- 1
- I puta mai ano te kupu a Ihowa ki a au, i mea,
- 2
- E te tama a te tangata, tokorua nga wahine i mua, he tamahine na te whaea kotahi.
- 3
- Heoi puremu ana ki Ihipa; puremu ana i to raua tamarikitanga: i romia o raua u ki reira, i mirimiria ki reira nga matamata o to raua wahinatanga.
- 4
- Na, o raua ingoa, to to mua ko Ahora, to tona teina ko Ahoripa: i a au ano hoki era, i whanau ano a raua tamariki, a raua tamahine. Na, o raua ingoa, Ko Hamaria a Ahora, ko Hiruharama a Ahoripa.
- 5
- Na, kua puremu a Ahora i te mea i ahau ano ia, minamina atu ana ki ana i aroha atu ai, ki ona hoa tata, ki nga Ahiriana,
- 6
- He pūru nei o ratou kakahu, he ariki, he kawana, he taitamariki e minaminatia ratou katoa, he tangata hoiho, e eke ana ki runga ki nga hoiho.
- 7
- Heoi kei te mahi puremu ia ki a ratou, ki nga tangata papai o nga tamariki o Ahiria, ki a ratou katoa, ki te hunga katoa i minaminatia atu e ia; whakapokea ana ia e ia ano ki ā ratou whakapakoko katoa.
- 8
- Kihai ano i mahue i a ia ana puremutanga o Ihipa; i takoto hoki ratou ki a ia i tona tamarikitanga, a mirimiria ana e ratou nga matamata o tona wahinatanga, ringitia ana e ratou a ratou puremutanga ki runga ki a ia.
- 9
- Na reira ia i tukua atu ai e ahau ki te ringaringa o te hunga i arohaina e ia, ki te ringa o nga tamariki o Ahiria, o ana i minamina atu ai.
- 10
- A hurahia ana ia e ratou kia noho tahanga: tangohia ana e ratou ana tamariki, ana tamahine, patua iho ia e ratou ki te hoari, a whai ingoa ana ia i roto i nga wahine, i nga whakawakanga hoki i whakaritea e ratou ki a ia,
- 11
- A, te kitenga o tona teina, o Ahoripa, na, kua kino rawa i to tera tona minamina atu, ona puremutanga ano hoki i nga puremutanga a tona tuakana.
- 12
- Minamina ana ia ki nga Ahiriana ki ona hoa tata, ki nga ariki, ki nga kawana, he pai rawa nei nga kakahu, he tangata hoiho e eke ana ki runga ki nga hoiho, ratou katoa he tamariki e minaminatia.
- 13
- Na, ka kite ahau kua poke ia, kotahi tonu te ara o raua tokorua,
- 14
- Kua neke ake ano hoki ana puremutanga: i tona kitenga hoki i nga tangata kua oti te tuhituhi ki te pakitara, i nga whakaahua a nga Karari, he mea tuhituhi ki te whero pai,
- 15
- He mea whitiki o ratou hope ki te whitiki, o ratou māhunga, mea rawa ki te kakahu kua oti te rongoa, he rangatira ratou katoa ki te titiro atu; te ahua kei to nga tamariki o Papurona, o Karari, o te whenua i whanau ai ratou:
- 16
- Na, te kitenga atu o ona kanohi i a ratou, minamina tonu atu ia ki a ratou, tukua atu ana e ia nga karere ki a ratou ki Karari.
- 17
- Na, te haerenga mai ki a ia o nga tamariki o Papurona ki te moenga aroha, whakapokea ana ia e ratou ki ā ratou puremutanga: heoi ka whakapokea nei e ratou, na, ngakau-kore noa iho ia ki a ratou.
- 18
- Na, ka whakakitea e ia ana puremutanga, ka whakakitea ano ia e noho tahanga ana: na, ngakau-kore noa iho ahau ki a ia, pera tonu me ahau i ngakau-kore ra ki tona tuakana.
- 19
- Heoi whakanuia ana e ia ana puremutanga, maharahara ana ano ia ki nga ra o tona tamarikitanga i a ia i puremu ra ki te whenua o Ihipa.
- 20
- I minamina hoki ia ki o ratou hoa puremu, he kikokiko kaihe nei o ratou kikokiko; a, te mea e tarere mai ana i roto i a ratou rite tonu ki te mea e tarere mai ana i roto i nga hoiho.
- 21
- Na, kua hokia nei e koe nga tikanga puremu o to tamarikitanga i nga matamata ra, o o u i mirimiria e nga Ihipiana, he meatanga ki nga u o to tamarikitanga.
- 22
- Mo reira, e Ahoripa, ko te kupu tenei a te Ariki a Ihowa, Nana, ka ara i a au o hoa aroha hei hoa riri mou, era kua ngakau-kore na koe ki a ratou, ka kawea mai ano ratou e ahau ki a koe i nga taha katoa;
- 23
- Nga tamariki o Papurona, ratou ko nga Karari katoa, a Pekoro, a Hoa, a Koa, ratou tahi ko nga tamariki katoa o Ahiria, he taitamariki e minaminatia ratou katoa, he ariki, he kawana, he rangatira, he rongo nui; eke katoa ana ratou ki runga ki nga hoiho.
- 24
- A, ka haere mai ratou ki te whawhai ki a koe, he hariata ano a ratou, he kāta, he wīra, he whakaminenga iwi; rite rawa i a ratou te puapua, te whakangungu rakau, te potae, hei whawhai ki a koe i tetahi taha, i tetahi taha: ka tukua ano e ahau te whakarite whakawa ki to ratou aroaro, a ka rite ki ā ratou whakaritenga ta ratou whakarite whakawa mou.
- 25
- Ka meinga ano e ahau kia anga atu toku hae ki a koe, a ka mahi ratou ki a koe i runga i te weriweri: ka riro ano to ihu i a ratou, me o taringa, ka hinga ano hoki o morehu i te hoari: ka tangohia atu e ratou o tamariki me o tamahine; ka pau ano hoki o morehu i te ahi.
- 26
- Ka huia atu ano hoki e ratou o kakahu, ka tangohia ano e ratou o mea ataahua.
- 27
- Na, ka meinga e ahau to tikanga puremu kia mutu, me to puremutanga ano i timata mai ra i te whenua o Ihipa: e kore o kanohi e ara atu ki aua mea, e kore ano koe e maharahara atu ki Ihipa a muri ake nei.
- 28
- No te mea ko te kupu tenei a te Ariki a Ihowa; Tenei au ka hoatu nei i a koe ki roto ki te ringaringa o te hunga e kinongia na e koe, ki roto ki te ringaringa o te hunga kua ngakau-kore na koe ki a ratou.
- 29
- Ka mahi ano hoki ratou i runga i te mauahara ki a koe, ka riro ano hoki o mauiwi katoa i a ratou, mahue iho koe i a ratou kahore he kakahu, noho tahanga ana: ka kitea hoki e takoto kau ana o puremutanga, to tikanga puremu me o puremutanga ano hoki.
- 30
- Ka meatia enei mea e ahau ki a koe mo to whainga atu ki nga tauiwi puremu ai, mou i poke i ā ratou whakapakoko.
- 31
- I haere koe i te ara o to tuakana; na, ka hoatu e ahau tana kapa ki to ringaringa.
- 32
- Ko te kupu tenei a te Ariki a Ihowa, Ka inumia e koe te kapa a to tuakana, aua noa iho ki raro, nui noa atu: ka ai koe hei whakakatanga mai, hei taunutanga; ranea rawa taua kapa.
- 33
- Ka ki koe i te haurangi, i te pouri, i te kapa o te ketekete, o te whakangaromanga, i te kapa a to tuakana, a Hamaria.
- 34
- Ka inumia ano e koe, tatau rawa, wawahi rawa i nga maramara, ka haea atu ano e koe o u: naku hoki te korero, e ai ta te Ariki ta Ihowa.
- 35
- Ina, ko te kupu tenei a te Ariki a Ihowa; na, kua wareware na koe ki a au, kua makā ano ahau e koe ki muri i to tuara, na, pikaua ano e koe to tikanga puremu me o puremutanga.
- 36
- I mea mai ano a Ihowa ki a au; E te tama a te tangata, e whakawa ranei koe i a Ahora raua ko Ahoripa? whakakitea a raua mea whakarihariha ki a raua;
- 37
- Ara, kua puremu raua, he toto ano kei o raua ringaringa, kua puremu ano raua ki ā raua whakapakoko, kua meinga ano hoki e raua a raua tamariki, aku i whanau nei i roto i a raua kia tika i roto i te ahi, pau tonu atu.
- 38
- Ko tenei ano hoki ta raua i mea ai ki a au: I taua rangi ano whakapokea iho e raua toku wahi tapu, aku hapati ano hoki whakanoatia ake e raua.
- 39
- I ta raua patunga hoki i ā raua tamariki hei mea ki ā raua whakapakoko, haere ana raua i taua rangi ano ki toku wahi tapu whakanoa ai; na, ko ta raua tena i mea ai i roto i toku whare.
- 40
- I unga tangata atu ano hoki koutou ki te hunga haere mai i tawhiti, he hunga i ungā atu nei he karere ki a ratou; na, kua tae mai ratou; he meatanga ki a ratou i horoi ai koe i a koe, mea rawa i o kanohi ki te pukepoto, whakapaipai rawa i a koe ki nga whakapaipai;
- 41
- Na, noho ana koe, he mea kororia te moenga, te tepu whakapai rawa i tona aronga atu, i runga ko taku whakakakara, ko taku hinu, he mea whakatakoto nau.
- 42
- I a ia ano hoki te ngangau o te mano tini i runga i te whenua rangatira: i kawea mai ano hoki hei tapiri mo te mano tangata nga Hapeani o te koraha, te hunga i whakanoho nei i nga poroporo ki o raua ringaringa, te karauna ataahua ano ki runga ki o raua māhunga.
- 43
- Na, ko taku meatanga atu ki a ia, kua ruruhitia nei hoki ia, me tana puremu ano, E puremu ano ranei ratou ki a ia, me ia ano ki a ratou?
- 44
- Heoi haere atu ana ratou ki a ia, me te mea e haere ana ki te wahine puremu: pera tonu ta ratou haere ki a Ahora, ki a Ahoripa, ki nga wahine tikanga puremu.
- 45
- Na, nga tangata tika, ma ratou raua e whakawa, ka rite ki te meatanga ki nga wahine puremu, ka rite ki te meatanga ki nga wahine whakaheke toto; he wahine puremu hoki raua, he toto kei o raua ringaringa.
- 46
- Ko te kupu hoki tenei a te Ariki a Ihowa; Ka kawea mai e ahau he whakaminenga ki a raua, a ka meinga raua e ahau kia whakanekehia atu, kia pahuatia.
- 47
- Ka akina ano raua e te whakaminenga ki te kohatu, ka tapahia raua ki ā ratou hoari; ka whakamatea a raua tamariki, a raua tamahine, ka tahuna ano hoki o raua whare ki te ahi.
- 48
- Katahi ka whakamutua e ahau te tikanga puremu o te whenua; a ka ako nga wahine katoa kia kaua a ratou mahi e rite ki a korua tikanga puremu.
- 49
- Ka hoatu ano e ratou nga utu o ta korua tikanga puremu ki a korua, a ka pikaua e korua nga hara o o korua whakapakoko: ka mohio ano hoki korua ko ahau te Ariki, ko Ihowa.
Address: 
Phone: 
Email: