- 1
- Kopikopiko atu i nga ara o Hiruharama, tirohia atu kia mohio ai koutou, rapua i nga waharoa o reira, me kahore koutou e kite i tetahi tangata, he tangata ranei tera e whakarite whakawa ana, e rapu ana i te pono; a ka murua e ahau nga he o reira.
- 2
- Na, ahakoa mea noa ratou, Kei te ora a Ihowa; he pono he oati teka ta ratou.
- 3
- He teka ianei, e Ihowa, kei runga ou kanohi i te pono; i whiua ratou e koe, heoi kihai i pouri; moti iho ratou i a koe, heoi kahore ratou i pai kia anga mai ki te whakaakoranga; kua meinga e ratou o ratou mata kia maro atu i te kohatu, kahore ratou e pai ki te hoki mai.
- 4
- Koia ahau i mea ai, He pono he rawa-kore enei, he kuare, kahore hoki ratou e mohio ki te huarahi o Ihowa, ki te whakaritenga whakawa a to ratou Atua,
- 5
- Ka haere atu ahau ki nga tangata rahi, ka korero ki a ratou; e mohio ana hoki ratou ki te ara o Ihowa, ki te whakarite whakawa a to ratou Atua: heoi ko ratou tahi ki te wawahi i te ioka, motuhia ana nga here e ratou.
- 6
- Mo reira ka whakamatea ratou e te raiona i roto i te ngahere, ka pahuatia ano hoki e te wuruhi o nga ahiahi, ka tuteia o ratou pa e te reparo: te hunga katoa e puta mai ana ki waho ka haehaea; no te mea he maha o ratou pokanga ketanga, kua tini o ratou tahuritanga ketanga.
- 7
- Me pehea e murua ai e ahau tenei he ou? kua whakarere nei o tamariki i a au, oatitia ana e ratou nga mea ehara nei i te Atua; to ratou makonatanga i taku kai, na, kei te puremu ratou, ropu tonu ratou i roto i nga whare o nga wahine puremu.
- 8
- To ratou rite kei nga hoiho whangai i te ata: e tangi atu ana ki te wahine a tona hoa, a tona hoa.
- 9
- E kore ianei ahau e whai mahara atu ki enei mea? e ai ta Ihowa: e kore ianei toku wairua e rapu utu i te iwi penei?
- 10
- Haere ki runga ki ona taiepa wawahi ai; otiia kaua e whakapaua rawatia; whakakahoretia atu ona pekerangi; ehara hoki ena i a Ihowa.
- 11
- He nui hoki te tinihanga o te whare o Iharaira raua ko te whare o Hura ki a au, e ai ta Ihowa.
- 12
- E whakakahore ana ratou ki ta Ihowa, e ki ana, Ehara i a ia; e kore ano te he e tae mai ki a tatou; e kore ano tatou e kite i te hoari, i te hemo-kai.
- 13
- Nga poropiti ano hoki he hau kau, kahore hoki he kupu i a ratou: ko enei mea ka pa ki a ratou.
- 14
- Na reira tenei kupu a Ihowa a te Atua o nga mano, Mo ta koutou korerotanga i tena kupu, tenei au te mea nei i aku kupu i roto i tou mangai hei ahi, ko tenei iwi hoki hei rakau, a ka pau ratou.
- 15
- Tenei au te kawe atu nei i tetahi iwi o tawhiti ki a koutou, e te whare o Iharaira, e ai ta Ihowa; he iwi kaha ia, he iwi no namata riro, he iwi e kore nei koe e mohio ki tona reo, e kore ano e rongo ki tana e korero ai.
- 16
- He urupa puare tana papa pere, he marohirohi katoa ratou.
- 17
- A ka pau i a ia o hua e kotia ana, me to taro, nga kai a o tamariki, a o tamahine, ka pau i a ia o hipi me o kau, ka pau i a ia o waina me o piki; ka whakarawakoretia ano e ia ki te hoari ou pa kaha, āu i whakawhirinaki atu ai.
- 18
- I aua rangi ano hoki, e ai ta Ihowa, e kore e whakapaua rawatia taku ki a koutou.
- 19
- Na, ki te ki mai koutou a mua, He aha a Ihowa to tatou Atua i mea ai i enei mea katoa ki a tatou? ko reira koe ki atu ai ki a ratou, I whakarerea nei hoki ahau e koutou, a mahi ana koutou ki nga atua ke i to koutou whenua, waihoki me mahi ano koutou ki nga tangata ke i te whenua ehara nei i a koutou.
- 20
- Whakaaturia tenei i roto i te whare o Hakopa, kia rangona ano hoki i roto i a Hura; mea atu,
- 21
- Tena, whakarongo ki tenei, e te iwi wairangi kahore nei he ngakau, he kanohi nei o ratou, heoi kahore e kite, he taringa o ratou, a kahore e rongo.
- 22
- Kahore ranei o koutou wehi ki a au? e ai ta Ihowa, e kore ianei koutou e hopohopo ki toku aroaro? naku nei hoki i mea te onepu hei rohe ki te moana, he tikanga mau tonu, e kore ano e koni mai: ahakoa ngana noa ona ngaru, e kore e taea ta ratou; hamama noa, e kore ano e koni mai.
- 23
- Tenei iwi ia, he tutu, he whakakeke o ratou ngakau; kua peka ke atu ratou, kua riro.
- 24
- Kahore hoki a ratou kianga ake i roto i o ratou ngakau, Tena, kia wehi tatou ki a Ihowa ki to tatou Atua, ko ia nei te kai homai i te ua, i to muri, i te wa e tika ai, nana nei i mau ai ki a tatou nga wiki i whakaritea mo te kotinga witi.
- 25
- Na o koutou he enei i puta ke ai, ko o koutou hara ano hei kaiponu atu i te pai mo koutou.
- 26
- E kitea ana hoki nga tangata kino i roto i toku iwi: titiro matatau mai ana ratou, Me te mea he kai hopu manu e kupapa ana; kei te whakatakoto mahanga ratou, kei te hopu tangata.
- 27
- Kei te whare manu e ki ana i nga manu te rite o o ratou whare e ki tonu nei i te tinihanga: na reira ratou i nui ai, i whai taonga ai.
- 28
- Tetere tonu ratou, towahiwahi tonu, kua neke rawa ake ta ratou, i nga mahi a te hunga kino, kahore ā ratou whakarite whakawa i nga whakawakanga a te pani, heoi kake tonu ratou, kahore hoki e whakatikaia e ratou te whakawa a nga rawa-kore.
- 29
- E kore ranei ahau e whai mahara atu ki enei mea? e ai ta Ihowa; e kore ranei toku wairua e rapu utu i te iwi penei?
- 30
- Whakamiharo rawa, whakawehi rawa te mea e meatia ana ki te whenua;
- 31
- E poropiti teka ana nga poropiti; na ratou ano i riro ai te rangatiratanga i nga tohunga; a pai tonu atu toku iwi ki te pena. Na, ka pehea ra koutou i tona tukunga iho?
Address: 
Phone: 
Email: