- 1
- Katahi ka haere mai nga rangatira katoa o nga ope, ratou ko Hohanana tama a Karea, ko Tetania tama a Hohaia, ko te iwi katoa, te iti, te rahi.
- 2
- A ka mea ki a Heremaia poropiti, Tena, kia puta atu ta matou inoi ki to aroaro; mau ano e inoi mo matou ki a Ihowa ki tou Atua mo enei morehu katoa; he torutoru hoki o tatou ka toe nei i roto i te tokomaha; ka kite mai nei hoki o kanohi i a matou:
- 3
- Kia whakaaturia mai ano e Ihowa e tou Atua ki a matou te ara e haere ai matou, te mea e mahi ai matou.
- 4
- Na, ko te kianga mai a Heremaia poropiti ki a ratou, Kua rongo atu ahau, Nana, ka inoi tenei ahau ki a Ihowa ki to koutou Atua, ka pena ano me ta koutou i ki mai na, a nga kupu katoa e whakahokia mai e Ihowa ki a koutou, ka whakaaturia e ahau ki a koutou; e kore tetahi kupu e kaiponuhia e ahau ki a koutou.
- 5
- Katahi ratou ka ki mai ki a Heremaia, Ko Ihowa hei kai whakaatu pono, hei kai whakaatu tika, mo ta tatou, me kahore e rite ta matou e mea ai ki nga kupu katoa e ungā mai ai koe e Ihowa e tou Atua ki a matou.
- 6
- Ahakoa pai, ahakoa kino, ka whakarongo matou ki te reo o Ihowa o to tatou Atua, ka ungā atu nei koe e matou ki a ia; kia whai pai ai matou, i a matou ka whakarongo nei ki te reo o Ihowa o to tatou Atua.
- 7
- Na, i te mutunga o nga ra kotahi tekau ka puta mai te kupu a Ihowa ki a Heremaia.
- 8
- Katahi tera ka karanga atu ki a Hohanana tama a Karea, ratou ko ona hoa, ko nga rangatira katoa o nga ope, ki te iwi katoa ano hoki, ki te iti, ki te rahi,
- 9
- A ka mea ki a ratou, Ko te kupu tenei a Ihowa Atua o Iharaira, kua ungā atu nei ahau e koutou ki a ia, ki te kawe atu i ta koutou inoi ki tona aroaro;
- 10
- Ki te tahuri koutou, a ka noho ki tenei whenua, katahi ahau ka hanga i a koutou, e kore ano koutou e wahia iho, ka whakatokia ano hoki koutou, e kore ano koutou e hutia atu: no te mea e ripeneta ana ahau ki te kino kua oti nei i a au te mea ki a koutou.
- 11
- Kaua e wehi ki te kingi o Papurona ki ta koutou e wehi na: kaua e wehi ki a ia, e ai ta Ihowa; no te mea kei a koutou ahau hei whakaora i a koutou, hei tango mai i a koutou i roto i tona ringaringa.
- 12
- Ka puta atu ano hoki aku mahi atawhai ki a koutou, a ka atawhai ia i a koutou, ka whakahoki ano i a koutou ki to koutou oneone.
- 13
- Tena ko tenei ka mea koutou, E kore matou e noho ki tenei whenua, a kahore e rongo ki te reo o Ihowa o to koutou Atua,
- 14
- Ka mea, Kahore: engari me haere tatou ki te whenua o Ihipa, ki te wahi e kore nei matou e kite i te whawhai, e kore ano e rongo i te tangi o te tētere, e kore ano e hiakai taro; a hei reira tatou noho ai.
- 15
- Na, kia rongo mai koutou aianei, e nga morehu o Hura, ki te kupu a Ihowa, Ko te kupu tenei a Ihowa o nga mano, Atua o Iharaira, Ki te mea ka anga tonu o koutou kanohi ki te haere ki Ihipa, a ka haere koutou ki reira noho ai;
- 16
- Na, ka mau koutou ki reira ki te whenua o Ihipa i te hoari e wehi na koutou, ka whaia ano hoki koutou e te hemo-kai e wehi na koutou, ki reira ki te whenua o Ihipa; a ka mate ki reira.
- 17
- Na, nga tangata katoa e anga ana o ratou kanohi ki te haere ki Ihipa ki reira noho ai, ka mate i te hoari, i te hemo-kai, i te mate uruta, e kore tetahi o ratou e toe, e mawhiti i roto i te kino e takina e ahau ki runga ki a ratou.
- 18
- No te mea ko te kupu tenei a Ihowa o nga mano, Atua o Iharaira, Ka rite ki taku ringihanga i taku riri, i taku weriweri, ki runga ki nga tangata o Hiruharama, ka pena ano taku ringihanga atu i taku weriweri ki runga ki a koutou, ina tae koutou ki Ihipa: a hei kanga koutou, hei miharotanga, hei kohukohunga, hei ingoa kino; e kore ano koutou e kite i tenei wahi i nga wa i muri.
- 19
- Kua puaki ta Ihowa kupu mo koutou, E nga morehu o Hura, kaua e haere ki Ihipa: kia tino mohio koutou kua oti te whakaatu e ahau ki a koutou i tenei ra.
- 20
- I tinihanga hoki koutou i roto i o koutou ngakau, i a koutou ra i unga i a au ki a Ihowa ki to koutou Atua, i a koutou i ki ra, Inoi mo matou ki a Ihowa ki to tatou Atua; a, nga mea katoa e korerotia mai e Ihowa e to tatou Atua, mau e whakaatu mai ki a matou, a ka mahia e matou.
- 21
- Heoi kua whakaaturia atu nei e ahau i tenei ra ki a koutou, a kihai koutou i whakarongo ki te reo o Ihowa o to koutou Atua, ki nga mea katoa ano hoki i ungā mai ai ahau ki a koutou.
- 22
- Ko tenei kia tino mohio koutou, tera koutou e mate i te hoari, i te hemo-kai, i te mate uruta, ki te wahi i pai ai koutou kia haere ki reira noho ai.
Address: 
Phone: 
Email: