- 1
- Na, ka whakahau ia ki te kai tohutohu o tona whare, ka mea, Whakakiia nga pēke a aua tangata ki nga kai e taea te whawhao ki roto, me maka ano hoki te moni a ia tangata a ia tangata ki roto ki te waha o tana pēke.
- 2
- A whaowhina atu taku kapa, te kapa hiriwa, ki roto ki te waha o te pēke a te mea nohinohi, me te moni ano hoki mo tana witi. Na, rite tonu tana i mea ai ki ta Hohepa kupu i ki ai.
- 3
- A ka mārama te ata, na, ka tonoa atu aua tangata, a ratou, me a ratou kaihe.
- 4
- A kihai i matara to ratou haerenga atu i waho o te pa, na, ka mea mai a Hohepa ki te kai tohutohu o tona whare, Whakatika, whaia aua tangata; a ka mau ratou i a koe, na, ka mea atu ki a ratou, Na te aha i homai ai e koutou te kino hei utu mo te pai?
- 5
- Ehara ianei tenei a te mea e inu ai toku ariki, i tana hoki e kite tohu ai ia? ka kino ta koutou nei mahi.
- 6
- Na, ka mau ratou i a ia, a korerotia atu ana e ia aua kupu ano ki a ratou.
- 7
- A ka mea ratou ki a ia, Na te aha enei kupu i korerotia ai e toku ariki? Aue! kia meatia tenei mea e o pononga!
- 8
- Whakaaro hoki, te moni i kitea e matou i te waha o a matou pēke, i whakahokia mai e matou ki a koe i te whenua o Kanaana: a kia tahae matou hei aha i te hiriwa, i te koura ranei, i roto i te whare o tou ariki?
- 9
- Ki te mea ka kitea taua mea ki tetahi o o pononga, kia mate ia, a kia waiho matou hei pononga ma toku ariki.
- 10
- A ka mea mai ia, Kia rite ano hoki aianei ki ta koutou i mea ai: e kitea taua mea ki tetahi, hei pononga ia maku; a kahore he whakahe mo koutou.
- 11
- Na, hohoro tonu ta ratou tuku iho i tana pēke i tana pēke ki te whenua, whakatuwheratia ana e ratou tana pēke tana pēke.
- 12
- Na, ka rapu ia, a ka timata i ta te kaumatua, ka whakamutu hoki i to te mea nohinohi: a ka kitea te kapa i roto i te pēke a Peniamine.
- 13
- Na, ka haehae ratou i o ratou kakahu, a whakawahā ana e ratou tana kaihe tana kaihe, a hoki ana ki te pa.
- 14
- Na, ka haere mai a Hura, ratou ko ona tuakana ko ona teina, ki te whare o Hohepa; i reira ano hoki ia: a tapapa iho ana ki te whenua i tona aroaro.
- 15
- Na, ka mea a Hohepa ki a ratou, He aha tenei mea i meatia nei e koutou? kihai ranei koutou i mahara he tangata matakite te penei me au nei?
- 16
- Na, ka mea mai a Hura, He aha ta matou e mea ai ki toku ariki? he aha ta matou e korero ai? me aha ranei hei whakatika i a matou? Kua kitea e te Atua te hara o o pononga; na, tenei matou hei pononga ma toku ariki, matou tahi hoki ko te tangata i kitea nei te kapa ki a ia.
- 17
- Ano ra ko ia, Hi, kia meatia tenei e ahau! ko te tangata i kitea nei te kapa ki a ia, ko ia hei pononga maku; ko koutou ia, haere marie koutou ki runga ki to koutou papa.
- 18
- Na, ka whakatata mai a Hura ki a ia, a ka mea, Tukua to pononga, e toku ariki, kia korero atu i tetahi kupu ki nga taringa o toku ariki, kei mura mai hoki to riri ki to pononga: ko korua hoki ko Parao, rite tahi.
- 19
- I ui mai toku ariki ki ana pononga, i mea, He papa ranei to koutou, he teina ranei?
- 20
- A ka mea atu matou ki toku ariki, He papa ano to matou, he koroheke, me tetahi tamaiti o tona koroheketanga, he mea nohinohi; kua mate hoki tona tuakana, a ko ia anake i mahue o nga tamariki a tona whaea, a e aroha ana tona papa ki a ia.
- 21
- Na, ka mea mai koe ki o pononga, Kawea mai ia ki raro ki a au, kia tau atu ai oku kanohi ki a ia.
- 22
- Katahi ka mea atu matou ki toku ariki, E kore e ahei kia whakarerea tona papa e taua tamaiti: no te mea ka mate tona papa ki te whakarerea e ia.
- 23
- Na, ka mea mai koe ki o pononga, Ki te kahore to koutou teina, te mea nohinohi e haere tahi mai i a koutou ki raro, e kore koutou e kite i toku kanohi, a muri ake nei.
- 24
- A i to matou haerenga ki runga ki to pononga ki toku papa, na, ka korerotia e matou nga kupu a toku ariki ki a ia.
- 25
- A ka mea mai to matou papa, Hoki atu ki te hoko i tetahi wahi kai ma tatou.
- 26
- Na, ka mea atu matou, E kore e ahei i a matou te haere ki raro: ki te mea kei a matou to matou teina, te mea nohinohi, na, ka haere matou ki raro: no te mea hoki e kore e taea e matou te titiro atu ki te kanohi o taua tangata, ki te kahore to matou teina, te mea nohinohi, i a matou.
- 27
- Na, ka mea mai to pononga toku papa ki a matou, E mohio ana koutou tokorua nga tamariki a maua ko taku wahine:
- 28
- A i haere atu tetahi i toku taha, a i mea ahau, He pono kua haea putia ia; a kahore ahau i kite i a ia, a mohoa noa nei:
- 29
- A ki te tangohia ano hoki tenei e koutou i toku aroaro, a ka pono he aitua ki a ia, katahi ka meinga e koutou kia heke tangi atu toku koroheketanga ki te urupa.
- 30
- Na, akuanei, ki te haere atu ahau ki to pononga ki toku papa, a kahore taua tamaiti i a matou; (kei roto hoki i tona wairua tona wairua e paihere ana;)
- 31
- Na, akuanei, kei tona kitenga kahore tenei tamaiti, na, ka mate ia: a ka meinga e matou e o pononga te koroheketanga o to pononga o to matou papa kia heke tangi atu ki te urupa.
- 32
- I waiho hoki to pononga hei utu mo tenei tamaiti ki toku papa, i mea ahau, Ki te kahore ia e kawea mai e ahau ki a koe, na, hei whakaheanga ahau ma toku papa i nga ra katoa.
- 33
- Na, kia noho ra to pononga aianei hei utu mo tenei tamaiti, hei pononga ma toku ariki; a kia haere tahi te tamaiti i ona tuakana ki runga.
- 34
- Me pehea hoki ahau e haere ai ki runga, ki toku papa, ki te kahore te tamaiti i a au? kei kite ahau i te kino e pa ana ki toku papa.
Address: 
Phone: 
Email: