- 1
- Na, ka manaakitia a Noa ratou ko ana tamariki e te Atua, a ka mea ia ki a ratou, Kia hua, kia tini koutou, kia kapi ano hoki te whenua i a koutou.
- 2
- Kia wehi ano hoki i a koutou, kia matakana i a koutou nga kirehe katoa o te whenua, nga manu katoa o te rangi, nga mea katoa e korikori ana i runga i te whenua, me nga ika katoa hoki o te moana; kua hoatu ena mea ki to koutou ringa.
- 3
- Hei kai ano ma koutou nga mea korikori katoa, nga mea ora; rite tonu ki to nga otaota matomato taku hoatutanga i nga mea katoa ki a koutou.
- 4
- Otiia, kaua e kainga te kikokiko me tona oranga, ara, me ona toto.
- 5
- Ka rapua hoki e ahau he utu mo o koutou toto e ora nei koutou; ka rapua e ahau he utu i nga kirehe katoa, i te tangata ano hoki; ka rapua e ahau he utu mo te matenga o te tangata i te teina o ia tangata o ia tangata.
- 6
- E whakaheke tetahi i nga toto o te tangata, ma te tangata ano ona toto e whakaheke: no te mea no te Atua te ahua i hangā ai e ia te tangata.
- 7
- Ko koutou hoki, kia hua, kia tini; kia nui to koutou uri ki runga ki te whenua, kia tini hoki ki reira.
- 8
- A i korero mai ano te Atua ki a Noa, ratou tahi ko ana tamariki, i mea,
- 9
- Ko au nei, nana, ka whakapumau ahau i taku kawenata ki a koutou ko to koutou uri i muri i a koutou;
- 10
- Ki nga mea ora katoa hoki i a koutou, ki te manu, ki te kararehe, ki nga kirehe katoa hoki o te whenua e noho ana i a koutou; ki nga mea katoa, i puta mai i roto i te aaka, a puta noa atu ki nga kirehe katoa o te whenua.
- 11
- Ka whakapumautia ano e ahau taku kawenata ki a koutou; e kore ano hoki e hatepea atu nga kikokiko katoa a muri ake nei e nga wai o te waipuke; e kore ano e puta mai he waipuke a muri ake nei hei whakangaro mo te whenua.
- 12
- A i mea ano te Atua, Ko te tohu tenei o te kawenata e whakatakotoria nei e ahau ki te takiwa oku o koutou ko nga wairua ora katoa i a koutou, a, tera whakatupuranga tera whakatupuranga:
- 13
- Ka whakatakotoria e ahau taku kopere ki te kapua, a ka waiho hei tohu mo te kawenata i te takiwa oku o te whenua.
- 14
- A tenei ake, i te wa e whakaputa mai ai ahau i te kapua ki runga ki te whenua, na, ka kitea te kopere i te kapua:
- 15
- A ka mahara ahau ki taku kawenata i te takiwa oku o koutou ko nga mea ora katoa, ara, o nga kikokiko katoa; a e kore nga wai e puke a muri ake nei hei whakangaro i nga kikokiko katoa.
- 16
- A ka piri te kopere ki te kapua; a ka titiro atu ahau ki taua mea, kia mahara ai ahau ki te kawenata e mau tonu ana i te takiwa o te Atua o nga wairua ora katoa, ara, o nga kikokiko katoa i runga i te whenua.
- 17
- Na, ka mea te Atua ki a Noa, Ko te tohu tenei o te kawenata e whakapumautia nei e ahau ki te takiwa oku o nga kikokiko katoa i runga i te whenua.
- 18
- A, nga tamariki a Noa, i puta mai nei i roto i te aaka, ko Hema, ko Hama, ko Iapeta: a ko Hama te matua o Kanaana.
- 19
- Ko nga tamariki tokotoru enei a Noa: a na enei i kapi ai te whenua katoa.
- 20
- Na, ka timata a Noa te ngaki whenua, a whakatongia ana e ia he mara waina:
- 21
- A ka inumia e ia te waina, a ka haurangi; na, ka takoto tahanga i roto i tona teneti.
- 22
- A, te kitenga o Hama, o te matua o Kanaana, i tona matua e takoto tahanga ana, na, ka korerotia e ia ki ona tuakana tokorua i waho.
- 23
- Na, ka tango a Hema raua ko Iapeta i tetahi kakahu, a makā iho ana e raua ki runga ki o raua pokohiwi, na, ka haere tuara atu raua, a hipokina ana te wahi i takoto kau o to raua papa; me te ahu mai ano o raua kanohi ki muri, a kihai raua i kite i te wahi takoto kau o to raua papa.
- 24
- A ka maranga ake a Noa i tana waina, a ka mohio ki ta tana tamaiti o muri mea ai ki a ia;
- 25
- Na, ka mea ia, Ka kangā a Kanaana, ka waiho ia hei tino pononga ma ona tuakana.
- 26
- A i mea ano ia, Kia whakapaingia a Ihowa te Atua o Hema; a ka waiho a Kanaana hei pononga mana.
- 27
- Ka meinga a Iapeta e te Atua kia tohatoha noa atu, ka noho ano hoki ia ki nga teneti o Hema; a hei pononga a Kanaana mana.
- 28
- A e toru rau e rima tekau nga tau i ora ai a Noa i muri iho i te waipuke.
- 29
- A e iwa rau e rima tekau tau nga ra katoa o Noa: na, ka mate.
Address: 
Phone: 
Email: