- 1
- Ko wai tenei e haere mai nei i Eroma, i Potora, oti rawa nga kakahu te rongoa? tenei he kororia rawa nei ona kakahu, e haere ana i runga i te nui o tona kaha? Ko au e korero atu nei i runga i te tika, ko te mea kaha ki te whakaora.
- 2
- He aha i whero ai ou kakahu? i rite ai o weweru ki o te kai takahi i te takahanga waina?
- 3
- Na toku kotahi te takahanga waina i takahi, kahore hoki he tangata o te iwi hei hoa moku: takahia iho ratou e ahau, he riri naku; takatakahia ana ratou e ahau i a au e weriweri ana; patī ana o ratou toto ki oku weruweru, whakapokea iho e ahau toku kakahu katoa.
- 4
- Kei roto hoki i toku ngakau te ra o te rapu utu; kua tae mai ano hoki te tau o aku i hoko ai.
- 5
- Titiro rawa atu ahau, na, kahore he kai awhina, miharo ana ahau no te mea kahore he kai tautoko ake: na kua meatia e toku tākakau he whakaoranga moku; toku weriweri, na tera ahau i tautoko ake.
- 6
- Ka takahia ano hoki e ahau nga iwi i a au e riri nei; i a au ano e weriweri ana ka whakahaurangitia ratou e ahau, ka riro ano i a au to ratou kaha ki raro ki te whenua.
- 7
- Ka whakahuatia e ahau nga mahi aroha a Ihowa, nga whakamoemiti ki a Ihowa, ka rite ki nga mea i homai e Ihowa ki a tatou, ki te nui hoki o te pai ki te whare o Iharaira i homai nei e ia ki a ratou; he mea i rite tonu ki ana mahi tohu tangata, ki te nui ano hoki o ana mahi aroha.
- 8
- I mea hoki ia, He pono, ko toku iwi ratou, he tamariki e kore e korero teka: na, kua meinga ia hei Kai whakaora mo ratou.
- 9
- I o ratou pouritanga-ngakau katoa i pouri ano ia, whakaorangia ake ana ratou e te anahera o tona aroaro; he aroha nona, he mahi tohu tangata i hoko ai i a ratou, hikitia ana ratou e ia, whakahaereerea ana ratou e ia i nga ra katoa onamata.
- 10
- Heoi whakakeke ana ratou, whakapouritia iho e ratou tona Wairua Tapu. Na, ka puta ke ia hei hoa riri mo ratou, kei te whawhai ano ia ki a ratou.
- 11
- Otiia i mahara ano ia ki nga ra o mua, ki a Mohi, ki tona iwi, i mea ia, Kei hea te kai kawe mai o ratou, o te kai whangai ano o tana kahui i te moana? kei hea te kai whakanoho o tona Wairua Tapu ki roto ki a ia?
- 12
- I arahi nei i a ratou, he meatanga na te ringa matau o Mohi, na tona tākakau kororia, wahia ana e ia nga wai i to ratou aroaro, hei mea i tetahi ingoa mona e mau tonu ana.
- 13
- I arahi nei i a ratou i waenganui o te moana, ano he hoiho i te koraha, tē hinga ratou?
- 14
- Kei te kararehe e haere ana ki raro ki te awaawa te rite, pera tonu ta te Wairua o Ihowa meatanga i a ia kia okioki: pera tonu to arahanga i to iwi, i whai ingoa kororia ai koe.
- 15
- Titiro mai i runga i te rangi, matakitaki mai i runga i te nohoanga o to tapu, o tou kororia: kei hea tou ngakau nui, me to kaha, te ohoohonga o ou whekau, o o mahi tohu ki a au? kua pehia iho ranei?
- 16
- He pono ko koe to matou pāpā, kahore nei hoki a Aperahama e mohio ki a matou, kahore ano hoki a Iharaira e mahara ki a matou: ko koe, e Ihowa, to matou pāpā, to matou kai hoko; no namata tou ingoa.
- 17
- Na te aha koe, e Ihowa, i mea ai i a matou kia kotiti atu i o ara, whakapakeketia iho e koe o matou ngakau kia kaua e wehi ki a koe. Hoki mai, kia mahara ki o pononga ki nga hapu o tou kāinga pumau.
- 18
- He iti nei te wahi i mau ai taua kāinga ki te iwi o tou tapu: e takatakahia ana to wahi tapu e o matou hoa riri.
- 19
- Nau matou: kihai koe i kingi ki a ratou i mua, kihai to ingoa i karangatia ki a ratou.
Address: 
Phone: 
Email: