- 1
- Na, i te toru tekau o nga tau i te wha o nga marama i te rima o nga ra o te marama i roto ahau i nga whakarau i te taha o te awa o Kepara, na, ka puare nga rangi, a ka kite ahau i nga putanga mai o te Atua.
- 2
- I te rima o nga ra o te marama, ara, i te rima o nga tau o to Kingi Iehoiakini whakaraunga,
- 3
- Ka tika tonu mai te kupu a Ihowa ki a Ehekiere tohunga tama a Puti i te whenua o nga Karari ki te taha o te awa o Kepara; a i runga te ringa o Ihowa i a ia i reira.
- 4
- Na, taku tirohanga atu, nana, ko te tukauati e puta mai ana i te nota, he kapua nui, he ahi e hoki iho ana ki roto ki a ia ano, wheriko tonu i tetahi taha, i tetahi taha, a i waenganui, i rite ki te kara o te amipere, i waenganui ano i te ahi.
- 5
- Na, i waenganui o taua ahi ko te ahua o nga mea ora e wha. Ko to ratou ahua ano tenei; i rite ratou ki te tangata.
- 6
- Na, e wha nga mata o tetahi, o tetahi o ratou, e wha nga parirau o tetahi, o tetahi.
- 7
- O ratou waewae ano hoki he waewae e tika tonu ana, te kapu ano hoki o o ratou waewae rite tonu ki te kapu o te waewae o te kuao kau, wheriko tonu, rite tonu ki te kanapatanga o te parahi kua oti te oro.
- 8
- He ringaringa tangata ano o ratou i raro i o ratou parirau, i o ratou taha e wha: ratou tokowha rite tonu i nga kanohi, i nga parirau.
- 9
- I piri tonu o ratou parirau tetahi ki tetahi; kihai ratou i tahuri i a ratou e haere ana; i tika tonu atu tetahi, tetahi.
- 10
- Na, te ahua o o ratou mata; he mata tangata o ratou tokowha, he mata raiona i te taha ki matau; a he mata kau i te taha ki maui o ratou tokowha; he mata ekara ano hoki o ratou tokowha.
- 11
- Ko o ratou mata enei: na, i roha whakarunga o ratou parirau: o te mea kotahi e rua nga parirau e piri ana tetahi ki to tetahi, a e rua hei hipoki mo o ratou tinana.
- 12
- A i tika tonu atu ratou tetahi, tetahi: te wahi hei haerenga atu ma te wairua, haere ana ratou ki reira: kihai ratou i tahuri i a ratou e haere ana.
- 13
- Na, te rite o aua mea ora, to ratou ahua, koia ano kei nga ngarahu ahi i te mea e ka ana, kei te ahua ano o nga rama: i haereere taua mea i roto i aua mea ora, mura tonu te ahi, i puta mai ano he uira i roto i te ahi.
- 14
- Na, aua mea ora, te oma, te hokinga, rite tonu te ahua ki to te hikonga uira.
- 15
- Na, i taku tirohanga atu ki nga mea ora, nana, ko tetahi wīra i runga i te whenua i te taha o nga mea ora, me ona mata e wha.
- 16
- Te ahua o nga wīra, me to ratou mahinga, rite tonu te kara ki to te perira: rite tonu aua wira e wha; to ratou ahua, to ratou mahinga, me te mea he wīra i roto i te wīra.
- 17
- I to ratou haerenga i haere o ratou taha e wha; kihai ratou i tahuri i a ratou e haere ana.
- 18
- Na, o ratou awhi, tiketike rawa, he hanga whakawehi, kapi tonu ano hoki i te kanohi o ratou awhi i tetahi taha, i tetahi taha, o ratou e wha.
- 19
- Na, i te haerenga o nga mea ora i haere ano nga wīra i to ratou taha; a ka ara nga mea ora i runga i te whenua, ka ara ano nga wīra.
- 20
- Te wahi hei haerenga atu ma te wairua, i haere ano ratou ki reira, i mea ano to ratou wairua kia haere ratou ki reira; i ara ano nga wīra ki runga i to ratou ritenga atu: no te mea i roto i nga wīra te wairua o te mea ora.
- 21
- I haere era, ka haere enei, i tu era, ka tu enei; a ka ara ake era i runga i te whenua, ka ara ano nga wīra i to ratou ritenga atu; no te mea kei roto te wairua o te mea ora i nga wīra.
- 22
- Na, te ahua o te kikorangi i runga i nga mahunga o te mea ora, rite tonu te kāra ki to te karahi e wehingia ana, he mea hora atu i runga i o ratou māhunga i te taha ki runga.
- 23
- Na, i raro i te kikorangi o ratou parirau, maro tonu, anga tonu mai tetahi ki tetahi: o te mea kotahi e rua hei hipoki i tetahi taha, a o te mea kotahi ano e rua hei hipoki i tera taha o o ratou tinana.
- 24
- A i a ratou e haere ana, i rongo ahau i te haruru o o ratou parirau me te mea ko te haruru o nga wai maha, me te mea ano ko te reo o te Kaha-rawa, he reo e korero ana, ano he reo no te ope: i nga wa i tu ai ratou i tukua iho o ratou parirau.
- 25
- I puta iho ano hoki he reo i te kikorangi i runga i o ratou māhunga, i te mea ka tu ratou, a ka tukua iho o ratou parirau.
- 26
- Na, i runga i te kikorangi i runga i o ratou māhunga ko te ahua o tetahi torona e rite ana ki te kohatu hapaira: a i runga i te ahua o te torona ko tetahi ahua e rite ana ki to te tangata i runga i taua torona i te taha ki runga.
- 27
- I kite atu ano ahau me te mea no te amipere te kara, he mea i rite ki te ahua o te ahi i roto, a taka noa, taka noa; i te ahua o tona hope, a haere whakarunga, a i te ahua ano o tona hope, a haere whakararo, i kite atu ahau me te mea ko te ahua o te ahi, wheriko tonu, i tetahi taha, i tetahi taha.
- 28
- Rite tonu ki te ahua o te kopere i te kapua i te rangi ua te ahua o te wherikotanga, a taka noa: Ko te ahua tena, ko te ritenga o te kororia o Ihowa. A, taku kitenga atu, tapapa ana ahau ki raro; na, ka rongo ahau i te reo o tetahi e korero ana.
Address: 
Phone: 
Email: