- 1
- Ko te kupu tenei a Ihowa, Ko te rangi toku torona, ko te whenua toku turanga waewae: kei hea te whare ka hangā nei e koutou moku? kei hea hoki te wahi hei okiokinga moku?
- 2
- Enei mea katoa hoki he mea hanga na toku ringa, a e mau nei ano enei mea katoa, e ai ta Ihowa; ko tenei ia taku e titiro atu ai, ko te tangata e iti ana, kua maru te wairua, a e wiri ana ki taku kupu.
- 3
- Te tangata e patu ana i te kau, me te mea e tukituki ana i te tangata; te tangata he reme nei tana patunga tapu, me te mea he kaki kuri e poutoa ana e ia; te tangata e whakaeke ana i te whakahere, me te mea e whakaeke ana i te toto poaka; te tangata e tahu ana i te whakakakara, me te mea e manaaki ana i te whakapakoko. Ae ra, kua whiriwhiria e ratou ā ratou ara, e ahuareka ana hoki to ratou wairua ki ā ratou mea whakarihariha.
- 4
- Ka whiriwhiria ano hoki e ahau ā ratou whakaaro horihori, ka kawea atu ano e ahau ā ratou i wehi ai ki runga ki a ratou; no te mea i karanga atu ahau, a kihai tetahi i whakao mai, i korero atu ahau, a kihai ratou i rongo; heoi mahia ana e ratou te kino i taku tirohanga atu, a whiriwhiria ana e ratou te mea kihai i paingia atu e ahau.
- 5
- Whakarongo mai ki te kupu a Ihowa, e te hunga e wiri ana ki tana kupu; O koutou tuakana i kino ra ki a koutou, a i pei i a koutou, he whakaaro ki toku ingoa, i mea ratou, Kia whakakororiatia a Ihowa: ka puta atu ano hei oranga ngakau mo koutou; a ko ratou e whakama.
- 6
- He reo, he ngangau, kei te pa, he reo kei te temepara, ko te reo o Ihowa e whakahoki ana i te utu ki ona hoa riri.
- 7
- Kiano i whakamamae, kua whanau; kiano i pa atu ona mamae, kua puta he tamaiti tane.
- 8
- Ko wai i rongo i te penei? ko wai i kite i nga mea penei? E whakamamae ranei te whenua i te ra kotahi? e whanau ranei te iwi i te meatanga kotahi? whakamamae kau hoki a Hiona, kua whanau ana tamariki.
- 9
- Tera ranei e meinga e ahau kia taka te ara, a kia kaua e whanau? e ai ta Ihowa; ka meinga ranei e ahau kia whanau, a kopia iho te kopu? e ai ta tou Atua.
- 10
- Kia koa tahi me Hiruharama, whakamanamana ki a ia, e te hunga katoa e aroha ana ki a ia; kia hari tahi me ia, kia hari, e te hunga katoa e tangi ana ki a ia.
- 11
- He mea hoki ka ngote koutou, a ka makona i te u, ara, i ana whakamarietanga, he mea hoki ka whakatētē koutou, ka ora te ngakau ki te nui o tona kororia.
- 12
- Ko te kupu hoki tenei a Ihowa, Nana, ano he awa te rangimarie ka horahia atu e ahau ki a ia; ano he waipuke te kororia o nga Tauiwi: ko reira koutou ngote ai, ka hikitia koutou ki ona taha, ka poipoia ki runga ki ona turi.
- 13
- Ka rite ano hoki ki te tangata e whakamarietia ana e tona whaea, ka whakamarie ano ahau i a koutou; ka whai whakamarietanga ano hoki koutou i roto i Hiruharama.
- 14
- Ka kite koutou i tenei, ka koa o koutou ngakau; o koutou wheua, koia ano kei te otaota te tupu: a ka mohiotia te ringaringa o Ihowa ki ana pononga, tana riri ki ona hoa riri.
- 15
- No te mea tenei a Ihowa ka haere mai nei i roto i te ahi, ona hariata ano hoki koia ano kei te tukauati; ki te tuku atu i tana riri i runga i te weriweri, i tana whakatupehupehu i roto i nga mura ahi.
- 16
- No te mea he ahi ta Ihowa, me tana hoari ano, ina totohe ia ki nga kikokiko katoa, ka tokomaha ano hoki nga tupapaku a Ihowa.
- 17
- Te hunga e whakatapu ana i a ratou, e pure ana i a ratou i roto i nga kāri, e whai ana i a Akara i waenganui o te hunga e kai ana i te kikokiko poaka, i te mea whakarihariha, i te kiore, ka pau ngatahi ratou, e ai ta Ihowa.
- 18
- E mohio ana hoki ahau ki ā ratou mahi, ki ā ratou whakaaro. Tenei ake ka huihuia mai e ahau nga iwi katoa, nga reo, a ka haere mai ratou, ka kite i toku kororia.
- 19
- Ka meinga ano e ahau he tohu i roto i a ratou, ka ungā ano e ahau ā ratou morehu ki nga iwi, ki Tarahihi, ki Puru, ki Ruru, ki te hunga kukume kopere, ki Tupara, ki Iawana, ki nga motu i tawhiti kihai nei i rongo i te rongo ki a au, kihai ano i kite i toku kororia; a ka whakaaturia e ratou toku kororia i roto i nga Tauiwi.
- 20
- Ka kawea mai ano e ratou o koutou teina i roto i nga iwi katoa hei whakahere ki a Ihowa, i runga i nga hoiho, i runga i nga hariata, i runga i nga amo, i runga i nga muera, i runga i nga kamera tere, ki toku maunga tapu ki Hiruharama, e ai ta Ihowa; ka rite ki ta nga tamariki a Iharaira e kawe nei i te whakahere i roto i te oko ma ki te whare o Ihowa.
- 21
- Ka tangohia ano hoki e ahau etahi o ratou hei tohunga, hei Riwaiti, e ai ta Ihowa.
- 22
- Ka rite hoki ki te rangi hou, ki te whenua hou, ka hangā nei e ahau, a ka pumau tonu ki toku aroaro, e ai ta Ihowa; ka pera ano te pumau o to koutou uri, o to koutou ingoa.
- 23
- A tenei ake ka haere mai nga kikokiko katoa i tenei marama, i tenei marama, i tenei hapati, i tenei hapati, ki te koropiko ki toku aroaro, e ai ta Ihowa.
- 24
- A ka haere atu ratou, ka matakitaki ki nga tinana o nga tangata i he nei ki a au: e kore hoki to ratou kutukutu e mate, e kore ano to ratou ahi e tineia, a hei mea whakarihariha ratou ki nga kikokiko katoa.
Address: 
Phone: 
Email: