- 1
- I aua ra ka mate a Hetekia, me kahore ka marere. Na, ko te haerenga mai o Ihaia poropiti tama a Amoho ki a ia, ka mea ki a ia. Ko te kupu tenei a Ihowa, Whakahaua iho tou whare, no te mea ka mate koe, e kore e ora.
- 2
- Te tino tahuritanga atu o te mata o Hetekia ki te pakitara, ka inoi ki a Ihowa,
- 3
- Ka mea, Tena ra, e Ihowa, kia mahara ra ki aku haereerenga i tou aroaro i runga i te pono, i te ngakau tapatahi, ki taku meatanga i te pai ki tau titiro iho. Na, tangi ana a Hetekia; nui atu te tangi.
- 4
- Na ka puta mai te kupu a Ihowa ki a Ihaia, ka mea,
- 5
- Haere, mea atu ki a Hetekia, Ko te kupu tenei a Ihowa Atua o Rawiri, o tou tupuna, Kua whakarangona mai tau inoi e ahau, kua kitea e ahau ou roimata: nana, ka tapiritia ano e ahau ou ra ki nga tau kotahi tekau ma rima.
- 6
- Ka whakaorangia ano koe, me tenei pa, e ahau, i te ringa o te kingi o Ahiria; ka tiakina ano hoki e ahau tenei pa;
- 7
- Ko te tohu ano tenei a Ihowa ki a koe mo te kupu i korero ai ia ka oti i a Ihowa:
- 8
- Nana, ka whakahokia ake e ahau te atarangi i nga nekehanga i heke atu ai i runga i te whakaatu haora a Ahata; kia tekau nga nekehanga whakamuri. Na, kotahi tekau nga nekehanga i hoki ake ai te ra, no nga nekehanga ano i heke iho ai.
- 9
- Te tuhituhinga a Hetekia kingi o Hura, i a ia i mate ra, a ora ake ana i tona mate.
- 10
- I mea ahau i te mea ka poroa putia oku ra, Tera ahau e haere ki nga kuwaha o te rua tupapaku, ka whakakahoretia nga toenga o oku tau.
- 11
- I ki ahau, E kore ahau e kite i a Ihowa, i a Ihowa i runga i te whenua o te hunga ora; heoi ano aku tirohanga atu ki te tangata, ki te hunga ano hoki e noho ana i te ao.
- 12
- Te whakatupuranga i a au nei kua riro, mahue iho ahau, ano he teneti no te hepara, taku motuhanga atu i toku ora rite tonu ki ta te kai whatu kakahu; tapahia mai ana ahau e ia i roto i nga miro: i te ao, i te po mutu pu taku i a koe.
- 13
- I whakaaroaro ahau, a taea noatia te ata, tera tana e rite ki ta te raiona, ka wawahia e ia oku iwi katoa; i te ao, i te po mutu pu taku i a koe.
- 14
- Taku tangi, rite tonu ki ta te kareni, ki ta te warou, me te mea he kukupa ahau e tangi ana; matawaia ana oku kanohi i te tirohanga whakarunga. E Ihowa, e tukinotia ana ahau, pikitia toku turanga.
- 15
- Kia pehea he kupu maku? Nana i korero mai ki a au, nana ano i mahi; i oku tau katoa ka ata haere ahau i runga i te kawa o toku wairua.
- 16
- E te Ariki, kei enei mea te ora, kei enei mea katoa ano hoki te ora o tou wairua. Tera ano ahau ka whakahokia ake e koe ki te ora, a ka ora ahau.
- 17
- Nana, i runga ake o te rongo mau nui atu te kawa ki a au; otiia kua aroha nei koe ki toku wairua, a whakaorangia ake ahau i roto i te rua whakamoti: kua oti nei hoki oku hara katoa te maka e koe ki muri i tou tuara.
- 18
- E kore hoki te rua tupapaku e whakawhetai ki a koe, e kore te mate e whakamoemiti ki a koe; te hunga e heke atu ana ki te rua kahore o ratou tumanakohanga atu ki to pono.
- 19
- Te tangata ora, te tangata ora, mana te whakawhetai ki a koe, te penei ano me taku nei i tenei ra: tera to pono ka whakakitea e te matua ki nga tamariki.
- 20
- I tata mai a Ihowa ki te whakaora i a au, mo reira ka waiatatia e ahau aku waiata i nga ra katoa e ora ai ahau i roto ano i te whare o Ihowa.
- 21
- I ki hoki a Ihaia, Tikina he papa piki, whakapiritia atu ki te whewhe, a ka ora ia.
- 22
- I ki ano hoki a Hetekia, He aha te tohu moku ka haere nei ki runga ki te whare o Ihowa.
Address: 
Phone: 
Email: