- 1
- Na, ka karangatia a Hakopa e Ihaka, a ka manaaki ia i a ia, ka ako hoki i a ia, a ka mea ki a ia, Kaua e tikina tetahi wahine mau i roto i nga tamahine o Kanaana.
- 2
- Whakatika, haere ki Parana-arama, ki te whare o Petuere o te papa o tou whaea; ka tango ai i tetahi wahine mau i reira, i roto i nga tamahine a Rapana a te tungane o tou whaea.
- 3
- A ma te Atua kaha rawa koe e manaaki, mana hoki koe e mea kia hua, kia nui, a kia meinga ano koe hei huihuinga iwi;
- 4
- A kia homai ano e ia ki a koe te manaakitanga o Aperahama, ki a koutou tahi ano ko ou uri; a kia riro mai i a koe te whenua e noho manene nei koe, i homai nei hoki e te Atua ki a Aperahama.
- 5
- Na, tonoa atu ana a Hakopa e Ihaka: a haere ana ia ki Parana-arama ki a Rapana, ki te tama a Petuere Hiriani, ki te tungane o Ripeka whaea o Hakopa raua ko Ehau.
- 6
- A ka kite a Ehau kua manaaki a Ihaka i a Hakopa, kua tono hoki i a ia ki Parana-arama ki te tiki i tetahi wahine mana i reira; a kua ako ano i a ia i tana manaakitanga ai i a ia, kua mea, Kei tikina he wahine mau i roto i nga tamahine o Kanaana;
- 7
- A kua rongo ano a Hakopa ki tona papa raua ko tona whaea, kua riro hoki ki Parana-arama;
- 8
- A te kitenga o Ehau e kino ana nga tamahine o Kanaana ki te titiro a Ihaka a tona papa;
- 9
- Na, ka haere a Ehau ki a Ihimaera, a tangohia mai ana e ia ki roto ki ana wahine a Maharata hei wahine mana, te tamahine a Ihimaera tama a Aperahama, te tuahine o Nepaiota.
- 10
- Na, ka turia atu e Hakopa i Peere-hepa, a haere ana ki Harana.
- 11
- A ka pono atu ia ki tetahi wahi, na moe ana i reira, no te mea kua rere te ra; na, ka tikina atu e ia tetahi o nga kohatu o taua wahi, a waiho ana e ia hei urunga mona, a ka takoto iho i taua wahi, ka moe.
- 12
- Na, moe iho ia, a ko tetahi arawhata e tu ana i runga i te whenua, ko tona pito hoki kua tutuki atu ki te rangi: a ko nga anahera a te Atua e piki atu ana, e heke iho ana i runga i taua mea.
- 13
- A ko Ihowa e tu ana i runga i taua mea, e mea mai ana, Ko Ihowa ahau ko te Atua o Aperahama o tou papa, ko te Atua hoki o Ihaka: ko te whenua e takoto na koe ka hoatu e ahau ki a koe, ki ou uri ano hoki.
- 14
- A ka rite ou uri ki te puehu o te oneone, a ka tohatoha atu koe ki te taha ki te weta, ki te rawhiti, ki te nota hoki, me te tonga: a mau, ma to uri hoki, e manaakitia ai nga hapu katoa o te whenua.
- 15
- A, kei a koe tenei ahau, a ka tiaki ahau i a koe i nga wahi katoa e haere ai koe, ka whakahoki mai ano ahau i a koe ki tenei whenua; e kore hoki ahau e whakarere i a koe, kia oti ra ano taku i ki atu ai ki a koe.
- 16
- Na, ka oho ake a Hakopa i tana moe, a ka mea, He pono kei tenei wahi a Ihowa; a kihai ahau i mohio.
- 17
- Na, ka wehi ia, ka mea, Ano te wehi o tenei wahi! ehara tenei i te mea ke atu i te whare o te Atua, ko te kuwaha ano tenei ki te rangi.
- 18
- Na, ka ara wawe a Hakopa i te ata, a ka mau ki te kohatu i waiho hei urunga mona, a whakaturia ana e ia hei pou, a ringitia iho e ia he hinu ki runga.
- 19
- A huaina iho e ia te ingoa o taua wahi ko Pete-ere: ko Rutu ia te ingoa o taua pa i mua.
- 20
- Na, ka puaki ta Hakopa kupu taurangi, a ka mea ia, Ki te mea ka tata mai ki a au te Atua, a ka tiakina ahau e ia i tenei ara e haere nei ahau, a ka homai e ia ki a au he taro hei kai, me tetahi kakahu hei kakahu,
- 21
- A ka hoki mai ahau i runga i te rangimarie ki te whare o toku papa; na ka waiho a Ihowa hei Atua moku:
- 22
- A ka waiho hei whare mo te Atua tenei kohatu i whakaturia nei e ahau hei pou: ka hoatu ano hoki e ahau ki a koe nga whakatekau o nga mea katoa e homai e koe ki a au.
Address: 
Phone: 
Email: