- Me tango ano e koe tetahi wahi o nga toto i runga i te aata, o te hinu whakawahi ano hoki, a ka tauhiuhi atu ki a Arona, ki ona kakahu, ki a ratou tahi ano ko ana tama, ki nga kakahu hoki, o ana tama: na, ka tapu ia, me ona kakahu, me ana tama, me nga kakahu ano hoki o ana tama.
- 22
- Me tango ano hoki e koe te ngako o te hipi toa, me te hiawero me te ngako e whiwhiwhiwhi ana ki nga whekau, me te pa i te ate, i nga whatukuhu e rua, me te ngako i aua mea, me te peke matau; he hipi whakatohungatanga hoki:
- 23
- Me te rohi taro kotahi, me tetahi keke taro hinu, me te tahi keke angiangi i roto i te kete taro rewena kore i te aroaro o Ihowa:
- 24
- Na, ka hoatu katoa e koe ki nga ringaringa o Arona, ki nga ringaringa ano hoki o ana tama; a me poipoi e koe hei whakahere poipoi ki te aroaro o Ihowa.
- 25
- Katahi ka tangohia mai aua mea e koe i o ratou ringaringa, ka tahu ai ki runga ki te aata hei tahunga tinana, hei kakara reka ki te aroaro o Ihowa, hei whakahere ahi ki a Ihowa.
- 26
- Na, ka tango koe i te uma o te hipi toa o te whakatohungatanga o Arona, a ka poipoi hei whakahere poipoi ki te aroaro o Ihowa: ko te wahi hoki tena mau.
- 27
- Me whakatapu ano e koe te uma o te whakahere poipoi, me te peke o te whakahere hapahapai, era e poipoia ana, e hapahapainga ana, o te hipi o te whakatohungatanga, o ta Arona, o ta ana tama:
- 28
- A ka waiho ma Arona ratou ko ana tama e nga tamariki a Iharaira; kia pumau tonu tenei tikanga: he whakahere hapahapai hoki: a ka waiho e nga tamariki a Iharaira hei whakahere hapahapai, he mea no roto i nga patunga o a ratou whakamarietanga, ara, he whakahere hapahapai na ratou ki a Ihowa.
- 29
- A ka riro nga kakahu tapu o Arona i ana tama i muri i a ia, hei kakahu e whakawahia ai, e whakatohungatia ai ratou.
- 30
- A e whitu nga ra e kakahuria ai aua mea e te tamaiti e meinga hei tohunga i muri i a ia, ina haere ia ki roto ki te tapenakara o te whakaminenga ki te minita i roto i te wahi tapu.
- 31
- Me tango ano e koe te hipi toa o te whakatohungatanga, a ka kohua i ona kikokiko ki te wahi tapu.
- 32
- A ma Arona ratou ko ana tama e kai te kikokiko o te hipi, me te taro i roto i te kete, ki te whatitoka o te tapenakara o te whakaminenga.
- 33
- A me kai ano e ratou aua mea i meatia ai te whakamarietanga, kia meinga ai ratou hei tohunga, kia whakatapua ai: kauaka ia te tangata ke e kai; he mea tapu hoki ena mea.
- 34
- A, ki te toe tetahi wahi o te kikokiko o nga whakatohungatanga, o te taro ranei, ki te ata, me tahu e koe taua toenga ki te ahi: kei kainga; he mea tapu hoki.
- 35
- Kia penei tau e mea ai ki a Arona, ratou ko ana tama; kia rite ki nga mea katoa i whakahaua atu nei e ahau ki a koe: e whitu nga ra e whakatohunga ai koe i a ratou.
- 36
- A me tuku e koe i tenei ra i tenei ra, tetahi kau hei whakahere hara, hei whakamarietanga: a me pure ano e koe te aata, ina oti i a koe te whakamarietanga mo taua mea; me whakawahi ano e koe kia tapu ai.
- 37
- E whitu nga ra e meinga ai e koe te whakamarietanga mo te aata, hei whakatapu; a ka meinga hei aata e tino tapu ana: nga mea katoa e pa ana ki te aata, ka tapu.
- 38
- A ko tenei tau e tuku ai ki runga ki te aata; kia rua nga reme, ki te tautahi, me mea tonu i tenei ra i tenei ra.
- 39
- Ko tetahi reme me tuku e koe i te ata, ko te rua hoki o nga reme me tuku e koe i te ahiahi.
- 40
- Tapiritia mai hoki te reme kotahi ki te whakatekau o te paraoa, he mea konatunatu ki te wahi whakawha o te hine hinu, o te mea i tukia, me te wahi whakawha o te hine waina, hei ringihanga.
- 41
- A me tuku e koe tetahi reme i te ahiahi; kia rite tau tukunga ki to te whakahere toto-kore o te ata, me tona ringihanga hoki, hei kakara reka, hei whakahere ahi ki a Ihowa.
- 42
- Me whakapumau tenei hei tahunga tinana, tuku iho tuku iho ki o koutou whakatupuranga, hei te whatitoka o te tapenakara o te whakaminenga, hei te aroaro o Ihowa: e tutaki hoki ahau ki a koutou ki reira, ki te korero i reira ki a koe.
- 43
- A ka tutaki ahau ki reira ki nga tamariki a Iharaira, ka whakatapua ano hoki te tapenakara e taku kororia.
- 44
- A ka whakatapua ano e ahau te tapenakara o te whakaminenga, me te aata: ka whakatapua ano hoki e ahau a Arona ratou ko ana tama, hei tohunga maku.
- 45
- A ka noho ano ahau ki waenganui o nga tamariki a Iharaira, a hei Atua ahau mo ratou.
- 46
- A ka mohio ratou ko ahau a Ihowa ko to ratou Atua, i whakaputaia mai ai ratou i te whenua o Ihipa, kia noho ai ahau i waenganui i a ratou: ko Ihowa ahau ko to ratou Atua.
Address: 
Phone: 
Email: