- 1
- Ko te kupu tenei a Ihowa, Puritia te whakarite whakawa, mahia te tika; no te mea ka tata he putanga mai mo taku whakaoranga, he whakakitenga mo taku tika.
- 2
- Ka hari te tangata nana tenei mahi, te tama ano hoki a te tangata e hopukia atu ana tenei e ia, e puritia ana e ia te hapati, a e kore e whakapokea, e tiakina ana hoki e ia tona ringa kei mahia tetahi he.
- 3
- Kaua hoki te tama a te tangata ke, kua honoa nei ki a Ihowa, e korero, e mea, Kua wehea rawatia atu ahau e Ihowa i roto i tona iwi; kaua ano hoki te unaka e ki, Nana, he rakau maroke ahau.
- 4
- Ko ta Ihowa kupu hoki tenei ki nga unaka e pupuri ana i aku hapati, e whiriwhiri ana i nga mea e paingia ana e ahau, a e hopu mai ana i taku kawenata;
- 5
- Ka hoatu ano e ahau he wahi ki a ratou i roto i toku whare, i roto ano i oku taiepa, he ingoa ano hoki e pai ake ana i o nga tamariki, i o nga tamahine; he ingoa mau tonu taku e hoatu ai ki a ratou, he mea e kore e hatepea atu.
- 6
- Nga tamariki ano hoki a te tangata ke, kua oti te hono ki a Ihowa, he mea kia mahi ai ratou ki a ia, kia aroha ano hoki ki te ingoa o Ihowa, kia waiho hei pononga mana; te hunga katoa e pupuri ana i te hapati, e kore e whakapokea e ratou, a e hopukia mai ana e ratou taku kawenata;
- 7
- Ka kawea ratou e ahau ki taku maunga tapu, ka whakahari ano hoki ahau i a ratou i roto i toku whare inoi; ka manakohia a ratou tahunga tinana, me a ratou patunga tapu i runga i taku aata; no te mea ka karangatia toku whare, He whare inoi mo nga iwi katoa.
- 8
- He kupu tenei na te Ariki na Ihowa, na te kai kohikohi mai o te hunga o Iharaira i peia atu, Ka kohikohia atu ano hoki e ahau ki a ia etahi hei tapiri mo era kua oti te kohikohi atu ki a ia.
- 9
- E nga kirehe katoa o te parae, haere mai ki te kai, e nga kirehe katoa o te ngahere.
- 10
- Ona kai tutei, matapo katoa ratou, kahore ratou e mohio, he kuri reo-kore ratou, e kore e tau, he momoe, he takoto, e matenui ana ki te moe.
- 11
- He kuri hiahia taikaha ratou, e kore e mohio ki te makona; he hepara ratou e kore e ngoto te matauranga: anga katoa ana ratou ki tana ara, ki tana ara, ki te mea taonga mona i tona wahi, i tona wahi.
- 12
- Ta ratou ki, Haere mai, maku e tiki he waina, kia nui ano ta tatou inu i te wai kaha; a ka rite te rangi apopo ki tenei ra, ka nui noa atu ano hoki.
Address: 
Phone: 
Email: