- 1
- Na, i tenei kapua nui o nga kai whakaatu e karapoti nei i a tatou, kia whakarerea e tatou nga whakataimaha katoa, me te hara whakaeke tata, a kia manawanui tatou kia omakia te omanga e takoto nei i to tatou aroaro;
- 2
- Me te titiro pu ano ki a Ihu, ki te kai timata ki te kai whakaoti i te whakapono; i whakaaro hoki ia ki te hari i tona aroaro, a whakamanawanui ana ki te ripeka, whakahawea ana ki te whakama, na, kua noho ki matau o te torona o te Atua.
- 3
- Whakaaroa hoki ia i whakamanawanui nei ki taua totohe nui a te hunga hara ki a ia, kei hoha o koutou ngakau, a ka ngakau kore koutou.
- 4
- Kahore ano i taea noatia te toto, i a koutou e tohe na e whawhai na ki te hara.
- 5
- Kua wareware ano koutou ki te whakahauhau e korero nei ki a koutou, me te mea he tamariki tupu koutou, E taku tamaiti, kaua e whakahawea ki ta te Ariki papaki, kei ngakau kore hoki ina riria e ia:
- 6
- E papaki ana hoki te Ariki ki tana e aroha ai, e whiua ana hoki e ia nga tamariki katoa e whakatamarikitia ana ki a ia.
- 7
- Ki te pāngia koutou e te whiu, e rite ana ta te Atua meatanga ki a koutou ki tana ki nga tamariki tupu; ko wai hoki te tamaiti e kore e pakia e te pāpā?
- 8
- Ki te kahore ia o koutou pakinga, te mea e whakawhiwhia ana ki te katoa, he poriro koutou, ehara i te tamariki.
- 9
- He matua ano o tatou no te wahi ki te kikokiko, he mea papaki tatou na ratou; i hopohopo ano tatou ki a ratou: kaua ianei e nui noa atu to tatou ngohengohe ki te Matua o nga wairua, kia ora ai?
- 10
- Ta ratou papaki hoki he torutoru nei nga ra, he mea ano na ta ratou ake i whakaaro ai; ta tenei ia mo te pai, kia whiwhi ai tatou ki tona tapu.
- 11
- Na, nga pakinga katoa e kore e kiia inaianei hei whakahari, engari hei whakapouri: muri iho ia ka puta mai te hua rangimarie o te tika, ki te hunga e whakamahia ana ki taua mea.
- 12
- Na, kia ara nga ringaringa kua tukua iho, me nga turi ngoikore:
- 13
- Hangā hoki etahi huarahi tika mo o koutou waewae, kei whakapeaua ketia atu te kopa; engari kia ora ake i te mate.
- 14
- Whaia te rongo kia mau ki nga tāngata katoa, me te tapu hoki, ki te kahore nei hoki tenei e kore tetahi tangata e kite i te Ariki.
- 15
- Me titiro marie kei Hapa tetahi i to te Atua aroha noa; kei pihi ake tetahi pakiaka o te kawa hei whakararuraru, a he tokomaha e poke;
- 16
- Kei puremu tetahi, kei ahua whakarihariha, kei pera me Ehau: ta tenei hoki, kotahi ano te kāinga i hokona ai e ia tona matamuatanga.
- 17
- E mātau ana hoki koutou ki tona hiahia i muri kia riro i a ia te manaakitanga, a whakahengia ana ia: kihai hoki i kitea he wahi mo te whakaputanga ketanga, i rapua marietia ano ia me te heke ano nga roimata.
- 18
- Ehara hoki i te mea kua tae koutou ki te maunga e taea te whakapa atu, ki te ahi e ka ana, ki te pango kerekere, ki te pouri, ki te tupuhi,
- 19
- Ki te tangi o te tetere, ki te reo e korero ana; i inoi ra te hunga i rangona ai kia kaua he kupu ki a ratou i muri iho:
- 20
- (Kihai hoki ratou i kaha ake ki te mea i whakaritea mai, Na, ahakoa he kararehe i pa atu ki te maunga, me aki ki te kohatu, me wero ranei ki te matia.
- 21
- Koia ano te mataku o te mea i puta mai ra, i mea ai a Mohi, Mataku rawa ahau, wiri rawa:)
- 22
- Engari kua tae nei koutou ki Maunga Hiona, ki te pa o te Atua ora, ki Hiruharama i te rangi, ki nga mano tini o nga anahera,
- 23
- Ki te huihuinga nui, ki te hahi o nga matamua, kua oti te tuhituhi ki te rangi, ki te Atua hoki ki te kai whakarite whakawa o nga tāngata katoa, ki nga wairua ano o te hunga tika, kua oti te mea kia tino tika,
- 24
- Ki a Ihu ano hoki ki te takawaenga o te kawenata hou, ki nga toto o te tāuhiuhinga, he pai ake nei nga korero i to Apera.
- 25
- Kia mahara kei whakarere koutou i tenei e korero mai nei. Ki te mea hoki kihai i mawhiti atu te hunga i paopao ki tera i korero ra i runga i te whenua, ina e kore rawa ano tatou, ki te tahuri ke atu i tenei kua korero mai nei i te rangi:
- 26
- Ngaueue ana te whenua i tona reo i reira: inaianei ia kua puaki tana kupu whakaari, kua mea ia, Kia kotahi ano meatanga a ehara i te mea ko te whenua anake, ko te rangi ano hoki taku e whakangaueue ai.
- 27
- Na, taua kupu nei, Kia kotahi meatanga, hei whakakite i te putanga ketanga o nga mea ka whakangaueuetia ra he mea hanga hoki; a mau tonu iho nga mea e kore nei e whakangaueuetia.
- 28
- Na, ka riro nei i a tatou he kingitanga e kore e taea te whakangaueue, kia whiwhi tatou ki te aroha noa, kia manakohia mai ai ta tatou e mahi nei ki te Atua i runga ano i te hopohopo i te wehi:
- 29
- He ahi hoki e kai ana to tatou Atua.
Address: 
Phone: 
Email: