- 1
- I taua wa ano, e ai ta Ihowa, ka waiho ahau hei Atua mo nga hapu katoa o Iharaira, a ko ratou hei iwi moku.
- 2
- Ko te kupu tenei a Ihowa, Te iwi i toe i te hoari, i manakohia ratou i te koraha; ara, a Iharaira, i a au ra i haere atu ki te mea tānga manawa mona.
- 3
- I puta mai a Ihowa ki a au i mua noa atu, i mea, Na, mau tonu te aroha i aroha ai ahau ki a koe, no reira te atawhai i kukume ai ahau i a koe.
- 4
- Tera ano koe ka hangā e ahau, ina, ka hangā koe, e te wahina o Iharaira, tera ano koe ka whakapaipaia ki o timipera, a ka haere atu koe, kanikani tonu, i roto i te hunga koa.
- 5
- Tera ano koe ka whakato i nga mara waina ki runga ki nga maunga o Hamaria; ka whakato nga kai whakato, a ka noa ano hei kai ma ratou.
- 6
- No te mea kua rite te ra e karanga ai nga kai tiaki i runga i Maunga Eperaima, Whakatika, tatou ka haere ki runga ki Hiona ki a Ihowa ki to tatou Atua.
- 7
- No te mea ko te kupu tenei a Ihowa, Waiata i te koa ki a Hakopa, hamama i roto i nga iwi rangatira, korerotia atu, whakamoemititia, mea atu, Whakaorangia, e Ihowa, tou iwi, nga toenga o Iharaira.
- 8
- Nana, ka kawea mai ratou e ahau i te whenua ki te nota, ka kohikohia mai ano hoki i nga taha o te whenua, ratou tahi ko nga matapo, ko nga kopa, ko te wahine e hapu ana, me te wahine ano e whakamamae ana, he nui te huihui e hoki mai ki konei.
- 9
- He tangi ta ratou ina haere mai, ka arahina ano ratou e ahau i runga i te inoi, ka meinga ratou e ahau kia haere i te taha o nga awa wai, he tika ano te ara; e kore o ratou waewae e tūtuki i reira; no te mea ko au hei pāpā mo Iharaira, ko Eperaima ano hei matamua ki a au.
- 10
- Whakarongo ki te kupu a Ihowa, e nga iwi, korerotia hoki ki nga motu o tawhiti, mea atu, Te kai titaritari o Iharaira, mana ratou e kohikohi, mana matou e tiaki, ka rite tana ki ta te hepara ki tana kahui.
- 11
- Kua hokona nei hoki a Hakopa e Ihowa; utua ana ia, tangohia mai ana i roto i te ringa o te mea i kaha rawa i a ia.
- 12
- Mo reira ka haere mai ratou, ka waiata i te wahi tiketike o Hiona, ka rere a wai ano hoki ki te pai o Ihowa, ki te witi, ki te waina, ki te hinu, ki nga kuao a nga hipi, a nga kau, ka rite ano hoki o ratou wairua ki te kāri kua oti te whakamakuku, a heoi ano to ratou tangihanga.
- 13
- Katahi te wahina ka koa ki te kanikani, nga taitamariki ngatahi ano ko nga kaumatua, no te mea ka puta ke i a au to ratou tangi hei koa, ka whakamarietia ano hoki ratou, ka whakaharitia, i a ratou e mamae ana.
- 14
- Ka whaowhina ano e ahau te wairua o nga tohunga ki te ngako, ka makona ano hoki toku iwi i toku pai, e ai ta Ihowa.
- 15
- Ko te kupu tenei a Ihowa, I rangona he reo ki Rama, he uhunga, he tangi, tiwerawera ana, a Rahera e tangi ana ki ana tamariki, a kihai i pai kia whakamarietia mo ana tamariki, kua kahore nei.
- 16
- Ko te kupu tenei a Ihowa, Whakamutua te tangi o tou reo, nga roimata o ou kanohi; no te mea ka whai utu to mahi, e ai ta Ihowa, a ka hoki mai ratou i te whenua o te hoa riri.
- 17
- Ka whai tumanakohanga atu hoki to whakamutunga, e ai ta Ihowa, ka hoki mai nga tamariki ki ta ratou rohe.
- 18
- He pono kua rongo ahau i ta Eperaima tangi ki a ia, Kua pakia nei ahau e koe, kua pakia ahau; toku rite kei te kau kihai i whakaakona: mau ahau e whakatahuri, a ka tahuri ahau; ko koe nei hoki a Ihowa toku Atua.
- 19
- He pono i muri i toku tahuritanga i ripeneta ahau; i muri ano i toku whakaakoranga i papaki ahau i toku huha, i whakama ahau, i numinumi kau ano hoki; no te mea e wahā ana e ahau te ingoa kino o toku taitamarikitanga.
- 20
- He tamaiti matenui ianei a Eperaima naku? he tamaiti ahuareka ianei? no taku korerotanga hoki i te he mona mau tonu taku maharahara ki a ia; na reira oku whekau i oho ai ki a ia, tera ano ia ka tohungia e ahau, e ai ta Ihowa.
- 21
- Whakaturia ake etahi tohu huarahi mau, hangā etahi puranga tiketike, kia anga to ngakau ki te huanui, ki te ara i haere ai koe: hoki mai, e te wahina a Iharaira, hoki mai ki enei pa ou.
- 22
- Kia pehea te roa o to kopikopiko, e te tamahine tahurihuri ke? ka hangā nei hoki e Ihowa he mea hou ki runga ki te whenua, he tangata i roto i te wahine karapoti pu.
- 23
- Ko te kupu tenei a Ihowa o nga mano, Atua o Iharaira, Tera ano tenei kupu ka korerotia e ratou ki te whenua o Hura, ki ona pa ano hoki, ina whakatahuritia atu e ahau to ratou whakaraunga, Kia manaakitia koe, e te nohoanga o te tika, e te maunga tapu.
- 24
- A ka noho ki Hura na ano, ki ona pa ano hoki, hui katoa, nga kai ngaki whenua, me te hunga ano e haere tahi ana me nga kahui.
- 25
- Ka whaowhina nei hoki e ahau te wairua ruha, ka whakakīa ano hoki nga wairua katoa e pouri ana.
- 26
- I maranga ahau i konei, taku tirohanga atu, na, he reka ki a au taku moe.
- 27
- Nana, kei te haere mai nga ra, e ai ta Ihowa, e whakatokia ai e ahau te whare o Iharaira me te whare ano o Hura, ko te tangata hei purapura, ko te kararehe hei purapura.
- 28
- Na, tenei ake ka rite ki taku tirotirohanga atu ki a ratou i mua, he mea kia hutia atu, kia wahia iho, kia turakina ki raro, kia whakangaromia, kia whakatupuria kinotia, ka pena ano taku tirotiro i a ratou, he mea kia hangā, kia whakatokia, e ai ta Ihowa.
- 29
- I aua rangi ano ka mutu te ki ake, I kai nga mātua i nga karepe kaiota, a moniania ana nga niho o nga tamariki.
- 30
- Engari ka mate tenei tangata, tenei tangata, i runga i tana kino, i tana kino; te tangata e kai ana i te karepe kaiota, ko ona niho ano e moniania.
- 31
- Nana, kei te haere mai nga ra, e ai ta Ihowa, e whakaritea ai e ahau he kawenata hou ki te whare o Iharaira, ki te whare ano o Hura.
- 32
- E kore e rite ki te kawenata i whakaritea e ahau ki o ratou mātua i te ra i puritia ai e ahau o ratou ringaringa, a kawea mai ana ratou i te whenua o Ihipa; i a ratou ra i whakataka i taku kawenata, i a au ano i waiho hei tahu marena mo ratou, e ai ta Ihowa.
- 33
- Engari ko te kawenata tenei e whakaritea e ahau ki te whare o Iharaira i muri i aua rangi, e ai ta Ihowa, Ka hoatu e ahau taku ture ki o ratou wahi i roto, ka tuhituhia ano hoki ki o ratou ngakau, a ko ahau hei Atua mo ratou, ko ratou ano hei iwi moku.
- 34
- I muri nei kahore he whakaako a tetahi tangata i tona hoa tata, a tetahi tangata ranei i tona teina, kahore he ki atu, Kia mohio koutou ki a Ihowa; no te mea ka mohio ratou katoa, te iti, te rahi, ki a au, e ai ta Ihowa, no te mea ka whakarerea noatia e ahau ta ratou kino, a heoi ano aku maharatanga atu ki to ratou hara.
- 35
- Ko te kupu tenei a Ihowa nana nei i homai te ra hei whakamārama i te awatea, me nga tikanga o te marama, o nga whetu, hei whakamārama i te po, ko ia nei te kai wahi o te moana i te mea e haruru ana ona ngaru, Ko Ihowa o nga mano tona ingoa.
- 36
- Ki te neke atu enei tikanga i toku aroaro, e ai ta Ihowa, ko reira ano ka kore te uri o Iharaira hei iwi i toku aroaro a ake ake ake.
- 37
- Ko te kupu tenei a Ihowa, Ki te mea ka taea nga rangi i runga te ruri, ki te mea ano ka taea nga turanga o te whenua i raro te rapu atu, katahi ano ahau ka whakaparahako ki nga uri katoa o Iharaira mo nga mea katoa i mahia e ratou, e ai ta Ihowa.
- 38
- Nana, kei te haere mai nga ra, e ai ta Ihowa, e hangā ai te pa hei mea ki a Ihowa, i te pourewa atu ano o Hananeere tae noa ki te kuwaha o te koki.
- 39
- Tera ano hoki te aho ruri ka tae atu ki tona ritenga atu, ki te pukepuke ki Karepe, taiawhio tonu atu ki Koata.
- 40
- Na, te raorao katoa i nga tupapaku, i nga pungarehu, me nga mara katoa, a tae noa ki te awa, ki Kitirono, ki te koki i te kuwaha hoiho, ki te taha ki te rawhiti, tapu katoa ki a Ihowa; e kore e hutia atu, e kore ano e wahia iho a ake ake.
Address: 
Phone: 
Email: