- 1
- Na, ko nga ingoa enei o nga hapu. Kei te takotoranga atu i te pito ki te nota ki te taha o te huarahi ki Heterono, i te mea ka haere ki Hamata, kei Hatara-enana, kei te rohe ki Ramahiku ki te taha ki te nota, tae noa ki te taha o Hamata; (ko ona taha hoki enei ki te rawhiti, ki te hauauru;) he wahi mo Rana.
- 2
- Na, hei te taha o te rohe ki a Rana, hei te takotoranga atu i te taha ki te rawhiti whaka-te-taha ki te hauauru, he wahi mo Ahere.
- 3
- A hei te taha o te rohe ki a Ahere hei te takotoranga atu i te taha ki te rawhiti whaka-te-taha ki te hauauru he wahi mo Napatari.
- 4
- Hei te taha ano o te rohe ki a Napatari te takotoranga atu i te taha ki te rawhiti whaka-te-taha ki te hauauru he wahi mo Manahe.
- 5
- Hei te taha ano o te rohe ki a Manahe, hei te takotoranga atu i te taha ki te rawhiti whaka-te-taha ki te hauauru, he wahi mo Eperaima.
- 6
- Hei te taha ano o te rohe ki a Eperaima, hei te takotoranga atu i te taha ki te rawhiti whaka-te-hauauru, he wahi mo Reupene.
- 7
- Hei te taha ano o te rohe ki a Reupene, hei te takotoranga i te taha ki te rawhiti whaka-te-hauauru, he wahi mo Hura.
- 8
- Na, te whakahere e homai e koutou, hei te taha tera o te rohe ki a Hura, hei te takotoranga atu i te taha ki te rawhiti whaka-te-hauauru, kia rua tekau ma rima mano kakaho te whanui, kia rite te roa ki to tetahi o era atu wahi, i te takotoranga atu i te rawhiti whaka-te-hauauru: a hei waenganui te wahi tapu i taua wahi.
- 9
- Te whakahere e homai e koutou ki a Ihowa kia rua tekau ma rima mano te roa, kia kotahi tekau mano te whanui.
- 10
- Na, mo ratou, mo nga tohunga, tenei whakahere tapu; ki te taha ki te nota e rua tekau ma rima mano te roa, a ki te taha ki te hauauru kotahi tekau mano te whanui, ki te taha ki te rawhiti kotahi tekau mano te whanui, ki te taha ki te tonga e rua tekau ma rima mano te roa: a ki waenganui o reira te wahi tapu o Ihowa.
- 11
- Mo nga tohunga tera, mo nga tamariki a Haroko, kua oti te whakatapu, mo te hunga i tiaki i aku mea, a kihai i kotiti ke atu i te kotititanga ketanga atu a nga tamariki a Iharaira, kihai i pera me nga Riwaiti i kotiti ke ra.
- 12
- Na, hei wahi tapu rawa tenei whakahere, te whenua ka homai nei ki a ratou i te taha o to nga Riwaiti.
- 13
- Na, i te ritenga ake o te rohe ki nga tohunga, kia rua tekau ma rima mano te roa o to nga Riwaiti; kia kotahi tekau nga mano te whanui, te roa katoa e rua tekau ma rima mano; te whanui kotahi tekau nga mano.
- 14
- Kaua ano hoki tetahi wahi o reira e hokona, kaua ano nga hua matamua o te whenua e whakawhitiwhitia, e whakariroia ketia ranei: he tapu hoki a reira ki a Ihowa.
- 15
- Na, nga mano e rima o te whanui i mahue i te ritenga ake o nga mano e rua tekau ma rima, hei wahi noa tera mo te pa, hei nohoanga, hei wahi i waho ake o te pa; hei waenganui ano o reira te pa.
- 16
- Ko ona roa ano enei; to te taha ki te nota e wha mano e rima rau, to te taha ki te tonga e wha mano e rima rau, to te taha ki te rawhiti e wha mano e rima rau, to te taha ki te hauauru e wha mano e rima rau.
- 17
- Na, a waho ake o te pa, whaka-te-nota e rua rau e rima tekau, whaka-te-tonga e rua rau e rima tekau, whaka-te-rawhiti e rua rau e rima tekau, whaka-te-hauauru e rua rau e rima tekau.
- 18
- Na, te toenga, tona roa i te ritenga ake o te wahi tapu i whakaherea, kotahi tekau nga mano ki te rawhiti, kotahi tekau nga mano ki te hauauru: na, tera wahi hei te ritenga ake ano o te wahi tapu i whakaherea; hei kai ano ona hua ma nga kai mahi o te pa.
- 19
- Na, nga kai mahi o te pa, me haere mai ratou i nga hapu katoa o Iharaira ki te mahi ki reira.
- 20
- Kia rua tekau ma rima nga mano tetahi taha o te whakahere katoa, kia rua tekau ma rima mano ano tetahi taha: kia wha nga taha o te whakahere tapu e whakaherea e koutou, he mea huihui atu ki te wahi mo te pa.
- 21
- Na, mo te rangatira te toenga i tetahi taha i tetahi taha o te whakahere tapu, o te wahi ano i te pa, i te ritenga ake ano o nga mano e rua tekau ma rima i whakaherea nei, i te taha ki te rawhiti, i te taha ano ki te hauauru, i te ritenga ake ano o nga mano e rua tekau ma rima whaka-te-taha ki te hauauru, i te ritenga ake ano o nga wahi mo te rangatira: na, ko tena hei whakahere tapu; a hei waenganui ano o reira to te whare wahi tapu.
- 22
- Na, te takotoranga atu i te wahi i nga Riwaiti, i te wahi ano i te pa, tera i waenganui, to te rangatira, i te takiwa o te rohe ki a Hura o te rohe ano ki a Peniamine, mo te rangatira tera.
- 23
- Na, era atu o nga hapu, i te taha ki te rawhiti, tae noa ki te taha ki te hauauru, kia kotahi te wahi mo Peniamine.
- 24
- A, i te taha o to Peniamine, i te taha ki te rawhiti, tae noa ki te taha ki te hauauru, kia kotahi te wahi mo Himeona.
- 25
- Kei te taha ano o ta Himeona, kei te taha ki te rawhiti, tae noa ki te taha ki te hauauru, he wahi mo Ihakara.
- 26
- Kei te taha ano o ta Ihakara, kei te taha ki te rawhiti, tae noa ki te taha ki te hauauru, he wahi mo Hepuruna.
- 27
- Kei te taha ano o ta Hepuruna, kei te taha ki te rawhiti, tae noa ki te taha ki te hauauru, he wahi mo Kara.
- 28
- Na, i te taha o ta Kara, i te taha ki te tonga whaka-te-tonga ka takoto atu te rohe i Tamara, tae noa ki nga wai o te totohe i Karehe, ki te awa ki te moana nui.
- 29
- Ko te whenua tenei e wehea e koutou hei wahi tupu mo nga hapu o Iharaira, ko o ratou wahi ano enei, e ai ta te Ariki ta Ihowa.
- 30
- Ko nga putanga atu ano enei o te pa i te taha ki te nota, e wha mano e rima rau te roa.
- 31
- Nga kuwaha ano o te pa, nga ingoa, ko o nga hapu o Iharaira: e toru nga kuwaha o te taha ki te nota; tetahi ko te kuwaha o Reupene, tetahi ko te kuwaha o Hura, tetahi ko te kuwaha o Riwai.
- 32
- A, i te taha ki te rawhiti e wha nga mano e rima nga rau: e toru ano nga kuwaha; tetahi ko te kuwaha o Hohepa, tetahi ko te kuwaha o Peniamine, tetahi ko te kuwaha o Rana.
- 33
- Na, te taha ki te tonga e wha mano e rima rau te roa: e toru ano nga kuwaha; tetahi ko te kuwaha o Himeona, tetahi ko te kuwaha o Ihakara, tetahi ko te kuwaha o Hepuruna.
- 34
- I te taha ki te hauauru e wha mano e rima rau, me o ratou kuwaha e toru ano, tetahi ko te kuwaha o Kara, tetahi ko te kuwaha o Ahere, tetahi ko te kuwaha o Napatari.
- 35
- Kotahi tekau ma waru nga mano ki te taiawhiotia: na, te ingoa o te pa i taua rangi tonu iho, Ko Ihowa kei reira.
Address: 
Phone: 
Email: