- 1
- Waiata, e te pakoko kahore ano i whanau; kia pakaru mai te waiata ki waho, hamama, e koe kahore ano kia mamae i te whanautanga: he tini hoki nga tamariki a te mea whakarere i nga tamariki a te mea whai hoa, e ai ta Ihowa.
- 2
- Kia rahi atu te turanga mo to teneti; kia maro hoki nga uhi o ou nohoanga: aua e kaiponuhia; kia roa o taura, kia u hoki o poupou.
- 3
- Ta te mea hoki ka tohatoha noa atu koe ki matau, ki maui; a ka riro mai nga tauiwi i ou uri; ma ratou ano ka nohoia ai nga pa kua ururuatia.
- 4
- Kaua e wehi; ta te mea e kore koe e whakama; kaua ano hoki e numinumi, ta te mea e kore koe e whakama; no te mea ka wareware i a koe te whakama o to tamahinetanga; a heoi ano maharatanga ki te ingoa kino o tou pouarutanga.
- 5
- Ta te mea ko tou kai hanga tou tahu; ko Ihowa o nga mano tona ingoa; ko te Mea Tapu hoki o Iharaira tou Kai whakaora; ko te Atua o te whenua katoa ka huaina ki a ia.
- 6
- No te mea kua karanga a Ihowa ki a koe, ano he wahine kua oti te whakarere, kua pouri hoki tona ngakau, me te hoa wahine taitamariki hoki, i a koe i whakarerea ra, e ai ta tou Atua.
- 7
- He nohinohi te wahi i mahue ai koe i a au; he nui ia nga atawhainga e kohikohi ai ahau i a koe.
- 8
- He iti te riri, wahi iti nei hoki i ngaro atu ai toku kanohi i a koe; e mau tonu ana ia te aroha e aroha ai ahau ki a koe; e ai ta Ihowa, ta tou Kai whakaora.
- 9
- He penei hoki tenei ki a au me nga wai i a Noa; i a au ra i oati atu, e kore e hurihia ano te whenua e nga wai i a Noa: waihoki ka oati nei au, e kore ahau e riri ki a koe, e kore ano e whakatupehupehu ki a koe.
- 10
- Ta te mea hoki ko nga maunga ka riro ke, ko nga pukepuke hoki ka nekehia atu; tena ko toku aroha e kore e rere ke i a koe, e kore ano e nekehia ketia te kawenata e mau ai taku rongo; e ai ta Ihowa e atawhai nei i a koe.
- 11
- E koe, kua whakawhiua nei, kua puhia nei e te awha! kahore ano i whakamarietia, nana, maku ou kohatu e whakatakoto, he pai hoki te kakano; ka hangā ano e ahau ou turanga ki te hapira.
- 12
- Ka hangā ano e ahau ou matapahi ki te akate, ou tatau hoki ki te karapanaka, ou rohe katoa ano ki nga kohatu whakapaipai.
- 13
- A ka whakaakona katoatia o tamariki e Ihowa; ka nui hoki te rangimarie ki o tamariki.
- 14
- Ka whakaturia koe ki runga ki te tika, ka whakamataratia atu i a koe te tukino; e kore hoki koe e wehi; e kore ano hoki te pawera e tata mai ki a koe.
- 15
- Nana, huihui noa ratou, ehara ia i te mea naku: te tangata e huihui mai ana ki te whawhai ki a koe ka papahoro mai ki a koe.
- 16
- Nana, naku i hanga te parakemete e pupuhi ana i nga waro i roto i te ahi, e mau mai ana hoki i te mea hei mahi mana: naku hoki te kai huna i hanga hei whakamoti.
- 17
- E kore tetahi patu e hangā ana mou e marohirohi: nga arero katoa e whakatika mai ana ki a koe ki te whakawa, mau ano e whakahe. Ko ta nga pononga a Ihowa tenei, tuku iho, tuku iho; naku hoki ratou i tika ai, e ai ta Ihowa.
Address: 
Phone: 
Email: