- 1
- Kua oti te hara o Hura te tuhituhi ki te pene rino, ki te mata o te raimona, whaowhao rawa ki te papa, ara, ki o ratou ngakau, ki nga haona ano hoki o o koutou aata;
- 2
- I ā ratou tamariki ka mahara nei ki o ratou aata, ki a ratou ngahere i te taha o nga rakau kouru nui, i runga i nga pukepuke tiketike.
- 3
- E taku maunga i te parae, ka hoatu e ahau ou rawa, ou taonga katoa, kia pahuatia, me o wahi tiketike nga mea mo te hara, puta noa i o rohe katoa.
- 4
- Ka whakamutua ano hoki tau, tau ra, i to kāinga tupu i hoatu e ahau ki a koe, a ka meinga koe e ahau kia mahi ki o hoa riri ki te whenua kihai i mohiotia e koe; no te mea kua ngiha i a koutou he ahi i a au e riri ana, tona ka, mau tonu.
- 5
- Ko te kupu tenei a Ihowa, Ka kangā te tangata e whakawhirinaki ana ki te tangata, a e mea ana i te kikokiko hei ringaringa mona, e kotiti atu ana hoki tona ngakau i a Ihowa.
- 6
- Ka rite ano ia ki te kahikatoa i te koraha, e kore ano e kite i te putanga mai o te pai; engari ko nga wahi wai-kore o te koraha hei kāinga mona, he whenua tote, e kore nei e nohoia.
- 7
- Ka manaakitia te tangata e whakawhirinaki atu ana ki a Ihowa, ko Ihowa ano hoki tana e tumanako atu ai.
- 8
- Ka rite ano ia ki te rakau i whakatokia ki te taha o nga wai, e totoro atu ana ona pakiaka ki te awa, e kore ano e kite i te putanga mai o te mahana, matomato tonu tona rau, e kore e manukanuka i te tau raki, e kore ano hoki e mutu tona whai hua.
- 9
- Te tinihanga o te ngakau, nui atu i nga mea katoa, kino rawa: e mohiotia ranei e wai?
- 10
- Taku, ta Ihowa, he rapu i ta te ngakau, he whakamatautau i nga whatumanawa, he mea kia hoatu ai ki tenei, ki tenei, nga mea e rite ana ki tana ara ake, ki nga hua ano hoki o ana mahi.
- 11
- Ta te patiri, he pehi i nga hua, kore ake e paopao, ka pena ano te tangata e mahi ana i te taonga, kahore noa iho ia he tikanga; i waenganui o ona ra ka mahue i a ia, wairangi noa iho ia i tona mutunga iho.
- 12
- He tiketike, he torona kororia no te timatanga iho ra ano, to tatou wahi tapu.
- 13
- E Ihowa, e ta Iharaira e tumanako atu nei, ka whakama te hunga katoa e whakarere ana i a koe. Ka tuhituhia ki te whenua te hunga e kotiti atu ana i a au, mo ratou i whakarere i te puna-wai ora, i a Ihowa.
- 14
- Rongoatia ahau, e Ihowa, a ka mahu toku mate; whakaorangia ahau, a ka ora au: ko koe hoki taku e whakamoemiti ai.
- 15
- Nana, kei te ki mai ratou ki a au, Kei hea te kupu a Ihowa? tena ra, kia puta mai.
- 16
- Na, ahau nei, kihai ahau i hohoro atu i te mahi hepara i muri i a koe, kihai ano hoki ahau i hiahia ki te ra o te mamae; e mohio ana ano koe: tika tonu i to aroaro te mea i puta atu i oku ngutu.
- 17
- Kei waiho koe hei whakawehi moku: ko koe hoki taku e tumanako atu ai i te ra o te he.
- 18
- Kia whakama te hunga e tukino ana i a au, kaua hoki ahau e whakama: kia wehi ratou, kaua hoki ahau e wehi: kawea atu te ra o te kino ki runga ki a ratou, kia rua ano hoki nga wawahanga e wahia ai ratou e koe.
- 19
- I penei mai ta Ihowa kupu ki a au, Haere, e tu ki te kuwaha o nga tamariki a te iwi, ki te wahi e tomo ai nga kingi o Hura, e haere atu ai, ki nga kuwaha katoa ano hoki o Hiruharama;
- 20
- Ka mea atu ki a ratou, Whakarongo mai ki te kupu a Ihowa, e nga kingi o Hura, e Hura katoa, e nga tangata katoa ano hoki o Hiruharaina e tomo ana ki roto ki enei kuwaha:
- 21
- Ko te kupu tenei a Ihowa, Kia tupato koutou, kaua he kawenga e wahā i te ra hapati, kaua ano e maua i nga kuwaha o Hiruharama.
- 22
- Kaua ano hoki e whakaputaina atu he kawenga i roto i o koutou whare i te ra hapati, kaua ano e mahia tetahi mahi; engari me whakatapu te ra hapati, kia rite ki taku i whakahau ai ki o koutou mātua.
- 23
- Heoi kihai ratou i whakarongo, kihai ano i tahuri mai o ratou taringa, na, whakapakeketia ana e ratou o ratou kaki, kahore noa iho e rongo, kahore noa iho e manako mai ki te whakatupato.
- 24
- Na, ki te ata whakarongo koutou ki a au, e ai ta Ihowa, a e kore e mau i te kawenga i nga kuwaha o tenei pa i te ra o te hapati, engari e whakatapu ana i te ra hapati, a e kore e mahia tetahi mahi i reira,
- 25
- Katahi ka tomo ki roto ki nga kuwaha o tenei pa nga kingi me nga rangatira, he hunga e noho ana i runga i te torona o Rawiri, e eke ana ki runga ki nga hariata, ki nga hoiho, ratou, a ratou rangatira, me nga tangata ano o Hura, me te hunga ano e noho ana i Hiruharama; ka tūturu ano hoki tenei pa, a ake ake ake.
- 26
- A ka haere mai nga tangata i nga pa o Hura, i nga taha ano o Hiruharama, i te whenua o Peniamine, i te mania, i te maunga, i te tonga, ka maua mai he tahunga tinana, he patunga tapu, he whakahere, he whakakakara, ka maua mai ano he whakawhetainga, ki te whare o Ihowa.
- 27
- Tena ko tenei e kore koutou e whakarongo ki taku, kia whakatapua te ra hapati, kia kaua hoki e maua he kawenga, a ka tomo ki roto ki nga kuwaha o Hiruharama i te ra hapati, katahi ka ngiha i a au he ahi i nga kuwaha o reira, a ka pau nga whare kingi o Hiruharama, e kore ano e tineia.
Address: 
Phone: 
Email: