- 1
- Katahi ahau ka whakahokia mai e ia na te ara o te kuwaha, o to waho wahi tapu e anga ana ki te rawhiti; na, kua oti te tutaki.
- 2
- Na ko te meatanga mai a Ihowa ki a au, Tenei kuwaha he mea tutaki tonu, e kore e whakatuwheratia, e kore ano tetahi tangata e tomo ma konei: no te mea i na konei atu a Ihowa Atua o Iharaira; na reira i tutakina ai.
- 3
- Mo te rangatira tenei; te rangatira, ko ia e noho ki konei ki te kai taro ki te aroaro o Ihowa, me tomo atu na te ara o te whakamahau o taua kuwaha, a ka puta atu ki waho, me na to reira ara ano.
- 4
- Katahi ahau ka kawea atu e ia na te ara o te kuwaha ki te nota ki te aronga mai o te whare: na, taku tirohanga atu, nana, kua ki te whare o Ihowa i te kororia o Ihowa, a takoto tapapa ana ahau.
- 5
- Na, ko te kianga mai a Ihowa ki a au, E te tama a te tangata anga mai to ngakau, titiro mai hoki o kanohi, whakarongo ano o taringa, ki nga mea katoa e korero ai ahau ki a koe mo nga tikanga katoa o te whare o Ihowa, mo nga ture katoa ano o reira; ata mahara ano ki te tomokanga atu ki te whare, ki nga putanga katoa ano hoki i roto i te wahi tapu.
- 6
- Me ki atu ano e koe ki te hunga whakakeke, ki te whare o Iharaira, Ko te kupu tenei a te Ariki a Ihowa, Kati ra a koutou mea whakarihariha, e te whare o Iharaira.
- 7
- Kua kawea na hoki e koutou nga tau-tangata, he hunga kihai i kotia te ngakau, kihai i kotia te kikokiko, ki roto ki toku wahi tapu noho ai, hei whakapoke mo reira, ara, mo toku whare, i te mea e whakaherea ana e koutou taku taro, te ngako, me te toto, a whakatakā ana e ratou taku kawenata, he meatanga ki ā koutou mea whakarihariha katoa.
- 8
- Kihai ano i mau i a koutou te tiaki o aku mea tapu: heoi whakaritea ana e koutou a koutou ake kai tiaki mo aku mea i roto i toku wahi tapu.
- 9
- Ko te kupu tenei a te Ariki a Ihowa; Kaua tetahi tautangata kihai i kotia te ngakau, kihai i kotia te kikokiko, e tomo ki roto ki toku wahi tapu, o nga tautangata katoa i roto i nga tamariki a Iharaira.
- 10
- Na, nga Riwaiti i mawehe atu ra i a au, i te kotititanga ketanga atu o Iharaira, i a ratou i kotiti ke atu i a au, i whai i ā ratou whakapakoko; ka wahā ano e ratou ta ratou kino.
- 11
- Otiia hei minita ano ratou i roto i toku wahi tapu, hei tiaki i nga kuwaha o te whare, hei minita ki te whare: ma ratou e patu te tahunga tinana me te patunga tapu a te iwi, me tu ano ratou ki to ratou aroaro minita ai ki a ratou.
- 12
- Ta ratou i mua he minita ki a ratou i te aroaro o o ratou whakapakoko, a meinga ana e ratou te whare o Iharaira kia taka ki te kino; na reira i ara ai toku ringaringa ki a ratou, e ai ta te Ariki ta Ihowa; ka wahā ano e ratou to ratou kino.
- 13
- E kore ano ratou e whakatata mai ki a au, hei tohunga maku, e kore ano e whakatata mai ki tetahi o aku mea tapu i te wahi tapu rawa: engari ka mau to ratou whakama ki a ratou, me a ratou mea whakarihariha i mahia e ratou.
- 14
- Ka meinga ano ia ratou e ahau hei kai tiaki mo nga mea o te whare, mo nga mahi katoa o reira, mo nga mea katoa ano hoki e meatia ki reira.
- 15
- Engari era tohunga nga Riwaiti, nga tamariki a Haroko, i tiaki nei i nga mea o taku wahi tapu, i nga tamariki a Iharaira i kotiti ke atu ra i a au, ko ratou e whakatata mai ki a au, ki te minita ki a au, ka tu ano ratou ki toku aroaro hei whakahere i te ngako, i te toto, ki a au, e ai ta te Ariki ta Ihowa:
- 16
- Ko ratou e tomo ki roto ki toku wahi tapu, ko ratou ano e whakatata mai ki taku tepu hei minita ki a au, ma ratou ano aku mea e tiaki.
- 17
- A, ka tomo ratou ki roto ki nga kuwaha o to roto marae, hei te kakahu rinena he kakahu mo ratou; kaua hoki tetahi mea huruhuru e mau ki a ratou, i a ratou e minita ana, i roto i nga kuwaha o to roto marae, i roto ano hoki i te whare.
- 18
- Mo o ratou māhunga ko nga potae rinena, mo o ratou hope ko nga tarautete rinena, kaua e whitikiria e ratou he mea e heke ai te werawera.
- 19
- Na, ka haere atu ratou ki to waho marae, ki te marae i waho ki te iwi, me unu o ratou kakahu i minita ai ratou, ka waiho ki nga ruma tapu, me kakahu ano hoki etahi atu kakahu; kaua hoki te iwi e whakatapua e ratou ki o ratou kakahu.
- 20
- Kaua ano ratou e heu i o ratou māhunga, kaua ano hoki nga makawe e whakatupuria kia roa, ko te kutikuti anake mo o ratou māhunga.
- 21
- Kaua ano tetahi tohunga e inu waina, ina haere ratou ki to roto marae.
- 22
- Kaua ano ratou e tango i te pouaru, i te mea ranei i whakaherea, hei wahine ma ratou; na, ta ratou e tango ai ko tetahi o nga wahina o nga uri o te whare o Iharaira, ko tetahi pouaru ranei a tetahi tohunga.
- 23
- Me whakaako ano e ratou toku iwi ki te wehe i te tapu, i te noa; me mea ano kia mohiotia e ratou te poke me te ma.
- 24
- I te tautohetohenga ano hoki me tu ratou hei whakarite i te whakawa; kia rite ano a ratou whakaritenga ki aku whakaritenga: me pupuri ano e ratou aku ture, me aku tikanga i roto i aku huihuinga katoa; me whakatapu ano e ratou aku hapati.
- 25
- Kaua ano ratou e tae atu ki te tupapaku whakapoke ai i a ratou; e whakapoke ano ia ratou i a ratou ano mo te pāpā, mo te whaea, mo te tamaiti, mo te tamahine, mo te tuakana, (teina ranei,) mo te tuahine kahore nei ona tahu.
- 26
- A ka oti ia te pure, me tatau kia whitu nga ra mona.
- 27
- Na, te ra e haere ai ia ki roto ki te wahi tapu, ki to roto marae, ki te minita i roto i te wahi tapu, me whakahere e ia tana whakahere hara, e ai ta te Ariki ta Ihowa.
- 28
- A hei kāinga tupu tena ki a ratou: ko ahau hei kāinga tupu mo ratou, kaua hoki tetahi kāinga e hoatu ki a ratou i roto i a Iharaira: ko ahau hei kāinga mo ratou.
- 29
- Ko te whakahere toto-kore, ko te whakahere hara, ko te whakahere mo te he, hei kai ma ratou; ma ratou ano hoki nga mea katoa i oti rawa mai i roto i a Iharaira.
- 30
- Na, nga tuatahi o nga matamua katoa o nga mea katoa, me nga whakahere katoa o a koutou tini whakahere katoa, ma nga tohunga; me te tuatahi ano o ta koutou paraoa pokepoke, me hoatu e koutou ki te tohunga, kia meinga ai e ia te manaakitanga kia tau ki runga ki to whare.
- 31
- Kaua te tohunga e kai i te mea i mate maori, i te mea ranei i haea, ahakoa manu, ahakoa kararehe.
Address: 
Phone: 
Email: