- 1
- E kore ano ia e pouri tonu te whenua i mamae nei; i te wa i mua i whakaititia e ia te whenua o Hepuruna, te whenua o Napatari: i te whakamutunga ia ka whakakororiatia i te ara o te moana, i tera taha o Horano, i Kariri o nga tauiwi.
- 2
- Te hunga i haereere i te pouritanga, kua kite ratou i te māramatanga nui, nga tangata e noho ana i te whenua i te atarangi o te mate, kua puta ake te māramatanga ki a ratou.
- 3
- Kua whakatokomahatia e koe te iwi, whakanuia ana e koe he koa mona; koa noa iho ratou ki tou aroaro, me te mea e koa ana ki te kotinga witi, e whakamanamana ana ranei ki nga taonga parakete e wehewehea ana.
- 4
- Whati pu hoki i a koe te ioka o tana kawenga, te rakau whiu mo tona pokohiwi, te rakau a tona kai whakatupu kino, koia ano kei to te ra i a Miriana.
- 5
- Nga tatauranga katoa hoki a te kai tatau he ngangau, he kakahu i whakatakatakā ki te toto; ko tenei ia hei tahunga, hei kai ma te ahi.
- 6
- Kua whanau nei hoki he tamaiti ma tatou, kua homai he tamaiti ki a tatou, a ki runga ki tona pokohiwi te rangatiratanga; na, te ingoa e karangatia ki a ia Ko Whakamiharo, ko Kai whakatakoto whakaaro, ko te Atua kaha rawa, ko te Matua o nga wa mutunga-kore, ko te Rangatira o te Rongo mau.
- 7
- Tona kingitanga, te mau o tana rongo, ka nui haere, hore rawa he mutunga, ki runga ano ki te torona o Rawiri, ki runga i tona rangatiratanga, a u noa, mau noa i runga i te whakarite whakawa, i runga i te tika inaianei, a ake tonu atu. Ka oti tenei i te ngakau whakapuke o Ihowa o nga mano.
- 8
- I ungā atu e te Ariki he kupu ki a Hakopa, a tau tonu atu ki a Iharaira.
- 9
- A ka mohio te iwi katoa, a Eperaima ratou ko te tangata o Hamaria, he whakapehapeha nei, he ngakau nui nei to ratou ki te ki mai,
- 10
- Kua horo nga pereki, a ma tatou e hanga ki nga kohatu tarai; kua oti nga hikamora te tapahi, ka puta ke i a matou hei hita.
- 11
- Na ka whakaarahia e Ihowa nga hoa riri o Retini ki a ia, ka oho mai ano hoki i a ia ona hoa whawhai.
- 12
- Ko nga Hiriana ki mua, ko nga Pirihitini ki muri, a hamama tonu mai ratou ki te kai i a Iharaira. Ahakoa ko tenei katoa e kore tana riri e tahuri atu, maro tonu tona ringa.
- 13
- No te mea kihai te iwi i tahuri mai ki to ratou kai whiu, kihai ano i rapu i a Ihowa o nga mano.
- 14
- Mo reira ka tapahia mai e Ihowa i a Iharaira te upoko me te hiawero, te peka me te wiwi, kotahi tonu te rangi.
- 15
- Te kaumatua me te tangata ingoa nui, ko ia te upoko; te poropiti whakaako teka, ko ia te hiawero.
- 16
- Ko nga kai arahi hoki o tenei iwi hei whakapohehe i a ratou, a, ngaro iho te hunga e arahina ana e ratou.
- 17
- No reira kahore o te Ariki koa ki ā ratou taitamariki, e kore ano e tohungia e ia a ratou pani, me a ratou pouaru; no te mea he ngutu kau ratou katoa, he kai mahi i te kino, he wairangi te korero a nga mangai katoa. Ahakoa ko tenei katoa, e kore tana riri e tahuri atu, maro tonu tona ringa.
- 18
- No te mea ka ngiha te kino, ano he ahi: ka pau i a ia nga tataramoa me nga tumatakuru, ka ka ano hoki ki roto ki nga rakau pururu o te ngahere, ka rere whakarunga ano hoki, ka pera me te paowa e kake ana.
- 19
- Na te riri a Ihowa o nga mano i pouri ai te whenua; hei kai ano te iwi ma te ahi; e kore tona tuakana, tona teina e tohungia e tetahi tangata.
- 20
- Ka tapahia mai ano e ia mana i te taha ki matau, a ka mate-kai ano; ka kai ano i te taha ki maui, e kore ano ratou e makona: ka kainga e ratou te kikokiko o tona ringaringa, o tona ringaringa;
- 21
- Ta Manahe ko Eperaima, ta Eperaima ko Manahe, ta raua tahi ko Hura. Ahakoa ko tenei katoa, e kore tana riri e tahuri atu, maro tonu tona ringa.
Address: 
Phone: 
Email: