- 1
- A, ka puta ake he wana i te take i a Hehe, ka tupu ake ano he Peka i roto ona pakiaka.
- 2
- Ka noho hoki te wairua o Ihowa ki runga ki a ia, te wairua o te whakaaro nui, o te matauranga, te wairua o te whakatakoto whakaaro, o te kaha, te wairua o te mohiotanga, o te wehi ki a Ihowa;
- 3
- Hei mea i a ia kia whai whakaaro i runga i te wehi ki a Ihowa: e kore ano ia e whakarite whakawa i runga i ta ona kanohi e kite ai, e kore ano e whakaaro ki ta ona taringa e rongo ai, ina riria e ia te he.
- 4
- Engari ka whakarite whakawa ia mo nga rawa-kore i runga i te tika, i runga ano i te tika tana riri i te he, he whakaaro nana ki te hunga mahaki o te whenua; he whiu na tona mangai tana patu mo te whenua, ka whakamatea ano e ia te tangata kino ki te manawa o ana ngutu.
- 5
- A hei whitiki te tika mo tona hope, hei whitiki ano te pono mo ona whatumanawa.
- 6
- Ka noho tahi ano te wuruhi raua ko te reme, ka takoto tahi te reparo raua ko te kuao koati; te kuao kau, te kuao raiona, te mea momona, kotahi ano ropu, a he tamaiti ririki mana ratou e arahi.
- 7
- Ka kai ano te kau raua ko te pea, ka takoto tahi ano hoki a raua kuao: ka rite ano te raiona ki te kau, ka kai i te kakau witi.
- 8
- Ka takaro ano te tamaiti ngote u i runga i te rua o te ahipi, a ka pa atu te ringa o te tamaiti kua whakamutua te kai u ki te nohoanga o te neke.
- 9
- E kore ratou e tukino, e kore ano e whakamate puta noa i toku maunga tapu: no te mea ka kapi te whenua i te matauranga ki a Ihowa, ano ko nga wai e taupoki nei i te moana.
- 10
- I taua rangi ano, na, ko tetahi pakiaka o Hehe, ka tu hei kara ki nga iwi, ka rapua mai e nga tauiwi, tona okiokinga ano hoki kororia rawa.
- 11
- I taua rangi ano ka anga mai ano te ringa o te Ariki, he mea kia tuaruatia ai nga rironga mai o nga morehu o tona iwi e mahue i Ahiria, i Ihipa, i Patoro, i Kuhu, i Erama, i Hinara, i Hamata, i nga motu ano o te moana.
- 12
- Ka whakaturia ano e ia he kara ki nga iwi, a ka huihuia mai te hunga o Iharaira i peia atu, ka whakaminea mai ano nga mea o Hura i marara atu i nga pito e wha o te whenua.
- 13
- Ka riro ano te hae o Eperaima, ka hatepea atu ano hoki nga hoa riri o Hura: e kore a Eperaima e hae ki a Hura, e kore ano hoki a Hura e whakatoi ki a Eperaima.
- 14
- Engari ka rere ratou i runga i nga pokohiwi o nga Pirihitini ki te taha ki te hauauru, ka pahuatia ngatahitia e ratou te hunga o te rawhiti, ka pa o ratou ringa ki runga ki a Eroma raua ko Moapa, ka whakarongo mai ano nga tamariki a Amono ki a ratou.
- 15
- Ka whakangaromia ano hoki e Ihowa, te arero o te moana i Ihipa, he nui ano tana hau ina rūrū tona ringa ki runga ki te awa, ina patua e ia, me ona awa ano e whitu, a ka haere maroke atu nga mea whai hu.
- 16
- A ka takoto he ara haerenga mai i Ahiria mo nga morehu o tona iwi ka mahue; ka rite ano ki to Iharaira i te ra i haere mai ai ia i te whenua o Ihipa.
Address: 
Phone: 
Email: