- 1
- Na, ka mahi a Petareere raua ko Ahoriapa, ratou ko nga tangata ngakau mohio katoa, i homai nei e Ihowa he ngakau tupato ki a ratou, me te whakaaro e mohiotia ai te mahi i nga tini mahi, mo te mahinga o te wahi tapu, o te pera me nga mea katoa i whakahaua mai e Ihowa.
- 2
- A i karangatia e Mohi a Petareere raua ko Ahoriapa, me nga tangata ngakau mohio katoa; i homai nei e Ihowa he mahara ki o ratou ngakau, nga tangata katoa i toko ake o ratou ngakau kia haere mai ki te mahi mahi ai:
- 3
- Na, ka tangohia e ratou i te aroaro o Mohi nga whakahere katoa i kawea mai e nga tamariki a Iharaira mo te hanganga o nga mea mo nga mahi o te wahi tapu, hei hanga hoki i taua mea. A i kawea mai ano hoki e ratou nga whakahere homai noa mai ki a ia i tenei ata i tenei ata.
- 4
- Na, ka haere mai nga tangata mohio katoa, i mahi nei i nga mahi katoa o te wahi tapu, ia tangata ia tangata i a ratou mahi i mahi ai ratou;
- 5
- A ka korero ki a Mohi, ka mea, He nui noa atu ta te iwi e kawe mai nei mo te mahinga o nga mea i whakahaua e Ihowa kia meatia.
- 6
- Na, ka whakahau atu a Mohi, a ka meinga e ratou kia karangatia puta noa i te puni, a ka mea, Kaua tetahi tane, tetahi wahine ranei e mahi i tetahi atu mahi hei whakahere mo te wahi tapu. Na, ka whakamutua te kawe mai a te iwi.
- 7
- He nui hoki, a toe ake, nga mea i a ratou mo te mahinga o nga mea katoa.
- 8
- A i hangā e nga tangata ngakau mohio katoa i roto i te hunga i mahia ai te mahi o te tapenakara, nga pīhi kotahi tekau ki te rinena miro pai, ki te puuru, ki te papura, ki te ngangana: he tohunga rawa te mahinga o nga kerupima i whatua ki roto.
- 9
- E rua tekau ma waru whatianga te roa o te pīhi kotahi, e wha whatianga hoki te whanui o te pīhi kotahi: rite tonu te nui o nga pīhi kotahi katoa.
- 10
- A i honoa e ia nga pīhi e rima tetahi ki tetahi: me era atu pīhi e rima hoki, i honoa e ia tetahi ki tetahi.
- 11
- A i hangā ano e ia etahi koropiko puuru ki te taha o tetahi pīhi, ki te taha e honoa ana: i pera ano tana mahi ki te taha ki waho o tetahi pīhi, ki te hononga mai o te rua.
- 12
- E rima tekau nga koropiko i hangā e ia ki tetahi pīhi, e rima tekau hoki nga koropiko i hangā e ia ki te taha o te pīhi i te hononga mai o te rua: a i mau nga koropiko tetahi ki tetahi.
- 13
- I hangā ano hoki e ia etahi toromoka koura e rima tekau, a honoa ana nga pīhi tetahi ki tetahi ki nga toromoka: a ka kotahi ano te tapenakara.
- 14
- I hangā ano e ia etahi pīhi ki te huruhuru koati, hei teneti mo runga i te tapenakara: kotahi tekau ma tahi nga pīhi i hangā e ia.
- 15
- E toru tekau whatianga te roa o te pīhi kotahi, e wha hoki nga whatianga te whanui o te pīhi kotahi, rite tonu te nui o nga pīhi kotahi tekau ma tahi.
- 16
- A i honoa e ia nga pīhi e rima ki a ratou ano, me nga pīhi e ono ki a ratou ano.
- 17
- I hangā ano e ia nga koropiko e rima tekau ki te taha ki waho o te pīhi i te hononga, i hangā ano e ia nga koropiko e rima tekau ki te taha o te pīhi e honoa mai ai te rua.
- 18
- I hangā ano e ia nga toromoka parahi e rima tekau, hei hono i te teneti kia kotahi.
- 19
- I hangā ano hoki e ia etahi hiako, hipi, he mea whakawhero, hei uhi mo te teneti, me etahi hiako pateri hei uhi mo waho atu.
- 20
- I hangā ano hoki e ia etahi papa mo te tapenakara, he hitimi te rakau, he mea tu ki runga.
- 21
- Kotahi tekau whatianga te roa o te papa kotahi, kotahi whatianga me te hawhe te whanui o te papa kotahi.
- 22
- E rua nga arero o te papa kotahi, he mea e ririte ana ki a raua: he pera tonu tana i mea ai ki nga papa katoa o te tapenakara.
- 23
- A i hangā ano e ia nga papa mo te tapenakara: e rua tekau nga papa mo te taha ki te tonga whaka-te-tonga:
- 24
- E wha tekau hoki nga turanga hiriwa i hangā e ia mo nga papa e rua tekau; e rua nga turanga i raro i tetahi papa mo ona arero e rua, e rua hoki nga turanga i raro i tetahi atu papa mo ona arero e rua.
- 25
- A e rua tekau nga papa i hangā e ia mo tera taha o te tapenakara, mo te taha ki te nota,
- 26
- Me nga turanga hiriwa e wha tekau; nga turanga e rua mo raro iho i tetahi papa, me nga turanga e rua mo raro iho i tetahi atu papa.
- 27
- A mo te pakitara o te tapenakara whaka-te-hauauru, e ono nga papa i hangā e ia.
- 28
- E rua hoki nga papa i hangā e ia mo nga koki o te tapenakara i taua pakitara ano.
- 29
- A i honoa aua papa i raro, i honoa ano hoki i runga rawa ki te mowhiti kotahi: i peratia e ia aua papa e rua i nga koki e rua.
- 30
- Na, ka waru aua papa; me nga turanga hiriwa, kotahi tekau ma ono nga turanga; e rua nga turanga i raro i tetahi papa i tetahi papa.
- 31
- A i hangā ano e ia etahi kaho, he hitimi te rakau: e rima mo nga papa o tetahi taha o te tapenakara,
- 32
- E rima hoki nga kaho mo nga papa o tetahi taha o te tapenakara, a e rima nga kaho mo nga papa o te tapenakara mo te pakitara ki te hauauru.
- 33
- A ko to waenga kaho i meinga e ia kia rere na waenganui o nga papa i tetahi pito ki tetahi pito.
- 34
- A i whakakikoruatia ano e ia nga papa ki te koura, a ka hangā nga mowhiti o aua mea ki te koura hei kuhunga mo nga kaho; i whakakikoruatia ano e ia nga kaho ki te koura.
- 35
- A i hangā ano e ia he arai ki te mea puuru, ki te papura, ki te ngangana, ki te rinena miro pai; he tohunga rawa te mahinga o nga kerupima i whatua e ia ki roto.
- 36
- A i hangā ano e ia nga pou e wha mo taua mea ki te hitimi, a whakakikoruatia iho e ia ki te koura: he koura nga matau: i whakarewaina ano hoki e ia nga turanga hiriwa e wha mo aua mea.
- 37
- I hangā ano hoki e ia he pa mo te whatitoka o te teneti ki te mea puuru, ki te papura, ki te ngangana, ki te rinena miro pai hoki, he mea mahi ki te ngira;
- 38
- Me ona pou e rima, me nga matau o aua mea: a i whakakikoruatia e ia nga pito ki runga o aua pou me nga awhi ki te koura: ko nga turanga e rima ia he parahi.
Address: 
Phone: 
Email: