- 1
- Na, ka mate-kai te whenua, hāunga te mate-kaitanga tuatahi i puta mai i nga ra o Aperahama. A ka haere atu a Ihaka ki a Apimereke ki te kingi o nga Pirihitini ki Kerara.
- 2
- Na, ka puta mai a Ihowa ki a ia, a ka mea mai, Kaua e haere ki raro ki Ihipa; e noho ki te whenua e korero ai ahau ki a koe:
- 3
- E noho koe ki tenei whenua, a ka tata ahau ki a koe, ka manaaki hoki i a koe; ka hoatu nei hoki e ahau enei whenua katoa ki a koutou ko ou uri, ka whakapumautia te oati i oati ai ahau ki a Aperahama ki tou papa;
- 4
- A ka whakanuia e ahau ou uri kia pera me nga whetu o te rangi, ka hoatu hoki e ahau enei whenua katoa ki ou uri; a ma tou uri ka manaakitia ai nga iwi katoa o te whenua;
- 5
- Mo Aperahama hoki i whakarongo mai ki toku reo, i mahara hoki ki aku whakamaharatanga, ki aku whakahaunga, ki aku tikanga, me aku ture.
- 6
- Na, ka noho a Ihaka ki Kerara:
- 7
- A ka ui mai nga tangata o taua wahi ki tana wahine; a ka mea ia, Ko taku tuahine ia: i wehi hoki ia, tē mea ia, Ko taku wahine; i mea hoki, kei patua ahau e nga tangata o tenei wahi mo Ripeka; he ataahua hoki ia ki te titiro atu.
- 8
- A ka maha ona ra ki reira na ka titiro mai a Apimereke te kingi o nga Pirihitini i te matapihi, a ka kite mai, na, ko Ihaka e takaro ana ki a Ripeka ki tana wahine.
- 9
- Na, ka karangatia atu a Ihaka e Apimereke, a ka mea ia, Koia ano, ko to wahine ano ia: a na te aha koe i mea ai, Ko taku tuahine ia? A ka mea a Ihaka ki a ia, i mea hoki ahau, Kei mate ahau mona.
- 10
- Na, ka mea a Apimereke, He aha tenei mahi au ki a matou? wahi iti kua takoto tetahi o te iwi nei ki to wahine, a kua takina mai e koe he hara ki runga ki a matou.
- 11
- Na, ka korero iho a Apimereke ki tona iwi katoa, a ka mea, Ki te pa atu tetahi ki tenei tangata ki tona wahine ranei, ka mate.
- 12
- A i rui a Ihaka ki taua whenua, a maea mai i taua tau ano, kotahi rau; i manaakitia hoki ia e Ihowa:
- 13
- Na, ka kake taua tangata, a ka tino nui haere, no ka nui noa ake ia:
- 14
- A ka whai hipi, ka whai kau ano ia, he tini hoki nga pononga: a ka hae mai nga Pirihitini ki a ia.
- 15
- A, nga poka katoa i keria e nga pononga a tona papa, i nga ra o Aperahama o tona papa, i tanumia ena e nga Pirihitini, i whakakiia hoki ki te oneone.
- 16
- Na, ka mea mai a Apimereke ki a Ihaka, Haere atu i roto i a matou; he kaha rawa hoki koe i a matou.
- 17
- Na, ka haere atu a Ihaka i reira, a whakaturia ana tona teneti ki te awaawa o Kerara, a noho ana i reira.
- 18
- Na, ka keria ano e Ihaka nga poka wai i keria i nga ra o Aperahama o tona papa; i tanumia hoki e nga Pirihitini i muri iho i te matenga o Aperahama: a huaina ana e ia hei ingoa mo aua poka ko nga ingoa i huaina iho e tona papa.
- 19
- Na, ka keri nga pononga a Ihaka ki te awaawa, a ka kitea e ratou i reira he puna manawa whenua.
- 20
- Na, ka tautohe mai nga hepara o Kerara ki nga hepara a Ihaka, a ka mea, Na matou tenei wai: a huaina ana e ia te ingoa o te poka ko Eheke; mo ratou hoki i whakatetetete ki a ia.
- 21
- Na, ka keri ratou i tetahi atu poka, a ka tautohea ano tena e ratou: a huaina iho e ia tona ingoa ko Hitina.
- 22
- Na, ka neke atu ia i reira, a ka keri i tetahi atu poka; a kihai tena i tautohea e ratou: na ka huaina e ia tona ingoa ko Rehopota; i mea hoki ia, Katahi nei hoki a Ihowa ka whakawatea i tetahi nohoanga mo tatou, a ka hua tatou, ki runga ki te whenua.
- 23
- Na, ka haere atu ia i reira ki runga ki Peere-hepa.
- 24
- A ka puta mai a Ihowa ki a ia i taua po ano, ka mea, Ko ahau te Atua o Aperahama o tou papa: kaua e wehi, kei a koe nei hoki ahau, a ka manaaki ahau i a koe, ka whakanui hoki i ou uri, he whakaaro hoki ki a Aperahama ki taku pononga.
- 25
- Na, ka hangā e ia he aata ki reira, a ka karanga atu ia ki te ingoa o Ihowa, ka whakatu hoki i tona teneti ki reira: a ka keria tetahi poka ki reira e nga pononga a Ihaka.
- 26
- Na, ka haere mai a Apimereke ki a ia i Kerara, ratou ko Ahutata ko tetahi o ona hoa, ko Pikora hoki ko te rangatira o tana ope.
- 27
- A ka mea a Ihaka ki a ratou, I haere mai koutou ki a au ki te aha, kua kino nei hoki koutou ki a au, kua pei hoki i a au i roto i a koutou?
- 28
- A ka mea mai ratou, i tino kite matou, kei a koe a Ihowa: koia matou i mea ai, Kia takoto he oati ki waenganui i a tatou, ki te takiwa o matou, ou, kia whakarite kawenata hoki matou ki a koe;
- 29
- Mou, kei kino to mahi ki a matou, kia penei ano me matou kihai nei i pa atu ki a koe, kihai ano hoki i aha ki a koe, heoi ano ko te pai anake, a i ata tuku mai ano hoki i a koe: he manaakitanga koe inaianei na Ihowa.
- 30
- Na, ka tukua e ia he hakari ma ratou, a ka kai ratou ka inu.
- 31
- Na, ka maranga wawe ratou i te ata, a ka oati ratou ki tetahi ki tetahi: a tukua ana ratou e Ihaka kia haere, a hoki marie atu ana ratou i a ia.
- 32
- A, i taua rangi ano ka haere mai nga pononga a Ihaka, a ka korerotia e ratou ki a ia te poka i keria e ratou, a ka mea mai ratou ki a ia, Kua kitea he wai e matou.
- 33
- A huaina iho e ia taua poka ko Hepaha: no reira te ingoa o tena pa o Peere-hepa, a mohoa noa nei.
- 34
- A, ka wha tekau nga tau o Ehau, na, ka tango ia i a Iuriti tamahine a Peeri Hiti, hei wahine mana, raua ko Pahemata tamahine a Erona Hiti:
- 35
- A ka pouri te ngakau o Ihaka raua ko Ripeka i a raua.
Address: 
Phone: 
Email: