- 1
- Ko te kupu tenei a te Ariki a Ihowa; Me tutaki te kuwaha o to roto marae e anga ana ki te rawhiti i nga rangi mahi e ono; kia tuwhera ia i te hapati, kia tuwhera ano i te ra e kowhiti ai te marama.
- 2
- A ka tomo mai te rangatira i waho, —te ara, ko to te whakamahau o taua kuwaha, ka tu ai ki te pou o te kuwaha; katahi ka mahia e nga tohunga tana tahunga tinana, me ana whakamarietanga, hei te paepae ano o te kuwaha he koropikotanga mana: katahi ia ka puta atu ki waho; kauaka ia te kuwaha e tutakina, a ahiahi noa.
- 3
- Hei te tatau ano o tenei kuwaha he koropikotanga ma te iwi o te whenua i nga hapati, i nga kowhititanga marama, ki te aroaro o Ihowa.
- 4
- Na, te tahunga tinana e whakaherea e te rangatira ki a Ihowa i te ra hapati, e ono nga reme he mea koha-kore, he hipi toa, he mea koha-kore.
- 5
- Te whakahere toto-kore, kotahi te hipi toa kia kotahi te epa, a to nga reme whakahere toto-kore, ko te mea e taea e ia te homai; kotahi te epa, kia kotahi ano hini hinu.
- 6
- Na, i te ra e kowhiti ai te marama ko tetahi kuao puru, he mea koha-kore, e ono nga reme, kotahi te hipi toa, he mea koha-kore.
- 7
- Kia rite mai ano i a ia he whakahere toto-kore, kotahi te puru, kia kotahi te epa; ka kotahi te hipi toa, kia kotahi te epa; to nga reme, ko ta tona ringa e tae atu ai; kotahi te epa kia kotahi ano hini hinu.
- 8
- Na, e tomo te rangatira ki roto, me haere ia na te ara o te whakamahau o te kuwaha: kei to reira ara ano he haerenga atu mona.
- 9
- Na, e tomo mai te iwi o te whenua ki te aroaro o Ihowa i nga hakari nui, te tangata i tomo mai na te ara o te kuwaha ki te nota ki te koropiko, kei te ara o te kuwaha ki te tonga, he putanga atu mona; a te tangata i tomo mai na te ara o te kuwaha ki te tonga, kei te ara o te kuwaha ki te nota he putanga atu mona: kaua ia e hoki atu na te ara o te kuwaha i tomo mai ai ia; engari me haere atu ia i tona ritenga atu.
- 10
- Na, i waenganui i a ratou ko te rangatira; ka tomo ratou ki roto, ka tomo ano ia; a ka puta mai ratou ki waho, ka puta mai ano ia.
- 11
- Na, te whakahere toto-kore i nga hakari, i nga huihuinga nui, kotahi te epa ki te puru, kotahi te epa ki te hipi toa; a, to nga reme, ko te mea e taea e ia te homai, kia kotahi te hini hinu ki te epa.
- 12
- Na, e mahia mai e te rangatira he tahunga tinana, he mea hihiko noa mai, etahi whakamarietanga ranei, he mea hihiko noa mai, hei mea ki a Ihowa, me whakatuwhera te kuwaha e anga ana ki te rawhiti ki a ia, a ka mahia e ia tana tahunga tinana, me ana whakamarietanga, kia rite ki tana mahinga i te ra o te hapati. Katahi ia ka puta ki waho, a ka tutakina te kuwaha ina puta mai ia.
- 13
- Me mahi e koe he tahunga tinana ki a Ihowa i tenei ra, i tenei ra, he reme, ki te tau tahi, ki te koha-kore: me mahi e koe i tenei ata, i tenei ata.
- 14
- Me tapiri ano e koe taua mea ki te whakahere toto-kore i tenei ata, i tenei ata, te whakaono o nga wahi o te epa, me te whakatoru o nga wahi o te hini hinu, hei whakaranu ki te paraoa, he whakahere toto-kore ki a Ihowa, he mea e tūturu ana tona tikanga, a ake ake ake.
- 15
- Ina, me mahi e ratou te reme, me te whakahere toto-kore, me te hinu i tenei ata, i tenei ata, hei tahunga tinana e tūturu tonu ana.
- 16
- Ko te kupu tenei a te Ariki a Ihowa; Ki te homai e te rangatira tetahi mea homai noa mai ki tetahi o ana tamariki, ka riro tera i ana tamariki; mo ratou tera, a tuku iho, tuku iho.
- 17
- Tena ko tenei ka hoatu tetahi wahi o tona kāinga tupu ki tetahi o ana pononga, mana tera, a taea noatia te tau haere noa; katahi ka hoki ki te rangatira: mo ana tamariki ano tona wahi tupu hei wahi mo ratou.
- 18
- Kaua ano te rangatira e tango i tetahi wahi o to te iwi kāinga tupu, he tukino nana, he pei atu i a ratou i o ratou wahi: me homai e ia he wahi mo ana tamariki i roto i tona wahi ake; kei marara noa atu toku iwi i tona wahi, i tona wahi.
- 19
- Katahi ahau ka kawea atu e ia ki roto, i tika na te tomokanga atu i te taha o te kuwaha ki nga ruma tapu o nga tohunga, ki era e anga ana whaka-te-nota: na, ko tetahi wahi i reira i nga taha e rua whaka-te-hauauru.
- 20
- Na, ko tana meatanga mai ki a au, Ko te wahi tenei e kohuatia ai e nga tohunga te whakahere mo te he, me te whakahere hara, ka tunua ano e ratou ki konei te whakahere toto-kore; kei whakaputaina mai ki to waho marae, a tapu tonu iho te iwi.
- 21
- Katahi ahau ka kawea atu e ia ki to waho marae; a ka meinga e ia kia tika na nga kokonga e wha o te marae; na, ko tetahi marae i tetahi kokonga, i tetahi kokonga o te marae.
- 22
- He marae kei nga kokonga e wha o te marae, he mea hono mai, e wha tekau nga whatianga te roa, e toru tekau te whanui: enei kokonga e wha, rite tonu te nui.
- 23
- Na, he rarangi whare kei aua marae, a taka noa, i aua marae e wha, a taka noa; i mahia ano hoki etahi wahi mo nga kohua i raro i nga rarangi, a taka noa.
- 24
- Na, ko tana meatanga mai ki a au, Enei wahi, mo nga kai mahi o nga kohua, ko nga wahi e kohuatia ai e nga minita o te whare te patunga tapu a te iwi.
Address: 
Phone: 
Email: