- 1
- E tu ra koutou i runga i te tikanga here-kore, i ta te Karaiti i wewete nei i a tatou; kei mau ano hoki koutou ki roto ki te ioka pononga.
- 2
- Na, tenei ahau a Paora te mea atu nei ki a koutou, Ki te kotia koutou, e kore koutou e whai pai i a te Karaiti.
- 3
- He whakaatu tuarua tenei naku ki nga tāngata katoa e kotia ana, kua mau ratou i te ture kia mahia katoatia.
- 4
- Kua mawheto atu koutou i a te Karaiti, e te hunga e whakatikaia ana e te ture, kua taka iho koutou i runga i te aroha noa.
- 5
- Ko tatou hoki, na te Wairua, ta tatou tatari ki te tika e tumanakohia atu nei, e ahu mai nei i te whakapono:
- 6
- I roto hoki i a Karaiti Ihu kahore o te kotinga wahi, kahore ano hoki o te kotinga kore; engari ko te whakapono e mahi ana i runga i te aroha.
- 7
- I pai ta koutou oma; na wai koutou i whakaware, i kore ai koutou e rongo ki te pono?
- 8
- Ehara tenei whakaaro i te mea na te kai karanga i a koutou.
- 9
- He iti te rewena, rewenatia eke te puranga katoa.
- 10
- E u ana oku whakaaro ki a koutou i roto i te Ariki, e kore e rereke o koutou whakaaro: na, te kai whakararu i a koutou, ahakoa ko wai ranei, māna ano tona whakawakanga e pikau.
- 11
- Me au ano hoki, e aku teina, ki te mea he kauwhau tonu nei taku i te kotinga, he aha ahau ka whakatoia tonutia ai? penei kua kore hoki to te ripeka tūtukitanga waewae.
- 12
- Pai kau ki a au me i motuhia atu te hunga e whakararu na i a koutou.
- 13
- Kua karangatia nei hoki koutou, e aku teina, ki te tikanga here-kore; kaua ia ta koutou tikanga here-kore e waiho hei whakaoho i te kikokiko, engari me mahi koutou tetahi ki tetahi i runga i te aroha.
- 14
- E takoto topu ana hoki te ture katoa i roto i te kupu kotahi, ara, Kia aroha koe ki tou hoa tata, ano ko koe.
- 15
- Ki te ngau ia koutou, ki te kai tetahi ki tetahi, kia tupato kei pareho koutou tetahi i tetahi.
- 16
- Na, ko taku kupu tenei, Haere koutou i roto i te Wairua, a e kore e whakaritea e koutou te hiahia o te kikokiko.
- 17
- E hiahia ana hoki te kikokiko tika ke i te Wairua, me te Wairua hoki tika ke i te kikokiko: a e whawhai ana enei tetahi ki tetahi: e taea e koutou nga mea i hiahia ai koutou.
- 18
- Na, ki te arahina koutou e te Wairua, kahore koutou i raro i te ture.
- 19
- A e kitea ana nga mahi a te kikokiko, ara, te puremu, te moe tahae, te poke, te hiahia taikaha,
- 20
- Te karakia whakapakoko, te makutu, te mauahara, te whawhai, te tauwhāinga, te riri, te totohe, te wehewehenga, te titorehanga,
- 21
- Te hae, te kohuru, te haurangitanga, te kakainga, me nga mea e rite ana ki enei: me korero wawe e ahau enei mea ki a koutou, me pera me taku i korero ai i mua, te hunga e mahi ana i nga mea penei, e kore ratou e whiwhi ki te rangatiratanga o te Atua.
- 22
- Ko nga hua ia o te Wairua, he aroha, he hari, he rangimarie, he manawanui, he ngawari, he ngakau pai, he whakapono,
- 23
- He ngakau māhaki, he ngakau kua taea te pēhi: kahore he ture e riria ai enei mea.
- 24
- Te hunga ia o te Karaiti, kua ripekatia e ratou te kikokiko, me ona hihiritanga, me ona hiahia.
- 25
- Ki te mea e ora ana tatou i roto i te Wairua, kia haere ano tatou i roto i te Wairua.
- 26
- Kei whaia e tatou te kororia hua kore, te whakapataritari tetahi ki tetahi, te hae tetahi ki tetahi.
Address: 
Phone: 
Email: