- 1
- A muri iho i enei mea, ka hara te kai riringi waina o te kingi o Ihipa, raua ko tana kai hanga taro, ki to raua ariki ki te kingi o Ihipa.
- 2
- A ka riri mai a Parao ki ana kai tohutohu tokorua, ki te tino kai riringi waina, raua ko te tino kai hanga taro.
- 3
- Na, ka homai raua e ia kia puritia ki te whare o te rangatira o nga kai tiaki, ki te whare herehere, ki te wahi i herea ai a Hohepa.
- 4
- A ka meinga a Hohepa e te rangatira o nga kai tiaki hei kai titiro mo raua, a ka mahi ia ki a raua; a ka puritia raua i etahi ra.
- 5
- Na, ka moe raua i a raua moe, kotahi ano te po i moemoea ai raua, tetahi, tetahi, me te tikanga ano o tana moe, te kai riringi waina raua ko te kai hanga taro a te kingi o Ihipa, i herea nei raua i roto i te whare herehere.
- 6
- A te taenga mai o Hohepa ki a raua i te ata, na, ka titiro ia ki a raua, a e pouri ana raua.
- 7
- Na, ka ui atu ia ki aua kai tohutohu a Parao i puritia tahitia nei me ia i roto i te whare o tona ariki, a ka mea, Na te aha i whakapoururu ai o korua kanohi inaianei?
- 8
- A ka mea mai raua ki a ia, I moe maua i tetahi moe, a kahore he kai whakaatu i tona tikanga. Na, ka mea atu a Hohepa ki a raua, Ehara ianei te Atua i te kai whakaatu? tena koa, korerotia mai ki a au.
- 9
- Na, ka korerotia mai tana moe e te tino kai riringi waina ki a Hohepa, a ka mea ki a ia, Moe iho ahau, na, ko tetahi waina i toku aroaro;
- 10
- A e toru nga peka o te waina; a e ahua pihi ana, a ka kohera ona puawai; a e hua ana nga tautau, maoa tonu nga karepe:
- 11
- A i toku ringa ano te kapa a Parao: na, ka mau au ki nga karepe, a tauia ana aua mea e ahau ki roto ki te kapa a Parao, a hoatu ana e ahau te kapa ki te ringaringa o Parao.
- 12
- Na, ko te meatanga atu a Hohepa ki a ia, Ko tona tikanga tenei: aua peka e toru e toru nga ra:
- 13
- Kia toru ake ra ka whakaara ake a Parao i tou mātenga, ka whakahoki ano i a koe ki tau mahi, a ka hoatu ano e koe te kapa a Parao ki tona ringaringa, ka pera hoki me mua, i te mea ko koe tana kai riringi waina.
- 14
- Otiia kia mahara mai koe ki a au ina whiwhi koe ki te pai, kia puta mai ano hoki to aroha ki a au, korerotia atu ano hoki ahau ki a Parao, kia puta atu ai ahau i roto i tenei whare:
- 15
- He tino tahae rawa hoki toku tahaetanga mai i te whenua o nga Hiperu: kahore ano hoki aku mahi i konei i makā ai ahau e ratou ki roto ki tenei whare herehere.
- 16
- A, ka kite te tino kai hanga taro he pai te tikanga, na, ka mea mai ia ki a Hohepa, Moe iho ano hoki ahau, na, e toru nga kete taro ma i runga i toku upoko.
- 17
- A i to runga kete ko nga kai katoa a Parao, nga mahi a te kai hanga taro; a i te kai nga manu i aua mea i roto i te kete i runga i toku upoko.
- 18
- Na, ka whakahokia atu e Hohepa, a ka mea atu, Ko tona tikanga tenei: Ko aua kete e toru e toru nga ra:
- 19
- Kia toru ake nga ra, ka tangohia ake e Parao tou upoko i runga i a koe, a ka whakairihia koe ki runga ki te rakau; a ka kainga e nga manu ou kikokiko e piri ana ki a koe.
- 20
- A i te toru o nga ra, i te ra whanautanga o Parao, na, ka tukua e ia he hakari ma ana tangata katoa: a whakaarahia ake ana e ia te mātenga o te tino kai riringi waina, me te mātenga o te tino kai hanga taro, i waenganui i ana pononga.
- 21
- I whakahokia ano e ia te tino kai riringi waina ki tana mahi riringi waina; hei homai hoki i te kapa ki te ringaringa o Parao:
- 22
- Ko te tino kai hanga taro ia i whakairihia ake e ia: i peratia me ta Hohepa i whakaatu mai ai ki a raua.
- 23
- Otiia kihai te tino kai riringi waina i mahara ki a Hohepa, i wareware hoki ki a ia.
Address: 
Phone: 
Email: