- 1
- Na, ka haere mai a Aperama i Ihipa, ki te taha ki te tonga, raua ko tana wahine, me ana mea katoa, me Rota hoki.
- 2
- A he nui rawa nga kararehe, te hiriwa, me te koura a Aperama.
- 3
- Na, ka turia mai e ia, a ka haere mai i te tonga a tae noa ki Pete-ere, ki te wahi i orokotu ai tona teneti, ki te takiwa o Pete-ere o Hai;
- 4
- Ki te wahi i te aata, i hangā e ia ki reira i te timatanga: a ka karanga atu a Aperama i reira ki te ingoa o Ihowa.
- 5
- A ko Rota hoki, i haere tahi nei i a Aperama, he hipi ano ana, he kau, he teneti.
- 6
- A kihai i nui te whenua mo raua, hei nohoanga tahitanga mo raua: no te mea hoki he nui o raua rawa, tē ahei ai raua te noho tahi.
- 7
- Na, ka tautohe ki a ratou nga kai tiaki kahui a Aperama me nga kai tiaki kahui a Rota: a i taua whenua ano te Kanaani me te Perihi i taua wa e noho ana.
- 8
- Na ka mea mai a Aperama ki a Rota, Kaua ra taua e whakatete ki a taua, kaua hoki a taua hepara e whakatete ki a ratou; he teina he tuakana nei hoki taua.
- 9
- Kahore ianei te whenua i tou aroaro? tena ra, kia wehea taua: ki te anga koe ki maui, na, ka ahu ahau ki matau, a ki te haere koe ki matau, na, ka ahu ahau ki maui.
- 10
- Na, ka anga ake nga kanohi o Rota, a ka titiro atu ki te mania katoa o Horano, e makuku katoa ana, i te mea kahore ano kia whakangaromia noatia a Horoma raua ko Komora e Ihowa, he pera ano me te kari a Ihowa, me te whenua ano o Ihipa, i to haerenga mai ki Toara.
- 11
- Na, ka whiriwhiria e Rota te mania katoa o Horano mana; a ka haere atu a Rota whaka-te-rawhiti: a ka wehewehe raua i a raua.
- 12
- Ko Aperama i noho ki te whenua o Kanaana, ko Rota i noho ki nga pa o te mania, a whakaturia ana e ia tona teneti ki Horoma.
- 13
- Na, he kino nga tangata o Horoma, he hunga hara rawa ki te aroaro o Ihowa.
- 14
- A, ka mea mai a Ihowa ki a Aperama, i muri iho i ta Rota wehenga ketanga atu i a ia, Kia anga ake o kanohi, titiro atu hoki, i te wahi e tu na koe, ki te taha ki te nota, ki te tonga, ki te rawhiti, ki te weta:
- 15
- Ta te mea hoki, ko taua whenua katoa e kite na koe, ka hoatu e ahau a reira ki a koe, ki tou uri hoki ake tonu atu.
- 16
- A ka meinga ano e ahau ou uri kia rite ki te puehu o te whenua: a ki te ahei i tetahi tangata te tatau te puehu o te whenua, e taua ano hoki ou uri.
- 17
- Whakatika, haereerea te whenua, tona roa, tona whanui; no te mea ka hoatu e ahau ki a koe.
- 18
- Na, nekehia atu ana tona teneti e Aperama, a haere ana, noho ana ki nga mania i Mamere, ki era i Heperona, hangā ana e ia tetahi aata ma Ihowa ki reira.
Address: 
Phone: 
Email: