- 1
- A ka kite a Hakopa he witi kei Ihipa, na, ka mea a Hakopa ki ana tamariki, Na te aha koutou i tirotiro kau ai ki a koutou ano?
- 2
- I mea mai ano ia, Nana, kua rongo ahau he witi kei Ihipa: haere atu ki raro ki reira, ki te hoko i tetahi ma tatou ki reira; kia ora ai tatou, kei mate.
- 3
- Na, ka haere nga tuakana kotahi tekau o Hohepa ki raro ki Ihipa, ki te hoko witi.
- 4
- Ko Peniamine ia, ko te teina o Hohepa, kihai i tonoa e Hakopa i roto i ona tuakana; i mea hoki ia, Kei pono mai tetahi aitua ki a ia.
- 5
- A ka haere mai nga tamariki a Iharaira ki te hoko i roto i te hunga i haere mai: he mate-kai hoki to te whenua o Kanaana.
- 6
- A ko Hohepa te kawana o te whenua ko ia te kai hoko ki nga tangata katoa o te whenua: na ka haere mai nga tuakana o Hohepa, a ka piko iho o ratou kanohi ki te whenua i tona aroaro.
- 7
- A, te kitenga o Hohepa i ona tuakana, na, ka mohio ia ki a ratou, a ka whakatangata-ke ia ki a ratou, a ka korero whakatuma mai ki a ratou; ka mea hoki ki a ratou, I haere mai koutou i hea? A ka mea atu ratou, I te whenua o Kanaana, ki te hoko kai.
- 8
- A i mohio a Hohepa ki ona tuakana, ko ratou ia kihai i mohio ki a ia.
- 9
- Na, ka mahara a Hohepa ki nga moe i moe ai ia mo ratou, a ka mea mai ia ki a ratou, He tutei koutou; he whakataki i te wateatanga o te whenua i haere mai ai koutou.
- 10
- A ka mea atu ratou ki a ia, Kahore, e toku ariki, engari i haere mai o pononga ki te hoko kai.
- 11
- He tamariki katoa matou na te tangata kotahi; he hunga pono matou, ehara o pononga i te tutei.
- 12
- A ka mea mai ia ki a ratou, Kahore, engari he whakataki i te wateatanga o te whenua i haere mai ai koutou.
- 13
- A ka mea atu ratou, Kotahi tekau ma rua o pononga, he teina he tuakana matou, he tamariki na te tangata kotahi, no te whenua o Kanaana; a, tera ano te mea nohinohi kei to matou papa inaianei, ko tetahi kua kahore.
- 14
- Na, ko te meatanga mai a Hohepa ki a ratou, Ko ia taku i korero ai ki a koutou, i mea ai, He tutei koutou:
- 15
- Ma konei ka mohiotia ai koutou: E ora ana a Parao e kore koutou e haere atu i konei, ki te kahore to koutou teina nohinohi e haere mai ki konei.
- 16
- Tukua atu tetahi o koutou ki te tiki i to koutou teina, ko koutou hoki, ka herea koutou, kia mohiotia ai a koutou korero, he pono ranei ta koutou: a ki te kahore, e ora ana a Parao, ina, he tutei koutou.
- 17
- Na, ka huihuia atu ratou e ia kia tiakina, a e toru nga ra.
- 18
- A i te toru o nga ra ka mea mai a Hohepa ki a ratou, Ko tenei ta koutou e mea ai, kia ora ai koutou; he tangata wehi hoki ahau i te Atua.
- 19
- Ki te mea he hunga pono koutou, kia herea tetahi o o koutou tuakana i roto i te whare i tiakina ai koutou: me haere koutou, ki te kawe witi mo te mate-kai o o koutou whare:
- 20
- A me kawe mai to koutou teina nohinohi ki a au; kia whakatikaia ai a koutou kupu; a e kore koutou e mate. A pena ana ratou.
- 21
- A ka mea ratou tetahi ki tetahi, He pono kua whai hara tatou i to tatou teina; i kite hoki tatou i te mamae o tona wairua, i tana inoinga ki a tatou, a kihai i whakarongo atu; no reira hoki i puta mai ai tenei he ki a tatou.
- 22
- Na, ka whakahokia mai e Reupena ki a ratou, a ka mea, Kahore ianei ahau i ki atu ki a koutou, i mea, Kaua e hara ki te tamaiti; a kihai koutou i rongo mai? na, ko ona toto ano hoki tenei te whakatakina nei.
- 23
- A kihai ratou i mohio e rongo mai ana a Hohepa; no te mea he kai whakamaori tana hei korero ki a ratou.
- 24
- Na, ka tahuri ke atu ia i a ratou, a ka tangi; a ka hoki mai ano ia ki a ratou, ka korero ki a ratou, ka tango hoki i a Himeona i roto i a ratou, a herea ana e ia ki to ratou aroaro.
- 25
- Na, ka whakahau a Hohepa kia whakakiia a ratou pēke ki te witi, kia whakahokia ano hoki nga moni a tenei tangata a tenei tangata ki roto ki a ratou pēke, kia hoatu ano hoki ki a ratou he o ki te ara; a pera ana ia ki a ratou.
- 26
- Katahi ka utaina atu e ratou a ratou witi ki runga ki a ratou kaihe, a haere atu ana i reira.
- 27
- A i te whakatuwheratanga a tetahi o ratou i tana pēke kia hoatu he kai ma tana kaihe i te whare tira, na, ka kitea iho e ia tana moni; na, kei te waha ano o tana pēke.
- 28
- A ka mea ia ki ona tuakana, Kua whakahokia mai taku moni; a tenei ano kei roto i taku pēke: na, kore ake o ratou ngakau, a ka wehi ratou, ka mea tetahi ki tetahi, He mahi aha tenei a te Atua ki a tatou?
- 29
- Na, ka tae mai ratou ki a Hakopa ki to ratou papa, ki te whenua o Kanaana, a ka korerotia mai ki a ia nga mea katoa i pono mai ki a ratou; a ka mea,
- 30
- I korero whakatuma mai te rangatira o te whenua ki a matou, a i kiia ano matou e ia he tutei mo te whenua.
- 31
- A ka mea atu matou ki a ia, He tangata pono matou; ehara matou i te tutee.
- 32
- Kotahi tekau ma rua matou, he tuakana he teina, he tamariki na to matou papa; kotahi kua kore, a kei to matou papa te mea nohinohi inaianei, kei te whenua o Kanaana.
- 33
- Na, ko te meatanga mai a taua tangata, a te rangatira o te whenua, ki a matou, Ma tenei e mohio ai ahau he hunga pono koutou; me waiho e koutou tetahi o o koutou tuakana ki a au, a me mau atu e koutou he kai mo te mate-kai o o koutou whare, a ka haere:
- 34
- Ka kawe mai ai hoki i to koutou teina nohinohi ki a au, kia mohio ai ahau ehara koutou i te tutei, engari he hunga pono koutou: penei ka hoatu e ahau to koutou tuakana ki a koutou, a ka hokohoko koutou ki tenei whenua.
- 35
- A i a ratou e ringiringi ana i a ratou pēke, na, ko te moni a tenei a tenei e takai ana i roto i a ratou pēke: a ka kite ratou ko to ratou papa i nga moni e takai ana, na, ka wehi ratou.
- 36
- Na, ka mea mai a Hakopa to ratou papa ki a ratou, Ka whakapania ahau e koutou: Ko Hohepa, kua kahore, ko Himeona hoki, kua kahore, a ka tangohia nei e koutou a Peniamine: he pehi moku enei mea katoa.
- 37
- Na, ka korero atu a Reupena ki tona papa, ka mea atu, Whakamatea aku tamariki tokorua, ki te kahore ia e kawea mai e ahau ki a koe: homai ia ki toku ringa, a maku ia e whakahoki mai ki a koe.
- 38
- A ka mea mai ia, E kore taku tamaiti e haere tahi i a koutou ki raro; kua mate hoki tona tuakana, a ko ia anake ka mahue nei; a ki te pono he aitua ki a ia i te ara e haere nei koutou, katahi ka meinga taku koroheketanga e koutou kia heke tangi atu ki te urupa.
Address: 
Phone: 
Email: