- 1
- Na ka haere a Hohepa, a ka korero ki a Parao, ka mea, Kua tae mai toku papa me oku tuakana, me a ratou kahui, me a ratou kau, me a ratou mea katoa, i te whenua o Kanaana; a tenei ano ratou kei te whenua o Kohena.
- 2
- Na, ka tango ia i etahi o ona tuakana, tokorima, a whakaturia ana ratou e ia ki te aroaro o Parao.
- 3
- A ka mea mai a Parao ki ona tuakana, He aha ta koutou mahi? A ka mea ratou ki a Parao, He hepara o pononga, matou, me o matou mātua.
- 4
- A i mea ano ratou ki a Parao, He noho ki tenei whenua i haere mai ai matou; no te mea kahore he kai ma nga hipi a o pononga; i te nui hoki o te mate-kai o te whenua o Kanaana: na, kia noho ra o pononga ki te whenua o Kohena.
- 5
- Na, ka korero mai a Parao ki a Hohepa, a ka mea, Kua tae mai nei tou papa me ou tuakana ki a koe:
- 6
- Kei tou aroaro te whenua o Ihipa; whakanohoia e koe tou papa me ou tuakana ki te wahi pai o te whenua; kia noho ratou ki te whenua o Kohena: ki te mea e mohiotia ana e koe etahi tangata uaua i roto i a ratou, meinga ratou hei rangatira mo aku kararehe.
- 7
- Na, ka kawea mai a Hakopa tona papa e Hohepa, a ka whakaturia ki te aroaro o Parao: a ka manaaki a Hakopa i a Parao.
- 8
- A ka mea mai a Parao ki a Hakopa, Ka hia ou tau?
- 9
- A ka mea a Hakopa ki a Parao, Kotahi rau e toru tekau tau nga ra o nga tau o toku nohoanga manenetanga: he torutoru, he kino nga ra o nga tau o toku oranga, kihai ano hoki i rite ki nga ra o nga tau o te oranga o oku mātua, nga ra i noho manene ai ratou.
- 10
- Na, ka manaaki a Hakopa i a Parao, a puta mai ana i te aroaro o Parao.
- 11
- Na, ka whakanohoia e Hohepa tona papa me ona tuakana, a homai ana e ia ki a ratou he kāinga i te whenua o Ihipa, i te wahi pai o te whenua, i te whenua o Ramehehe, i pera ano me ta Parao i whakahau ai.
- 12
- Na, ka atawhai a Hohepa i tona papa, ratou ko ona tuakana, ko te whare katoa ano hoki o tona papa, ki te taro, he mea whakarite tonu ki o ratou hapu.
- 13
- A kahore he taro o te whenua katoa; he nanakia rawa hoki te mate-kai; a hemo noa iho te whenua o Ihipa i te mate-kai, me te whenua hoki o Kanaana.
- 14
- A kohia ana e Hohepa te moni katoa i kitea ki te whenua o Ihipa, ki te whenua hoki o Kanaana, mo te witi i hokona e ratou: a kawea ana e Hohepa te moni ki te whare o Parao.
- 15
- A te potonga o te moni o te whenua o Ihipa, o te whenua hoki o Kanaana, na, ka haere mai nga Ihipiana katoa ki a Hohepa, a ka mea, Homai he taro ki a matou: kia mate hoki matou ki tou aroaro hei aha? kua poto nei hoki te moni.
- 16
- Na, ka mea atu a Hohepa, Homai a koutou kararehe; a ka hoatu e ahau hei utu mo a koutou kararehe, ki te mea kua poto te moni.
- 17
- Na, ka kawea mai e ratou a ratou kararehe ki a Hohepa: a hoatu ana e Hohepa he taro ki a ratou hei utu mo nga hoiho, mo nga kahui hipi, me nga kahui kau, me nga kaihe ano hoki: a whangaia ana ratou e ia, ki te taro i taua tau, hei utu mo a ratou kararehe katoa.
- 18
- A te takanga o taua tau, na, ka haere mai ratou ki a ia i te rua o nga tau, a ka mea ki a ia, E kore e hunā e matou i toku ariki, kua poto te moni; kei toku ariki hoki a matou kahui kararehe; kahore he mea e toe ana hei tirohanga ma toku ariki, o matou tinana anake, me o matou oneone:
- 19
- Kia mate matou ki tou aroaro hei aha? matou tahi hoki me to matou oneone? hokona matou me to matou oneone ki te taro, a ka riro mai matou me to matou oneone hei pononga ma Parao: homai ano hoki he purapura, a ka ora matou, a e kore e mate, e kore ano hoki e ururuatia te whenua.
- 20
- Na, ka hokona e Hohepa te oneone katoa o Ihipa mo Parao: i hokona hoki e nga Ihipiana tana mara tana mara; he pehi rawa hoki na te matekai i a ratou: a riro mai ana te whenua i a Parao.
- 21
- A ka whakawhitiwhitia e ia nga tangata ki nga pa i tetahi pito o nga rohe o Mira, a puta noa ki tetahi pito o reira.
- 22
- Ko te oneone anake ia o nga tohunga kihai i hokona e ia; i whakaritea hoki tetahi wahi e Parao ma nga tohunga, a i kai ratou i to ratou wahi i homai e Parao ma ratou: koia tē hokona ai e ratou o ratou oneone.
- 23
- A i mea ano a Hohepa ki te iwi, Nana, kua hokona nei koutou e ahau inaianei, me to koutou oneone, ma Parao: na, he purapura ma koutou, ruia te whenua.
- 24
- A ka whai hua a mua, na, me homai koutou te rima o nga wahi ki a Parao, a ma koutou nga wahi e wha, hei purapura mo te mara, hei kai hoki ma koutou, ma te hunga hoki i roto i o koutou whare, hei kai ano hoki ma a koutou tamariki.
- 25
- A ka mea mai ratou, Ka ora matou i a koe: kia manakohia mai matou e toku ariki, a hei pononga matou ma Parao.
- 26
- Na, ka whakatakotoria te tikanga e Hohepa mo te oneone o Ihipa, a, tae noa ki tenei ra, ma Parao te rima o nga wahi; hāunga ia te oneone o nga tohunga, kihai hoki tena i riro mai i a Parao.
- 27
- Na, ka noho a Iharaira ki te whenua o Ihipa, ki te whenua o Kohena; a ka whai kāinga ratou ki reira, a ka hua, ka nui whakaharahara.
- 28
- A kotahi tekau ma whitu nga tau i ora ai a Hakopa ki te whenua o Ihipa: a kotahi rau e wha tekau ma whitu nga tau o te oranga o Hakopa.
- 29
- Na, ka whakatata mai nga ra o Iharaira e mate ai ia: a ka karanga ia i tana tamaiti i a Hohepa, a ka mea ki a ia, Na, ki te mea ka manakohia mai ahau e koe, tena, whakapakia mai tou ringaringa ki raro i taku huha, a whakaputaina mai he aroha he pono ki a au; kaua ra ahau e tanumia ki Ihipa:
- 30
- Engari kia takoto ahau ki oku mātua, me kawe atu ahau e koe i Ihipa, me tanu hoki ki roto ki to ratou urupa. A ka mea mai ia, Ka rite i a au to kupu.
- 31
- A ka mea atu ia ki a ia, Oati mai ki a au. A oati ana ia ki a ia. A ka piko iho a Iharaira ki runga ki te urunga o te moenga.
Address: 
Phone: 
Email: