- 1
- Ko te kupu tenei a Ihowa mo nga tamariki a Amono, Kahore ianei ā Iharaira tamariki? kahore ona tangata hei whakarerenga iho mo ana taonga? He aha ra a Kara i riro ai i a Marakomo? he aha tona iwi i noho ai ki roto ki ona pa?
- 2
- Mo reira, tenei nga ra te haere mai nei, e ai ta Ihowa, e meinga ai e ahau te hamamatanga o te whawhai kia rangona ki Rapa o nga tamariki a Amono, a ka waiho hei puranga kua ururuatia, ka wera ano hoki ana tamahine i te ahi; a ka riro i a Iharaira nga taonga a te hunga i a ratou nei āna i mua, e ai ta Ihowa.
- 3
- E aue, e Hehepono, kua pahuatia hoki a Ae: hamama e nga tamahine a Rapa; whitikiria te kakahu taratara, e tangi, kopikopiko ano hoki ki te taha o nga taiepa; no te mea ka riro a Marakomo i te whakaraunga, ona tohunga, ngatahi ano ko ona rangatira.
- 4
- He aha koe i whakamanamana ai ki nga raorao? ka rere a wai to raorao, e te tamahine tahurihuri ke, e whakawhirinaki nei ki ona taonga, e mea nei, Ko wai e haere mai ki a au?
- 5
- Tenei au te taki mai nei i te wehi ki runga ki a koe, e ai ta te Ariki, ta Ihowa o nga mano, he mea na te hunga katoa i tetahi taha ou, i tetahi taha; a ka aia atu koutou, tenei tangata, tenei tangata, i te wahi e rite tonu mai ana ki a ia; kahore hoki he kai kohikohi mo te tangata e kopikopi noa ana.
- 6
- A, muri iho ka whakatahuritia atu e ahau te whakaraunga o nga tamariki a Amono, e ai ta Ihowa.
- 7
- Ko te kupu tenei a Ihowa o nga mano mo Eroma, Kahore atu ranei he whakaaro nui i Temana? kua moti ianei te whakahaere korero a nga mea mohio? kua poto ranei a ratou whakaaro nui?
- 8
- E rere koutou, tahuri atu, hei roto riro he nohoanga mo koutou, e nga tangata o Rerana; no te mea ka takina atu e ahau te aitua o Ehau ki runga ki a ia, i te wa e tirotirohia ai ia e ahau.
- 9
- Ki te mea kua tae mai nga kai kohikohi karepe ki a koe, e kore ianei e mahue i a ratou etahi karepe hei hamunga? ki te mea he kai tahae i te po, ka whakakorekorea e ratou, a kia maha ra ano ma ratou.
- 10
- Ahau ia, kua hurahia e ahau to Ehau, kua takoto kau i a au ona wahi ngaro tē ahei ia te huna i a ia: kua oti ona uri te pahua, ona teina, ona hoa tata, kua kore noa iho ano hoki ia.
- 11
- Waiho o pani, maku e whakaora; o pouaru ano hoki, kia whakawhirinaki ratou ki a au.
- 12
- Ko te kupu hoki tenei a Ihowa, Nana, te hunga kihai nei i takoto te tikanga kia inumia te kapa e ratou, inumia putia ake e ratou; a ko koe ranei te mea e whakaharakoretia rawatia? e kore koe e whakaharakoretia; engari ka inumia rawatia ano e koe.
- 13
- No te mea kua waiho ahau e ahau ano hei oati, e ai ta Ihowa, ka ururuatia a Potora, ka waiho hei ingoa kino, hei koraha, hei kanga, ka waiho ano hoki ona pa katoa hei koraha, a, ake ake ake.
- 14
- Kua rangona e ahau he korero i a Ihowa, kua oti ano hoki te karere te tuku atu ki nga tauiwi, hei ki atu, Huihui mai, haere mai hoki ki a ia, whakatika ano hoki ki te whawhai.
- 15
- No te mea, na, ka meinga koe e ahau kia iti i roto i nga tauiwi, kia whakahaweatia i roto i nga tangata.
- 16
- He hanga whakawehi koe i pohewahewa ai koe, he whakakake ano hoki no to ngakau, e koe e noho na i nga kapiti o te kohatu, e pupuri na i te wahi tiketike o te pukepuke: ahakoa whakanekehia ake e koe to kohanga, a kua rite ki to te ekara, ka whakahokia iho ano koe e ahau i reira, e ai ta Ihowa.
- 17
- Ka ururuatia ano hoki a Eroma: nga tangata e tika ana na reira, ka miharo, ka hi mai ki ona whiunga katoa.
- 18
- Ka rite ki te hurihanga o Horoma o Komora, o nga pa ano i tata ki reira, e ai ta Ihowa, e kore tetahi tangata e whai kāinga ki reira, e kore ano te tama a te tangata e noho ki reira.
- 19
- Nana, ka rite ia ki te raiona e haere ake ana i te ngawhatanga o Horano ki te nohoanga o te tangata kaha; na, kitea rawatia ake ka meinga ia e ahau kia rere atu i reira, a ko wai te mea i whiriwhiria e whakaritea e ahau hei rangatira mona? ko wai hoki e rite ana ki a au? ko wai hei whakawa i a au? ko wai ano te hepara e tu ki toku aroaro?
- 20
- Na, whakarongo ki te tikanga a Ihowa i whakatakotoria nei e ia mo Eroma; ki ana whakaaro ano hoki i whakaaroa e ia mo nga tangata o Temana: He pono ka toia mai ratou e nga mea iti o te kahui; he pono ka huihuia e ia te whakangaromanga o ratou, o o ratou kāinga.
- 21
- Oho ana te whenua i te haruru o to ratou hinganga: te hamama! e rangona mai tona ngangau i te Moana Whero.
- 22
- Nana, ka rite tona haerenga mai, tona rere, ki to te ekara; ka roha ano hoki ona parirau ki runga ki Potora, ka rite ano hoki te ngakau o nga marohirohi o Eroma i taua rangi ki te ngakau o te wahine e whakamamae ana.
- 23
- Mo Ramahiku. Kua whakama a Hamata, raua ko Arapara: no te mea kua rangonga e ratou he rongo kino: harotu kau ratou; he tangihanga kei te moana, kahore e marino.
- 24
- Kua ngoi-kore a Ramahiku, kua anga ki te rere, mau pu ano hoki ia i te wehi, mau pu ia i te raru, i te mamae, me te mea he wahine e whanau ana.
- 25
- Taukiri e! kihai i mahue te pa e whakamoemititia ana, te pa i koa ai ahau!
- 26
- Heoi hinga ana āna taitamariki i ona waharoa, moti pu nga tangata whawhai katoa i taua rangi, e ai ta Ihowa o nga mano.
- 27
- Ka kā ano i a au he ahi i roto i te taiepa o Ramahiku, a ka pau nga whare kingi o Pene-harara.
- 28
- Mo Kerara, mo nga kingitanga ano hoki o Hatoro e patua e Nepukararetara kingi o Papurona, ko te kupu tenei a Ihowa; Whakatika, whakaekea a Kerara, pahuatia nga tangata o te rawhiti.
- 29
- Ka tangohia e ratou o ratou teneti, a ratou hipi; ka riro i a ratou o ratou kakahu arai, a ratou oko katoa, o ratou kamera; ka karanga ano ratou ki a ratou, he wehi kei nga taha katoa.
- 30
- E rere, haere rawa atu, kei roto riro he nohoanga mo koutou, e nga tangata o Hatoro, e ai ta Ihowa; kua takoto hoki ta Nepukararetara kingi o Papurona tikanga mo koutou, kua whakaaroa ano e ia he whakaaro mo koutou.
- 31
- Whakatika, whakaekea te iwi i te whenua rangatira, e noho wehi-kore noa iho na, e ai ta Ihowa, kahore nei o ratou keti, kahore o ratou tutaki, e noho ana ko ia anake.
- 32
- A ka pahuatia a ratou kamera; hei taonga pārau ano a ratou kararehe maha; ka titaritaria atu ano hoki e ahau ki nga hau katoa te hunga i nga pito whakamutunga; ka takina mai ano e ahau te aitua mo ratou i nga taha katoa o reira, e ai ta Ihowa.
- 33
- A hei nohoanga a Hatoro mo nga tarakona, hei ururua, a ake ake ake: e kore tetahi tangata e whai kāinga ki reira, e kore ano te tama a te tangata e noho ki reira.
- 34
- Te kupu a Ihowa i puta mai ki a Heremaia poropiti mo Erama i te timatanga o te kingitanga o Terekia kingi o Hura; i mea ia,
- 35
- Ko te kupu tenei a Ihowa o nga mano, Tenei au te whawhati nei i te kopere a Erama, i te mea nui rawa o to ratou kaha.
- 36
- Ka takina atu ano e ahau nga hau e wha i nga pito e wha o te rangi ki runga ki Erama; ka titaritaria atu ano ratou e ahau ki aua hau katoa, kahore hoki he iwi e kore te taea atu e te hunga o Erama ka peia atu nei.
- 37
- Ka meinga hoki e ahau a Erama kia wehi i te aroaro o ona hoa riri, i te aroaro ano o te hunga e whai ana kia whakamatea ratou: ka takina atu ano e ahau he kino ki runga ki a ratou, taku riri e mura ana, e ai ta Ihowa, ka ungā atu ano e ahau te hoari ki muri i a ratou, kia poto ra ano ratou i a au.
- 38
- Ka whakaturia ano hoki e ahau taku torona ki Erama, ka whakakahoretia atu ano e ahau to reira kingi, ratou ko nga rangatira, e ai ta Ihowa.
- 39
- I nga ra whakamutunga ia ka whakatahuritia atu e ahau te whakaraunga o Erama, e ai ta Ihowa.
Address: 
Phone: 
Email: