- 1
- I puta mai ano te kupu a Ihowa ki a au, i mea,
- 2
- E te tama a te tangata, anga atu to mata ki nga tamariki a Amono ka poropiti i te he mo ratou.
- 3
- Mea atu hoki ki nga tamariki a Amono, Whakarongo mai ki te kupu a te Ariki a Ihowa; Ko te kupu tenei a te Ariki a Ihowa; Na, kua mea mai na koe, Ha! ki toku wahi tapu i te mea e whakapokea ana; ki te oneone ano o Iharaira i te mea ka ururuatia, ki te whare ano hoki o Hura i a ratou ka riro ki te whakaraunga;
- 4
- Mo reira, tenei ahau te hoatu nei i a koe hei kāinga ki nga tamariki o te rawhiti, a ka whakaturia e ratou o ratou whare kingi ki a koe, ka hangā ano hoki o ratou kāinga ki a koe: ka pau i a ratou o hua, ka inumia e ratou to waiu.
- 5
- Ka meinga ano e ahau a Rapa hei kāinga kamera, me nga tamariki ano a Amono hei tapapatanga hipi: a ka mohio koutou ko Ihowa ahau.
- 6
- Ko te kupu hoki tenei a te Ariki a Ihowa, Na, kua papaki o ringa, kua takahi to waewae, pau katoa to ngakau ki te koa, he kino nou ki te whenua o Iharaira.
- 7
- Mo reira, na, ka whakamarokia atu toku ringaringa ki a koe, a ka tukua atu koe e ahau hei pahuatanga ma nga iwi, ka hatepea atu ano hoki koe e ahau i roto i nga iwi, ka hunā ano koe e ahau i roto i nga whenua, ka whakangaromia ano koe; a ka mohio koe ko Ihowa ahau.
- 8
- Ko te kupu tenei a te Ariki a Ihowa, Na, kua mea nei a Moapa raua ko Heira, Nana, kua rite te whare o Hura ki nga iwi katoa;
- 9
- Mo reira tenei ahau te mea nei kia takoto kau te taha o Moapa, te takotoranga atu i nga pa, i ona pa i tona pito whakamutunga mai, te kororia o te whenua, a Pete-ietemoto, a Paara-meono, a Kiriataima,
- 10
- Ma nga tamariki o te rawhiti, ratou ko nga tamariki a Amono; ka tukua atu ano ratou e ahau hei kāinga tupu, e kore ai e maharatia nga tamariki a Amono i roto i nga iwi.
- 11
- Ka mahia ano hoki e ahau nga whakarite whakawa ki a Moapa; a ka mohio ratou ko Ihowa ahau.
- 12
- Ko te kupu tenei a te Ariki a Ihowa; na, kua mahia na e Eroma he hē mo te whare o Hura, kua rapu utu, kua nui ta ratou kino, kua rapu utu i a ratou;
- 13
- Mo reira ko te kupu tenei a te Ariki a Ihowa; Ka whakamarokia atu ano toku ringaringa ki a Eroma, ka hatepea atu ano hoki nga tangata me nga kararehe o reira; ka meinga ano e ahau te ritenga atu o Temana hei ururua, ka hinga ano hoki nga tangata o Rerana i te hoari.
- 14
- Ka tukua atu ano e au taku rapu utu ki Eroma, ma taku iwi, ma Iharaira e mahi; ka meatia ano e ratou i roto i Eroma nga mea e rite ana ki taku riri, ki taku weriweri; a ka mohio ratou ki taku rapu utu, e ai ta te Ariki ta Ihowa.
- 15
- Ko te kupu tenei a te Ariki a Ihowa; Na, he rapu utu te mahi a nga Pirihitini, he kino te ngakau i rapu utu ai ratou, he mea kia ngaro, he mauahara no mua;
- 16
- Mo reira ko te kupu tenei a te Ariki a Ihowa; Nana, ka whakamarokia atu e ahau toku ringaringa ki runga ki nga Pirihitini, a ka hatepea atu e ahau nga Keretimi, ka hunā ano e ahau nga morehu o te taha tai.
- 17
- He nui hoki nga rapunga utu e mahia e ahau ki a ratou, weriweri rawa nga whakatupehupehunga atu; a ka mohio ratou ko ahau a Ihowa, ina tukua atu e ahau taku rapu utu ki a ratou.
Address: 
Phone: 
Email: