- 1
- Na, i te tuatahi o nga tau o Hairuha kingi o Pahia, ka whakamanā te kupu a Ihowa i whakapuakina e Heremaia, ka whakaohokia e Ihowa te wairua o Hairuha kingi o Pahia. Na, ka tukua atu e tera tana karanga puta noa i tona kingitanga; he mea tuhituhi ano nana; i mea ia,
- 2
- Ko te kupu tenei a Hairuha kingi o Pahia, Kua oti nga kingitanga katoa o te whenua te homai ki a au e Ihowa, e te Atua o nga rangi; kua whakahaua mai ano hoki ahau e ia kia hangā he whare mona ki Hiruharama, ki tera i Hura.
- 3
- Ko wai tenei o koutou o tona iwi katoa? Ko tona Atua hei hoa mona; kia haere atu hoki ia ki Hiruharama, ki tera i Hura, ki te hanga i te whare o Ihowa Atua o Iharaira, ko ia nei te Atua, kei Hiruharama ano ia.
- 4
- Na, ki te mea kua mahue tetahi ki te wahi i noho ai ia, ma nga tangata o tona wahi ia e whakaneke ake ki te hiriwa, ki te koura, ki te taonga, ki nga kararehe, hei tapiri mo nga mea homai noa mo te whare o te Atua e noho nei ki Hiruharama.
- 5
- Na, ka whakatika ake nga upoko o nga mātua o Hura raua ko Peniamine, ratou ko nga tohunga, ko nga Riwaiti, ko te hunga katoa i whakaohokia nei o ratou wairua e te Atua, ka mea ki te haere ki te hanga i te whare o Ihowa e noho nei ki Hiruharama.
- 6
- Na, ka whakakahangia o ratou ringa e nga tangata katoa i tetahi taha, i tetahi taha o ratou, ka meatia mai nga oko hiriwa, he koura, he taonga, he kararehe, me nga mea utu nui, he mea tapiri mai ki nga mea homai noa katoa.
- 7
- A, i whakaputaina mai ano ki waho e Kingi Hairuha nga oko o te whare o Ihowa i kawea atu nei e Nepukaneha i Hiruharama, i meatia atu nei e ia ki roto ki te whare o ona atua.
- 8
- I whakaputaina mai ano enei e Hairuha kingi o Pahia, he mea mea mai na Mitirerata na te kai tiaki taonga, taua atu ana e ia ki a Hehepatara rangatira o Hura.
- 9
- Ko te maha ano tenei o aua mea: E toru tekau nga peihana koura, kotahi mano nga peihana hiriwa, e rua tekau ma iwa nga maripi,
- 10
- E toru tekau nga hāka koura; nga hāka hiriwa, he ahua ke, e wha rau kotahi tekau; etahi oko ke, kotahi mano.
- 11
- Nga oko katoa, nga mea koura, nga mea hiriwa, e rima mano e wha rau. Ko enei katoa i kawea atu e Hehepatara i te kawenga atu o nga whakarau i Papurona ki Hiruharama.
Address: 
Phone: 
Email: