- 1
- Katahi ka whakapuakina e Tariuha he tikanga, a ka rapua i roto i te whare pukapuka, kei reira nei nga taonga e rongoa ana i Papurona.
- 2
- Na, kua kitea ki Akameta, i roto i te whare kingi i te whenua o nga Meri, he pukapuka, me tetahi kupu whakamahara i tuhituhia ki roto; koia tenei:
- 3
- I te tuatahi o nga tau o Kingi Hairuha i whakapuakina he tikanga e Kingi Hairuha mo te whare o te Atua i Hiruharama, Kia hangā te whare, te wahi e patu ai ratou i nga patunga tapu, kia u ano hoki te whakatakoto o nga turanga; kia ono tekau whatianga tona tiketike, kia ono tekau whatianga tona whanui.
- 4
- Kia toru nga rarangi o nga kohatu nui, kia kotahi hoki rarangi o te rakau hou: me hoatu ano nga utu i roto i te whare o te kingi.
- 5
- Me whakahoki ano hoki nga oko, nga mea koura, nga mea hiriwa, o te whare o te Atua, i tangohia mai nei e Nepukaneha i roto i te temepara i Hiruharama, a kawea mai ana e ia ki Papurona; me kawe atu ano ki te temepara i Hiruharama, ki tona wahi, ki tona wahi, ka whakatakoto ai ki te whare o te Atua.
- 6
- Na, e Tatanai, e te kawana i tera taha o te awa, e Hetara-potonai, me o koutou hoa me nga Aparahaki, i tera taha o te awa, kia matara mai koutou i reira.
- 7
- Waiho noa iho te mahinga o tena whare o te Atua. Ma te kawana o nga Hurai, ratou ko nga kaumatua o nga Hurai, e hanga tena whare o te Atua ki tona wahi.
- 8
- Tenei ano hoki tetahi tikanga aku mo ta koutou e mea ai ki nga kaumatua o ena Hurai, hei mea mo te hanganga a tenei whare o te Atua: Me hoatu etahi o nga taonga o te kingi, o te takoha i tera taha o te awa, ki ena tangata, hei utu mea, kei whakawarea ratou.
- 9
- Na, nga mea e kore ana i a ratou, nga kuao puru, nga hipi toa, nga reme hei tahunga tinana ma te Atua o te rangi, te witi, te tote, te waina, te hinu, nga mea e whakaritea e nga tohunga i Hiruharama, kei mahue te hoatu ki a ratou i tena ra, i tena ra.
- 10
- Kia whakaherea atu ai e ratou etahi whakahere kakara ki te Atua o te rangi, kia inoi ano hoki mo te kingi ratou ko ana tama, kia ora.
- 11
- Ko taku tikanga ano tenei, Ki te whakaputaia ketia tenei kupu e tetahi, kia unuhia mai he rakau i roto i tona whare, a ka oti te whakatu, me tarona ia ki runga; kia meinga ano hoki tona whare hei puranga paru hei utu mo taua mahi.
- 12
- Na, ma te Atua nana nei i mea kia noho tona ingoa ki reira, e huna nga kingi katoa, me nga iwi, ina totoro mai o ratou ringa ki te whakaputa ke, ki te whakangaro i tena whare o te Atua i Hiruharama. Naku na Tariuha te tikanga i whakatakoto; kia hohoro te meatanga.
- 13
- Katahi a Tatanai te kawana o tenei taha o te awa, a Hetara-potonai me o raua hoa, ka pera me ta Kingi Tariuha i mea mai ai; hohoro tonu ta ratou meatanga.
- 14
- Na, kei te hanga nga kaumatua o nga Hurai; tika tonu ta ratou, he mea na te poropititanga a Hakai poropiti, raua ko Hakaraia tama a Iro. Heoi hanga ana ratou, a oti ake; i rite tonu ki te whakahaunga a te Atua o Iharaira, ki te whakahaunga a Hairuha, a Tariuha, a Arataherehe kingi o Pahia.
- 15
- No te toru o nga ra o te marama Arara i oti ai tenei whare, ko te ono ano ia o nga tau o te kingitanga o Kingi Tariuha.
- 16
- Na, nga tamariki a Iharaira, nga tohunga, nga Riwaiti, me era atu o nga tamariki o te whakaraunga, taia ana e ratou te kawa o tenei whare o te Atua; koa tonu hoki ratou.
- 17
- Whakaherea ana e ratou i te tainga o te kawa o tenei whare o te Atua, kotahi rau nga puru, e rua rau nga hipi toa, e wha rau nga reme; a hei whakahere hara mo Iharaira katoa, kotahi tekau ma rua nga koati toa, he mea whakarite ki te maha o nga iwi o Iharaira.
- 18
- I whakaturia ano hoki e ratou nga tohunga, tenei wehenga, tenei wehenga, me nga Riwai ano hoki tenei ropu, tenei ropu, mo nga mahi ki te Atua i Hiruharama; he mea whakarite ki te mea i tuhituhia ki te pukapuka a Mohi.
- 19
- I te tekau ma wha o te marama tuatahi ka whakarite nga tamariki o te whakaraunga i te kapenga.
- 20
- I purea hoki nga tohunga, ratou tahi ko nga Riwaiti, he mea pure ratou katoa, a, patua ana e ratou te kapenga ma nga tamariki katoa o te whakaraunga, ma o ratou tuakana, ma nga tohunga, ma ratou ake ano hoki.
- 21
- I kai ano hoki nga tamariki a Iharaira i hoki mai nei i te whakaraunga, me te hunga katoa i mawehe mai nei ki a ratou i roto i te poke o nga iwi o te whenua, ki te rapu i a Ihowa, i te Atua o Iharaira.
- 22
- I whakaritea ano e ratou te hakari o te taro rewena-kore, e whitu nga ra, koa tonu ano hoki ratou. Na Ihowa hoki ratou i mea kia koa, nana hoki i whakaanga mai te ngakau o te kingi o Ahiria ki a ratou, i whakakaha ai ia i o ratou ringaringa ki te mahi i te whare o te Atua, o te Atua o Iharaira.
Address: 
Phone: 
Email: