- 1
- Na hemi, na te pononga a te Atua, a te Ariki hoki a Ihu Karaiti, ki nga hapu kotahi tekau ma rua e noho marara ana; Tena koutou.
- 2
- Kiia iho, e aku teina, he mea hari nui ina taka koutou ki nga whakamatautauranga maha;
- 3
- E mātau ana hoki koutou, ko te whakamatautauranga o to koutou whakapono hei mahi i te manawanui.
- 4
- Na, kia puta rawa te mahi a te manawanui, kia tino tika ai koutou, kia toitu ai, tē hapa i te aha i te aha.
- 5
- Ki te hapa tetahi o koutou i te matauranga, me inoi ia ki te Atua, e homai nui nei ki te katoa, kahore hoki ana tawai mai; a ka homai ki a ia.
- 6
- Otira me inoi whakapono ia, kaua e ruarua. Te tangata ruarua hoki, tona rite kei te ngaru o te moana, e puhia ana e te hau e akina ana.
- 7
- Kaua hoki taua tangata e mea, e whiwhi ia ki tetahi mea i te Ariki.
- 8
- E kore te tangata ngakau rua e u i ana hanga katoa.
- 9
- Te teina iti, kia whakamanamana ia i te mea ka whakanekehia ake ia:
- 10
- Me te tangata taonga ano, i te mea ka whakaititia: ka memeha atu hoki ia, ano he pua tarutaru.
- 11
- Te putanga mai hoki o te ra me te werawera ano, na, kua maroke te tarutaru, kua ngahoro tona puawai, a ngaro iho te ataahua o tona ahua: ka pera ano te tangata taonga ka memeha atu i ona haereerenga.
- 12
- Ka hari te tangata e u ake ana ki te whakamatautauranga: no te mea hoki ka oti ia te whakamatautau, ka whiwhi ia ki te karauna o te ora, kua whakaaria mai nei e te Ariki mo te hunga e aroha ana ki a ia.
- 13
- Kaua tetahi e mea ina whakamatautauria, E whakamatautauria ana ahau e te Atua: e kore hoki te Atua e taea te whakamatautau e te kino, e kore ano hoki ia e whakamatautau i tetahi:
- 14
- Engari he mea whakamatautau te tangata, i a ia e kumea ana e poaina ana e tona hiahia ake ano.
- 15
- Na, te hapunga o te hiahia, ka whanau ko te hara; a, te otinga o te hara, ka whanau ko te mate.
- 16
- Kei whakapohehetia koutou, e aku teina aroha.
- 17
- No runga nga homaitanga papai katoa, nga mea katoa e tino tika ana, he mea heke iho no te Matua o nga whakamarama, kahore nei ona putanga ketanga, kahore hoki he atarangi o te tahuri.
- 18
- Na tona hiahia ake ano tatou i whanau ai, he meatanga na te kupu o te pono, kia meinga ai tatou hei matamua mo ana mea i hanga ai.
- 19
- Na, e aku hoa aroha, kia hohoro nga tāngata katoa ki te whakarongo, kia puhoi ki te korero, kia puhoi ki te riri:
- 20
- E kore hoki ta te Atua tika e mahia e ta te tangata riri.
- 21
- Na, me whakarere katoa atu nga tikanga poke, me te hara e hua tonu nei, me tahuri marire ki te kupu kua oti te whakato iho; e taea hoki e tenei te whakaora o koutou wairua.
- 22
- A hei kai mahi ano koutou i te kupu, kaua hei kai whakarongo anake, kei tinihangatia koutou e koutou ano.
- 23
- Ki te mea hoki he kai whakarongo tetahi i te kupu, a ehara i te kai mahi, e rite ana ia ki te tangata e matakitaki ana ki tona kanohi maori i roto i te whakaata:
- 24
- Tana matakitakinga hoki i a ia ano, haere ana, wareware tonu ake he ahua pehea ranei tona.
- 25
- Tena ko te tangata e ata titiro iho ana ki te ture tino tika, ki te mea here kore, a ka u tonu, he kai whakarongo ano ia e kore e wareware, engari e mahi ana i te mahi, e hari ano tenei i tana mahi.
- 26
- Ki te mea he ahua karakia to tetahi i roto i a koutou, a kahore e parairetia e ia tona arero, he tinihanga hoki nona ki tona ngakau, he maumau karakia tana.
- 27
- Te karakia pono, te mea poke kore, ki te aroaro o te Atua Matua, ko ia tenei, Ko te tirotiro i nga pani i nga pouaru i o ratou matenga, ko te tiaki i a ia ake kei poke i te ao.
Address: 
Phone: 
Email: