- 1
- Ko tenei Merekihereke hoki, kingi o Harema, tohunga o te Atua i runga rawa, i tutaki nei ki a Aperahama i a ia e hoki mai ana i te patunga i nga kingi, i manaaki nei i a ia;
- 2
- A hoatu ana e Aperahama ki a ia nga whakatekau o nga mea katoa; te whakamaoritanga nei o tona ingoa i te tuatahi ko te Kingi o te tika, a i muri iho ko te Kingi o Harema, ara, ko te Kingi o te rangimarie;
- 3
- He mea matua kore, whaea kore, kahore nei ona whakapapa tupuna, kahore he timatanga o ona ra, kahore he mutunga o tona oranga; he tangata kua whakaritea ki te Tama a te Atua, mau tonu ana ia hei tohunga.
- 4
- Na, whakaaroa te nui o tenei tangata, i hoatu nei ki a ia e te tupuna nui e Aperahama nga whakatekau o nga taonga parakete.
- 5
- Nga tama hoki a Riwai, ara, nga mea kua riro nei i a ratou te mahi tohunga, he ture ano kei a ratou kia tangohia ta te ture i whakarite ai, nga whakatekau a te iwi, he mea ano ena na o ratou tuakana, teina, i puta mai nei ano i te hope o Aperahama:
- 6
- Ko tenei tangata ia ehara nei i te mea no to ratou kawai, riro ana i a ia nga whakatekau a Aperahama, a manaakitia ana e ia te tangata i a ia nei nga kupu whakaari.
- 7
- Na, e kore rawa tenei e taea te whakateka, ara, ko te mea iti te manaakitia ana e te mea nui.
- 8
- I konei hoki e riro ana ano nga whakatekau i nga tāngata matemate nei; i reira ia i riro i tera e korerotia nei, kei te ora ia.
- 9
- Me penei ano taku ki, ko Riwai e tango whakatekau nei, i hoatu whakatekau ano ia i ta Aperahama meatanga ra.
- 10
- I roto hoki ia i te hope o tona pāpā i te tutakitanga o Merekihereke ki a ia.
- 11
- Na, ki te mea na ta te Riwai mahi tohunga i tino rite ai, (i na runga hoki i tera te rironga mai o te ture i te iwi,) he aha atu te mea e whakatika ai tetahi atu tohunga i runga i to Merekihereke ritenga, tē karangatia ra i runga i to Arona ritenga?
- 12
- Ka whakaputaia ketia hoki te mahi tohunga, ina, kua puta ke ano hoki te ture.
- 13
- Te tangata hoki mona enei korero, he hapu ke tona, kahore nei hoki tetahi o ratou i tatatata ki te āta.
- 14
- He mea takoto mārama hoki tenei, i puta ake to tatou Ariki i roto i a Hura: a hore rawa ā Mohi kupu mo te mahi tohunga a tenei iwi.
- 15
- Tenei ano hoki tetahi mea e tino mārama rawa ana: kua whakatika hoki tetahi atu tohunga, i runga i te ritenga o Merekihereke;
- 16
- A, tona whakatohungatanga, ehara i te mea no runga i te ture o nga tikanga o te kikokiko, engari no runga i te kaha o te oranga e kore e mutu.
- 17
- Kua whakaaturia mai nei hoki e ia, Hei tohunga koe ake ake i runga i te ritenga o Merekihereke.
- 18
- Kua whakakahoretia hoki te ture i whakatakotoria i mua, no te mea kahore ona kaha, kahore ona hua.
- 19
- Kahore hoki tetahi mea i tino tika i ta te ture: a kua kawea mai te mea pai rawa e tumanakohia atu nei; na tenei hoki tatou ka whakatata atu nei ki te Atua.
- 20
- Na, kihai nei i mahue te oati i to tenei whakatohungatanga:
- 21
- Ko era hoki kahore he oati i to ratou meatanga hei tohunga; he oati ia i to tenei, na tera hoki i ki mai ra ki a ia, Kua oati te Ariki a e kore e puta ke tona whakaaro, Hei tohunga koe ake ake i runga i te ritenga o Merekihereke:
- 22
- He nui noa atu hoki te pai o te kawenata, ko Ihu nei tona kai whakamau.
- 23
- Ko ratou ano he tokomaha nga tohunga, kahore hoki i tukua e te mate kia mau roa ta ratou:
- 24
- Ko tenei ia, e mau tonu ana ake ake, a e kore e puta ke tana mahi tohunga.
- 25
- Na, e taea ano e ia te tino whakaora te hunga e na runga atu ana i a ia ki te Atua, e ora tonu ana hoki ia hei inoi mo ratou.
- 26
- Pai rawa hoki tenei tu tohunga nui mo tatou, te tapu, te kino kore, te poke kore, he mea motu ke i te hunga hara, kua whakanekehia ake ano hoki ki runga ake i nga rangi;
- 27
- Kahore ana mea, e pera ai ia me nga tohunga nui, e whakaeke patunga tapu ai ia, i ia ra, i ia ra, mo ona hara ake i te tuatahi, muri iho mo o te iwi; kotahi tonu hoki tona meatanga i tenei, i tana whakaekenga atu i a ia.
- 28
- A te ture tohunga nui hoki e whakarite ai ko nga tāngata he ngoikore nei o ratou; ta te kupu ia o te oati, i muri nei i te ture, ko te Tama, kua oti nei te mea kia tino tika, a ake ake.
Address: 
Phone: 
Email: