- 1
- A ka whakahoki atu a Mohi, ka mea, Na, e kore ratou e whakapono mai ki a au, e kore hoki e whakarongo ki toku reo, e mea hoki ratou, Kahore a Ihowa i puta mai ki a koe.
- 2
- A ka mea mai a Ihowa ki a ia, He aha tena i tou ringa? A ka mea ia, He tokotoko.
- 3
- Na, ka mea mai ia, Makā atu ki te whenua. Na, maka ana e ia ki te whenua, a, whakanakahi iho; te tino rerenga o Mohi i tona aroaro.
- 4
- A ka mea mai ano a Ihowa ki a Mohi, Torona atu tou ringa, hopukia hoki i te hiku: te toronga atu o tona ringaringa, hopukina iho, na, ka whakatokotoko ano ki tona ringa:
- 5
- Kia whakapono ai ratou kua puta mai ki a koe a Ihowa te Atua o o ratou mātua, te Atua o Aperahama, te Atua o Ihaka, te Atua hoki o Hakopa.
- 6
- A i mea mai ano a Ihowa ki a ia, Tena, kuhua tou ringaringa ki tou uma: a kuhua ana e ia tona ringaringa ki tona uma; te unuhanga mai ano, na, kua reparatia tona ringaringa, koia ano me te hukarere.
- 7
- A i mea mai ano ia, Whakahokia ano tou ringaringa ki tou uma: a whakahokia ana ano e ia tona ringaringa ki tona uma; te unuhanga mai ano i tona uma, na, kua hoki, kua rite ki tona kiri ano.
- 8
- A ki te kore ratou e whakapono ki a koe, ki te kore e whakarongo ki te reo o te tohu tuatahi, na, ka whakapono ratou ki te reo o to muri tohu.
- 9
- A ki te kore ano hoki ratou e whakapono ki enei tohu e rua, a e kore e whakarongo ki tou reo, na, utuhia e koe ki te wai o te awa, ka riringi ki te oneone maroke; a te wai e utuhia e koe i te awa, hei toto ki runga ki te whenua maroke.
- 10
- Na, ka ki atu a Mohi ki a Ihowa, E toku Ariki, ehara ahau i te pu-korero, i mua, i muri iho ranei i tau korerotanga ki to pononga, he reo ngoikore hoki toku he arero paremo.
- 11
- Katahi ka mea mai a Ihowa ki a ia, Na wai i hanga te mangai o te tangata? Na wai hoki i mea kia wahangu, kia turi, kia titiro ranei, kia matapo ranei? Ehara koia i ahau i a Ihowa?
- 12
- Na, haere ra, a hei tou waha tonu ahau, whakaako ai i a koe ki tau e korero ai.
- 13
- Na, ko tana meatanga atu, E toku Ariki, ungā ra e koe te tangata e unga ai koe.
- 14
- Katahi ka mura ake te riri a Ihowa ki a Mohi; a ka mea mai, Ehara ianei a Arona Riwaiti i te tuakana nou? E matau ana ahau he mohio ia ki te korero: a e haere mai ana hoki ia ki te whakatau i a koe; a ka kite i a koe, ka koa a roto o tona ngakau.
- 15
- A mau e korero atu ki a ia, e hoatu hoki nga kupu ki tona waha: a hei tou mangai ahau, hei tona mangai hoki, whakaako ai i a korua ki ta korua e mea ai.
- 16
- A ko ia hei kai korero mau ki te iwi; a ko ia, ina, ka ai ia hei mangai mou, ko koe hoki hei Atua ki a ia.
- 17
- A maua atu e koe tenei tokotoko i tou ringa, hei mea mau i nga tohu.
- 18
- Na, haere ana a Mohi, hoki ana ki a Ietero ki tona hungawai, a ka mea ki a ia, Ka haere au, ne? ka hoki ki oku tuakana i Ihipa, kia kite kei te ora ano ranei ratou. A ka mea mai a Ietero ki a Mohi, Haere ra i runga i te pai.
- 19
- A ka mea mai a Ihowa ki a Mohi i Miriana, Haere, e hoki ki Ihipa: kua mate katoa hoki nga tangata i rapu ra i a koe kia patua.
- 20
- Katahi a Mohi ka mau ki tana wahine ratou ko ana tamariki, a whakanohoia ana e ia ki runga ki te kaihe, a hoki ana ki te whenua o Ihipa: a i tango ano a Mohi i te tokotoko a te Atua ki tona ringaringa.
- 21
- A i mea mai a Ihowa ki a Mohi, E haere koe, e hoki ki Ihipa, kia mahara kia meatia e koe ki te aroaro o Parao ena merekara katoa, ka hoatu na e ahau ki tou ringaringa: otiia maku e whakapakeke tona ngakau, kia kore ai ia e tuku mai i te iwi.
- 22
- A ka mea atu koe ki a Parao, E penei ana te kupu a Ihowa, Ko Iharaira taku tamaiti, taku matamua:
- 23
- A ko taku kupu tenei ki a koe, Tukua mai taku tamaiti kia mahi ki a au: a ki te kore koe e rongo ki te tuku mai i a ia, na, ka whakamatea e ahau to tamaiti, to matamua.
- 24
- A i a ratou i te whare tira i te ara, na pono pu mai a Ihowa ki a ia, a ka whai i a ia kia whakamatea.
- 25
- A ka tango a Hipora i tetahi kohatu koi, a kotia iho te kiri matamata o tana tamaiti, na whakapakia atu ana e ia ki ona waewae, ka mea, He tane whakaheke toto koe ki a au.
- 26
- Katahi ia ka tuku atu i a ia: i reira ano ka mea mai te wahine, He tane whakaheke toto koe; mo te kotinga hoki.
- 27
- A ka mea mai a Ihowa ki a Arona, Haere ki te koraha, ki te whakatau i a Mohi. A haere atu ana ia, a ka tutaki ki a ia ki te maunga o te Atua, na ka kihi i a ia.
- 28
- A korerotia atu ana e Mohi ki a Arona nga kupu katoa a Ihowa, i unga nei i a ia, me nga tohu katoa i ako iho ai ia ki a ia.
- 29
- Na, haere ana a Mohi raua ko Arona, a whakaminea ana nga kaumatua katoa o nga tamariki a Iharaira:
- 30
- Heoi korerotia atu ana e Arona nga kupu katoa i korero ai a Ihowa ki a Mohi, a mahia ana e ia nga tohu i te tirohanga o te iwi.
- 31
- A whakapono tonu te iwi: a ka rongo ratou kua tae mai a Ihowa ki nga tamariki a Iharaira, kua titiro ki to ratou whakawhiunga, na, ka tuohu ratou, ka koropiko.
Address: 
Phone: 
Email: