- 1
- I karanga ano ia ki oku taringa, he nui te reo, i mea, Kia whakatata mai nga kai tirotiro o te pa, me tana patu wawahi ano i te ringa o tenei, o tenei.
- 2
- Na, tokoono nga tangata e haere mai ana i te ara o to runga kuwaha e anga ana ki te nota, me tana patu wawahi ano i te ringa o tenei, o tenei: tetahi tangata ano i roto i a ratou he rinena tona kakahu, he pounamu na te kai tuhituhi ano hoki i tona taha. Heoi haere mai ana ratou, tu ana i te taha o te aata parahi.
- 3
- Na, te kororia o te Atua o Iharaira, tona taunga nei i mua i runga i te kerupa, kua kake ki runga ki te korupe o te whare. Katahi tera ka karanga ki te tangata he rinena nei tona kakahu, ki tera kei tona taha nei te pounamu a te kai tuhituhi;
- 4
- I mea hoki a Ihowa ki a ia, E tika na waenganui i te pa, na waenga i Hiruharama, ka whakapiri i te tohu ki nga rae o nga tangata e aue ana, e tangi ana, he whakaaro ki nga mea whakarihariha katoa e mahia ana i waenganui o konei.
- 5
- I mea ano ia ki era atu, me te whakarongo atu ano ahau, E tika na waenganui o te pa i muri i a ia patu ai: kaua o koutou kanohi e manawapa, kaua e tohungia.
- 6
- Patua kia ngaro te kaumatua, te taitamariki, te kotiro, te kohungahunga, me nga wahine; kaua ia e tata atu ki tetahi tangata i a ia nei te tohu; me timata ano ki toku wahi tapu. Na, kua timata ratou ki nga kaumatua i te aronga o te whare.
- 7
- I mea ano ia ki a ratou, Whakapokea te whare, whakakīa ano hoki nga marae ki nga tupapaku: haere atu. Heoi haere ana ratou, na, kei te patu ratou i roto i te pa.
- 8
- Na, i a ratou e patu ana i a ratou, a ka mahue ahau, ka takoto tapapa atu ahau, ka karanga, ka mea, Aue, e te Ariki, e Ihowa! ka whakangaromia ranei e koe nga morehu katoa o Iharaira, i te mea ka ringitia atu nei e koe to weriweri ki runga ki Hiruharama?
- 9
- Ano ra ko ia ki a au, Ka nui te he o te whare o Iharaira raua ko Hura, nui whakaharahara, kua ki hoki te whenua i te toto, kua ki ano te pa i te whanoke: e mea ana hoki ratou, Kua mahue te whenua i a Ihowa, e kore ano a Ihowa e kite.
- 10
- Na, ahau ano hoki, e kore toku kanohi e manawapa, e kore ano ahau e tohu; ka hoatu e ahau te utu o to ratou ara ki runga ki to ratou māhunga.
- 11
- Na, te tangata i te kakahu rinena, tera kei tona taha ra te pounamu mangumangu, korerotia atu ana e ia taua mea, i ki ia, Kua oti i a au tau whakahau ra ki a au.
Address: 
Phone: 
Email: