- 1
- I pa iho te ringa o Ihowa ki runga ki a au, a kawea ana ahau, he meatanga na to Ihowa Wairua, tukua iho ana ahau e ia ki waenganui o te raorao; na, ki tonu a reira i te wheua.
- 2
- Katahi ka whakahaereerea ahau e ia ki te taha o aua wheua, a taka noa, taka noa; na, he tini whakaharahara i runga i te mata o te raorao, nana, he maroke noa atu.
- 3
- Na, ko tana meatanga mai ki a au, E te tama a te tangata, e ora ranei enei wheua? Ano ra atu ko ahau, E mohio ana koe, e te Ariki e Ihowa.
- 4
- Na, ko tana meatanga mai ki a au, Poropiti atu ki enei wheua, mea atu ki a ratou, E nga wheua maroke, whakarongo ki te kupu a Ihowa.
- 5
- Ko te kupu tenei a te Ariki a Ihowa ki enei wheua, Tenei au te kawe atu nei i te manawa ki roto ki a koutou, a ka ora koutou.
- 6
- Ka tukua iho ano e ahau he uaua ki runga ki a koutou, ka takaia atu ano hoki koutou ki te kikokiko, ka hipokina koutou ki te kiri, ka hoatu ano e ahau he manawa ki roto ki a koutou, a ka ora koutou, a ka mohio koutou ko ahau a Ihowa.
- 7
- Na, poropititia ana e ahau te mea i whakahaua mai ki a au; a i a au e poropiti ana, na, ko tetahi haruru, na, ko te oraoranga, a whakatata mai ana nga wheua, tona wheua ki tona wheua.
- 8
- Na, taku tirohanga atu, nana, kua tae nga uaua me te kikokiko ki runga ki a ratou, a i waho ake ko te kiri hei hipoki mo ratou: kahore ia he manawa i roto i a ratou.
- 9
- Na, ko tana meatanga mai ki a au, Poropiti atu ki te hau, poropiti atu, e te tama a te tangata, mea atu hoki ki te hau, Ko te kupu tenei a te Ariki a Ihowa; Haere mai, e te manawa, i nga hau e wha, ha atu ki tenei hunga kua oti nei te patu, kia ora ai ratou.
- 10
- Katahi ka poropititia atu e ahau te mea i whakahaua mai ki a au; na, ko te taenga mai o te manawa ki roto ki a ratou, kua ora, tu ana o ratou waewae ki runga, he ope nui whakaharahara.
- 11
- Na, ko tana meatanga mai ki a au, E te tama a te tangata, enei wheua ko te whare katoa o Iharaira: nana, kei te ki ake ratou, Kua maroke o tatou wheua, kua ngaro ta tatou i tumanako atu ai; kua motuhia atu tatou.
- 12
- Mo reira poropiti atu, ki atu ki a ratou, Ko te kupu tenei a te Ariki a Ihowa; Nana, e toku iwi, ka whakapuaretia e ahau o koutou urupa, ka whakaputaina ake ano koutou i roto i o koutou urupa, ka kawea atu ano koutou e ahau ki te oneone o Iharaira.
- 13
- A ka mohio koutou ko Ihowa ahau, ina whakapuaretia e ahau o koutou urupa, e toku iwi, a ka whakaputaina ake koutou e ahau i roto i o koutou urupa,
- 14
- Ina tukua atu e ahau toku wairua ki roto ki a koutou, ina ora koutou, ina whakanohoia koutou e ahau ki to koutou oneone: ko reira koutou mohio ai naku na Ihowa i korero, naku ano i mahi, e ai ta Ihowa.
- 15
- I puta mai ano te kupu a Ihowa ki a au, i mea,
- 16
- Na, e koe, e te tama a te tangata, tikina atu tetahi rakau māu, tuhituhia iho, He mea mo Hura, mo ona hoa ano hoki, mo nga tamariki a Iharaira: katahi ka tikina atu tetahi atu rakau e koe, tuhituhia iho, He mea mo Hohepa, ko te rakau a Eperaima, mo ona hoa ano hoki mo te whare katoa o Iharaira.
- 17
- Katahi ka huihuia raua e koe, tetahi ki tetahi; a hei rakau kotahi raua i roto i to ringaringa.
- 18
- Na, ki te korero mai nga tamariki a toku iwi ki a koe, ki te mea mai, E kore ianei e whakaaturia mai e koe ki a matou he aha te tikanga o enei mea āu?
- 19
- Mea atu ki a ratou, Ko te kupu tenei a te Ariki a Ihowa, Nana, ka mau au ki te rakau a Hohepa, ki tera i te ringaringa o Eperaima, ki ona hoa ano, ki nga iwi o Iharaira, a ka huihuia atu ki tera, ara, ki te rakau a Hura, ka meinga hoki raua e ahau hei rakau kotahi, a, ka kotahi tonu raua i roto i toku ringa.
- 20
- Na, hei roto ano i to ringaringa nga rakau e tuhituhia e koe ki to ratou aroaro.
- 21
- Mea atu ano ki a ratou, Ko te kupu tenei a te Ariki a Ihowa; Nana, ka tangohia mai e ahau nga tamariki a Iharaira, i roto i nga iwi i haere atu nei ratou, ka kohikohia mai ano ratou i tetahi taha, i tetahi taha, ka kawea atu ano hoki ratou ki to ratou oneone.
- 22
- Ka meinga ano ratou e ahau hei iwi kotahi ki te whenua ki runga ki nga maunga o Iharaira; kotahi tonu ano hoki te kingi hei kingi mo ratou katoa; kore ake o ratou iwi e rua i muri nei, hore rawa ano hoki o ratou wehenga a muri nei kia rua nga kingitanga.
- 23
- Kore ake ano hoki o ratou pokenga i ā ratou whakapakoko, i ā ratou mea whakarihariha, i ā ratou kino katoa: engari ka whakaorangia mai ratou e ahau i o ratou nohoanga katoa, i nga wahi i hara ai ratou, ka purea ano hoki ratou e ahau: ko ratou hoki hei iwi moku, a ko ahau hei Atua mo ratou.
- 24
- Ko taku pononga hoki ko Rawiri hei kingi mo ratou; kotahi tonu hoki te hepara mo ratou katoa: ka haere hoki ratou i runga i aku whakariteritenga, ka puritia ano aku tikanga e ratou, ka mahia.
- 25
- A ka noho ratou ki te whenua i hoatu e ahau ki taku pononga ki a Hakopa, ki te wahi i noho ai o koutou mātua; ka noho ano ratou ki reira, ratou, a ratou tamariki, me nga tamariki ano a a ratou tamariki, a ake ake ake: a, ko taku pononga ko Rawiri hei rangatira mo ratou, a ake ake ake.
- 26
- Ka whakaritea ano e ahau he kawenata mo te rongo mau ki a ratou; hei kawenata mau tonu tena ki a ratou, ka whakanohoia ano ratou e ahau, ka whakanuia ano hoki ratou, ka whakaturia ano e ahau toku wahi tapu ki waenganui i a ratou, a ake ake ake.
- 27
- Ki a ratou ano hoki toku tapenakara: a ko ahau hei Atua ki a ratou, ko ratou ano hei iwi moku.
- 28
- A ka mohio nga tauiwi kei te whakatapu ahau a Ihowa i a Iharaira, i te mea kei waenganui nei toku wahi tapu i a ratou, a ake ake ake.
Address: 
Phone: 
Email: