- 1
- Katahi ka mea mai a Ihowa ki a Mohi, Akuanei koe kite ai i taku e mea ai ki a Parao; ta te mea he kaha te ringaringa e tuku ai ia i a ratou kia haere, he kaha hoki te ringaringa e pei mai ai ia i a ratou i tona whenua.
- 2
- A ka korero mai te Atua ki a Mohi, ka mea ki a ia, Ko Ihowa ahau:
- 3
- A i oku putanga ki a Aperahama, ki a Ihaka, ki a Hakopa, Ko te Atua Kaha rawa toku ingoa; kihai hoki ratou i mohio ki a au, ko IHOWA toku ingoa.
- 4
- Ka whakamanā ano hoki e ahau taku kawenata ki a ratou, kia hoatu te whenua o Kanaana ki a ratou, te whenua o to ratou nohoanga manenetanga, i noho manene ai ratou.
- 5
- Kua rongo ano ahau ki te aue a nga tamariki a Iharaira, e whakamahia nei e nga Ihipiana, kua mahara hoki ki taku kawenata.
- 6
- Mo konei me ki atu e koe ki nga tamariki a Iharaira, Ko Ihowa ahau, a maku koutou e whakaputa mai i raro i nga kawenga a nga Ihipiana, maku hoki koutou e tango mai i ta ratou whakataurerekatanga, a he maro te ringa, he nui nga whakawakanga, e whakaora ai ahau i a koutou:
- 7
- A ka tango ahau i a koutou hei iwi moku, a ko au hei Atua mo koutou: a e mohio koutou ko Ihowa ahau, ko to koutou Atua, e whakaputa mai ana i a koutou i raro i nga kawenga a nga Ihipiana.
- 8
- Maku ano hoki koutou e kawe atu ki te whenua i whakamaro ai ahau i toku ringaringa mo reira ki a hoatu ki a Aperahama, ki a Ihaka, ki a Hakopa; a ka hoatu a reira e ahau ki a koutou hei kāinga tuturu: Ko Ihowa ahau.
- 9
- A pena atu ana ta Mohi korero ki nga tamariki a Iharaira: heoi, kihai ratou i whakarongo ki a Mohi i te mamae o te ngakau, i te whakawahinga kinotanga hoki.
- 10
- A i korero mai ano a Ihowa ki a Mohi, i mea,
- 11
- Haere ki roto, korero atu ki a Parao, ki te kingi o Ihipa, kia tukua mai e ia nga tamariki a Iharaira i tona whenua.
- 12
- Na, ka korero atu a Mohi i te aroaro o Ihowa, ka mea, Nana, kahore nga tamariki a Iharaira i whakarongo mai ki a au; me pehea ra e rongo ai a Parao ki a au, he ngutu kokoti-kore nei hoki ahau?
- 13
- Na, ka korero mai a Ihowa ki a Mohi raua ko Arona, a homai ana e ia ki a raua nga korero ki nga tamariki a Iharaira, ki a Parao hoki kingi o Ihipa, mo nga tamariki a Iharaira kia whakaputaina mai i te whenua o Ihipa.
- 14
- Ko nga upoko enei o nga whare o o ratou mātua: ko nga tama a Reupena matamua a Iharaira; ko Hanoka, ko Paru, ko Heterono, ko Karami: ko nga hapu enei o Reupena.
- 15
- Na, nga tama a Himeona; ko Iemuere, ko Iamini, ko Ohara, ko Iakini, ko Tohara, ko Hauru; he tama tera na tetahi wahine o nga Kanaani: ko nga hapu enei o Himeona.
- 16
- Na, ko nga ingoa enei o nga tama a Riwai ki te tikanga iho o o ratou whakatupuranga; ko Kerehona, ko Kohata, ko Merari: a ko nga tau i ora ai a Riwai, kotahi rau e toru tekau ma whitu nga tau.
- 17
- A nga tama a Kerehona; ko Ripini, ko Himei, me o raua hapu ano.
- 18
- A nga tama a Kohata; ko Amarama, ko Itihara, ko Heperona, ko Utiere: a nga tau i ora ai a Kohata, kotahi rau e toru tekau me toru nga tau.
- 19
- A nga tama a Merari; ko Mahari, ko Muhi: ko nga hapu enei o Riwai, puta noa i o ratou whakatupuranga.
- 20
- A i tango a Amarama i a Iokepete, i te tuahine o tona papa, hei wahine mana; a whanau ake ana tamariki ko Arona raua ko Mohi. A nga tau i ora ai a Amarama, kotahi rau e toru tekau ma whitu nga tau.
- 21
- A nga tama a Itihara; ko Koraha, ko Nepeke, ko Tikiri.
- 22
- A nga tama a Utiere; ko Mihaera, ko Eritapana, ko Hitiri.
- 23
- A ka tango a Arona i a Erihepa tamahine a Aminarapa, i te tuahine o Nahona, hei wahine mana; a whanau ake ana ko Natapa, ko Apihu, ko Ereatara, ko Itamara.
- 24
- A nga tama a Koraha; ko Ahira, ko Erekana, ko Apihapa: ko nga hapu enei o nga Korahi.
- 25
- A i tango a Ereatara tama a Arona, i tetahi o nga tamahine a Putiera hei wahine mana; a whanau ake tana ko Pinehaha: ko nga upoko enei o nga mātua o nga Riwaiti puta noa i o ratou hapu.
- 26
- Ko taua Arona raua ko Mohi tenei i korero nei a Ihowa ki a raua, kia whakaputaina mai nga tamariki a Iharaira i te whenua o Ihipa, tenei ropu tenei ropu o ratou.
- 27
- Na raua i korero atu ki a Parao kingi o Ihipa, kia whakaputaina mai nga tamariki a Iharaira i Ihipa: ko taua Mohi raua ko Arona tenei.
- 28
- A i te ra ano i korero ra a Ihowa ki a Mohi i te whenua o Ihipa,
- 29
- Ka korero a Ihowa ki a Mohi, ka mea, Ko Ihowa ahau: korerotia atu ki a Parao kingi o Ihipa nga mea katoa e korero nei ahau ki a koe.
- 30
- A ka mea a Mohi i te aroaro o Ihowa, Nana, he ngutu kokoti-kore ahau, a me pehea e rongo ai a Parao ki a au?
Address: 
Phone: 
Email: