- 1
- Na, kia mataku tatou, i te mea ka tukua iho nei he korero pai mo tatou kia tae atu ki tana okiokinga, kei tirohia mai tetahi o koutou kua mahue ki muri.
- 2
- He mea kauwhau hoki te rongo pai ki a tatou, he pera ano me tera i a ratou: heoi kihai te kupu i rangona i whai pai ki a ratou, no te mea kihai i whakananua ki te whakapono i roto i te hunga i rangona ai.
- 3
- Ka taea hoki te okiokinga e tatou e te hunga kua whakapono; ka rite ki tana i ki ra, No reira i riri ai ahau i oati ai hoki, E kore ratou e tae ki taku okiokinga: kua oti na hoki nga mahi i te timatanga ra ano o te ao.
- 4
- Ko tana kupu hoki tenei i tetahi wahi mo te ra whitu, A ka okioki te Atua i te ra whitu i ana mahi katoa.
- 5
- I tenei wahi ano hoki, E kore ratou e tae ki taku okiokinga.
- 6
- Na, tena atu ano he taenga atu mo etahi ki reira, kihai hoki te hunga i kauwhautia ai te rongo pai ki a ratou i mua i tae, no te mea kahore o ratou whakapono:
- 7
- He wahi ano ka motuhia mai e ia tetahi ra, i a ia i mea ra i ta Rawiri, Hei aianei, i muri i taua wa roa ra; ko te kupu hoki tenei, Hei aianei ki te rongo koutou ki tona reo, kaua e whakapakeketia o koutou ngakau.
- 8
- Me he mea hoki i whai okiokinga ratou i a Hohua, e kore e korerotia e ia tetahi atu ra i muri iho.
- 9
- Ina, tera atu ano he okiokinga mo te iwi o te Atua.
- 10
- Ki te tae hoki te tangata ki tona okiokinga, ka okioki ano ia i ana mahi ake, ka pera me te Atua i okioki i ana mahi ake.
- 11
- Na, kia puta to tatou uaua ki te tomo ki taua okiokinga, kei pera te whakapono kore o tetahi a ka hinga.
- 12
- Ora tonu hoki te kupu a te Atua, mana tonu, koi rawa atu i nga hoari matarua katoa, ngoto tonu, a wehea noatia te ngakau me te wairua, nga ponapona me te hinu wheua, e wawae ana ano i nga whakaaro me nga hihiritanga o te ngakau.
- 13
- Kahore hoki he mea hanga i ngaro ki tona aroaro: heoi e takoto kau ana e tuwhera ana nga mea katoa ki nga kanohi o to tatou kai whakawa.
- 14
- Na, he tino tohunga nui to tatou, kua tomo atu nei ki nga rangi, a Ihu te Tama a te Atua, kia mau pu tatou ki te tikanga i whakaaetia nei e tatou.
- 15
- Ehara hoki to tatou i te tohunga nui e kore nei e ahei kia mamae tahi me tatou e ngoikore nei; i whakamatautauria nei hoki ia i nga mea katoa, i peneitia me tatou nei, kahore ia he hara.
- 16
- Na, kia haere maia atu tatou ki te torona o te aroha noa, kia puta mai ai ki a tatou te mahi tohu, kia kitea ai e tatou ta te aroha noa hei awhina mai mo nga wa e pai ai.
Address: 
Phone: 
Email: