- 1
- Whakamarietia, whakamarietia toku iwi, e ai ta to koutou Atua.
- 2
- Korero atu ki te ngakau o Hiruharama, karanga atu ki a ia, kua mutu tana whawhaitanga, kua manakohia tana mo tana he: i haere rua mai hoki ta te ringa o Ihowa ki a ia hei utu mo ona hara katoa.
- 3
- He reo no tetahi e karanga ana i te koraha, Whakapaia te huarahi o Ihowa, whakatikaia i te titohea he ara nui mo to tatou Atua.
- 4
- Ko nga raorao katoa ka whakanekehia ake, ko nga maunga katoa me nga pukepuke ka whakapapakutia iho, ko nga wahi kopikopiko ka meinga kia tika, nga wahi taratara kia papatairite.
- 5
- Ka whakapuakina mai ano te kororia o Ihowa, a ka kite ngatahi nga kikokiko katoa: he mea korero mai nei hoki tenei na te mangai o Ihowa.
- 6
- I mea mai te reo, Karanga. A ka mea ia, Ko te aha kia karangatia e ahau? He tarutaru nga kikokiko katoa, tona pai katoa ano hoki rite tonu ki te puawai o te mara.
- 7
- Ko te tarutaru ka maroke, ko te puawai ka memenge, no te mea e hangia atu ana e te wairua o Ihowa: he pono he tarutaru te iwi.
- 8
- Ko te tarutaru e maroke, ko te puawai e memenge; te kupu ia a to tatou Atua ka tu tonu.
- 9
- E Hiona, e te kai kawe o te rongo pai, e piki ki runga ki te maunga tiketike; whakarahia tou reo, kia kaha, e Hiruharama, e te kai kawe o te rongo pai; whakarahia, kaua e wehi: mea atu ki nga pa o Hura, Nana, to koutou Atua.
- 10
- Nana, ka haere mai te Ariki a Ihowa i runga i te kaha, ka whakahaerea ano hoki tona kingitanga e tona ringaringa: na, te utu mona kei a ia ano, kei tona aroaro ano hoki tana mahi.
- 11
- Ka rite ki ta te hepara tana whangai i tana kahui, ka whakaminea mai e ia nga reme ki tona ringaringa, ka hikitia ki tona uma, ka ata arahina nga mea e hapu ana.
- 12
- Na wai i mehua nga wai ki te kapu o tona ringa, he whangāngā ringaringa ano hoki tana ruri mo nga rangi, whaowhina ake e ia te puehu o te whenua ki te mehua, nga maunga paunatia ana e ia ki te pauna ringaringa, nga pukepuke ki te pauna papa?
- 13
- Na wai i whakatikatika ta te Wairua o Ihowa? ko wai ranei tana kai whakatakoto whakaaro hei whakaako i a ia?
- 14
- Ko wai tona hoa whakatakoto whakaaro hei tohutohu i a ia, hei whakaako i a ia, ki te ara o te whakarite whakawa, hei whakaako i a ia ki te matauranga, hei whakakite mai i te ara o te mohiotanga ki a ia?
- 15
- Nana, nga iwi, ano he pata wai i roto i te pēre! ki ta te whakaaro iho he puehu ririki ratou i te pauna; nana, nga motu, maua ake e ia, he mea ririki rawa te rite.
- 16
- E kore ano e ranea a Repanona mo te ahi, me nga kararehe ano o reira, e kore e ranea hei tahunga tinana.
- 17
- Nga iwi katoa, he kore noa iho i tona aroaro; iti iho ratou i te kahore; he horihori kau ki tana whakaaro iho.
- 18
- Ka whakaritea ano e koutou te Atua ki a wai? he aha hoki te ahua e whakaahuatia ai ia e koutou?
- 19
- E whakarewaina ana he whakapakoko e te kai mahi, whakakikoruatia iho e te kai tahu ki te koura, hangā ana e ia nga mekameka hiriwa.
- 20
- He rawa-kore nei ia, kahore ana whakahere, heoi whiriwhiria ana e ia he rakau e kore e pirau, rapua ana e ia he kai mahi mohio mana hei hanga mai i tetahi whakapakoko, e kore e nekenekehia.
- 21
- Kahore ianei koutou i mohio? kahore koutou i rongo? kahore ianei i korerotia mai ki a koutou i te timatanga? kahore ianei koutou i mātau i nga whakaturanga ra ano o te whenua?
- 22
- Ko ia te noho ana i runga i te whenua porotaka; o reira tangata ano hoki, ano he mawhitiwhiti; nga rangi horahia atu ana e ia, ano he kakahu tauarai, horahia atu ana e ia ano he teneti hei nohoanga:
- 23
- Nga rangatira whakahokia iho e ia ki te kahore; nga kai whakarite whakawa o te whenua meinga ana e ia hei mea horihori noa iho.
- 24
- Ae ra, e kore ratou e whakatokia, e kore ano ratou e waiho hei purapura, e kore ano to ratou take e whai pakiaka ki runga ki te whenua: ka pupuhi atu ano ia ki a ratou, a ka maroke ratou; ka rite ano ratou ki te kakau witi, ka kawhakina e te paroro.
- 25
- Na, ki ta koutou, kei to wai he ahua moku? ka rite ranei ahau ki a wai? e ai ta te Mea Tapu.
- 26
- E ara o koutou kanohi ki runga titiro ai, na wai enei mea i hanga, na wai o ratou mano i whakaputa mai he mea tatau tonu: karangatia ana e ia nga ingoa o ratou katoa, he nui hoki no tona marohirohi; e kore tetahi e ngaro atu.
- 27
- He aha koe i korero ai, e Hakopa, i mea ai, e Iharaira, Kua huna toku ara ki a Ihowa, kua riro atu ta toku Atua whakarite whakawa moku?
- 28
- Kahore koe i mohio? kahore koe i rongo, ko te Atua onamata, ko Ihowa ko te kai hanga o nga pito o te whenua, e kore ia e ngenge, e kore ia e mauiui? e kore tona matauranga e taea te rapu atu.
- 29
- E homai ana e ia he kaha ki te hunga ngenge; e whakanuia ana e ia nga mea ngoi-kore.
- 30
- E ngenge nga taitamariki, e mauiui, nga taitama papai hinga rawa:
- 31
- Tena ko te hunga e tatari ana ki a Ihowa, puta ke ana he kaha mo ratou; kake ana ratou ki runga; nga parirau, koia ano kei o nga ekara; ka rere ratou, a e kore e mauiui, ka haere, a e kore e ngenge.
Address: 
Phone: 
Email: