- 1
- Te kupu i a Heremaia, he mea na Ihowa; i ki mai ia,
- 2
- E tu ki te kuwaha o te whare o Ihowa, ka karanga i tenei kupu ki reira, ka mea atu, Whakarongo ki te kupu a Ihowa, e Hura katoa e tomo ana ki roto ki enei kuwaha ki te koropiko ki a Ihowa.
- 3
- Ko te kupu tenei a Ihowa o nga mano, a te Atua o Iharaira, Whakapaia o koutou ara me a koutou mahi, a ka meinga koutou e ahau kia noho ki tenei wahi.
- 4
- Kei whakawhirinaki atu koutou ki nga kupu teka noa, kei ki, Ko te temepara o Ihowa, Ko te temepara o Ihowa, Ko te temepara o Ihowa enei.
- 5
- Na, ki te whakapaia rawatia e koutou a koutou ara, me a koutou mahi, ki te mea ka tika rawa ta koutou whakarite i te whakawa a te tangata raua ko tona hoa;
- 6
- Ki te kore koutou e tukino i te manene, i te pani, i te pouaru, a kahore e whakahekea e koutou nga toto o te hara-kore ki tenei wahi, kahore hoki e haere e whai i nga atua ke hei he mo koutou:
- 7
- Katahi au ka mea i a koutou kia noho ki tenei wahi ki te whenua i hoatu e ahau ki o koutou mātua, a ake ake ake.
- 8
- Nana, kei te whakawhirinaki na koutou ki nga kupu teka, kahore nei he painga.
- 9
- E tahae ranei koutou, e patu tangata, e puremu? e oati teka ranei koutou? e tahu whakakakara ranei ki a Paara, e whai ranei i nga atua ke kihai i matauria e koutou;
- 10
- A ka haere mai, ka tu ki toku aroaro i tenei whare kua karangatia nei ki toku ingoa, ka mea, Kua whakaorangia matou, a ka mahia e matou enei mea whakarihariha katoa?
- 11
- Ki ta koutou titiro kua waiho koia hei ana mo nga kai pahua tenei whare kua karangatia nei ki toku ingoa? Nana, kua kite ano ahau, e ai ta Ihowa.
- 12
- Na, haere ra koutou ki toku wahi i Hiro, ki te wahi i whakanohoia mataatitia ai e ahau toku ingoa, tirohia atu taku i mea ai ki reira mo te kino a toku iwi, a Iharaira.
- 13
- Na, inaianei i ta koutou meatanga i enei mea katoa, e ai ta Ihowa, i korero ano ahau ki a koutou; maranga wawe ana ahau, korero ana, heoi kihai koutou i whakarongo mai; karanga ana ahau ki a koutou, a kihai koutou i whakahoki kupu mai;
- 14
- Na, taku e mea ai ki tenei whare i karangatia nei ki toku ingoa, ki ta koutou e whakawhirinaki atu nei, ki te wahi ano hoki i hoatu nei e ahau ki a koutou ki o koutou mātua, ka rite ki taku i mea ai ki Hiro.
- 15
- Ka akiritia atu ano hoki koutou e ahau i toku aroaro, ka peratia me taku akiritanga i o koutou teina katoa, i nga uri katoa o Eperaima.
- 16
- Na, kaua koe e inoi mo tenei iwi; kei ara hoki tetahi tangi, tetahi kupu wawao āu mo ratou, kaua hoki ahau e whakamarietia, no te mea e kore ahau e whakarongo ki a koe.
- 17
- Kahore ianei koe i kite i ta ratou e mea nei i nga pa o Hura, i nga huarahi ano o Hiruharama?
- 18
- Ko nga tamariki kei te kohikohi wahie, ko nga mātua kei te whakau i te ahi, ko nga wahine kei te pokepoke i te paraoa hei hanga i etahi keke, he mea ki te kuini o te rangi, riringi tonu iho i nga ringihanga ki nga atua ke, hei whakapataritari i a au.
- 19
- He whakapataritari ranei ta ratou ki a au, e ai ta Ihowa: he teka ianei ki a ratou ano, a whakama iho o ratou mata?
- 20
- Na, ko te kupu tenei a te Ariki a Ihowa, Nana, ka ringitia taku riri, taku aritarita, ki runga ki tenei wahi, ki runga ki te tangata, ki runga ki te kararehe, ki te rakau o te mara, ki nga hua o te oneone, a ka ngiha, e kore ano e tineia.
- 21
- Ko te kupu tenei a Ihowa o nga mano, a te Atua o Iharaira; A koutou tahunga tinana tapiritia iho ki runga ki ā koutou patunga tapu, kainga hoki he kikokiko.
- 22
- Kihai hoki ahau i korero ki o koutou mātua, kihai i whakahau i a ratou i te ra i kawea mai ai ratou e ahau i te whenua o Ihipa, kia meatia nga tahunga tinana me nga patunga tapu.
- 23
- Engari ko te kupu tenei i whakahaua e ahau ki a ratou; i ki ahau, Whakarongo ki toku reo, a hei Atua ahau mo koutou, ko koutou hoki hei iwi moku, me haere ano hoki koutou i runga i te ara katoa ka whakahaua atu nei e ahau ki a koutou, kia whiwhi ai koutou ki te pai.
- 24
- Heoi kihai ratou i whakarongo, kihai ano hoki i tahuri mai to ratou taringa; na haere ana ratou i nga whakaaro, i nga tikanga pakeke o o ratou ngakau kino; ta ratou he anga ki muri, kihai hoki i anga ki mua.
- 25
- No te rangi ra ano i haere mai ai o koutou mātua i te whenua o Ihipa taku tononga atu i aku pononga katoa, i nga poropiti ki a koutou, maranga wawe ana ahau i tenei ra, i tenei ra, ungā ana ratou e ahau.
- 26
- Heoi kihai ratou i whakarongo ki a au, kihai ano i tahuri mai to ratou taringa; na, whakapakeketia ana e ratou to ratou kaki: kino iho ta ratou i ta o ratou mātua.
- 27
- Na, mau e korero atu enei kupu katoa ki a ratou, e kore ia ratou e rongo ki a koe: karanga atu ki a ratou; e kore ano ia ratou e whakahoki kupu mai ki a koe.
- 28
- Engari me ki atu e koe ki a ratou, He iwi tenei e kore e whakarongo ki te reo o Ihowa o tona Atua, e kore ano e pai kia riria te he: kua kore te pono, kua kotia atu i roto i to ratou mangai.
- 29
- Waruhia ou makawe, E Hiruharama, makā atu, anga atu ki te tangi ki runga ki nga wahi tiketike; kua whakaparahakotia nei hoki e Ihowa, kua whakarerea te whakatupuranga i riri ai ia.
- 30
- He kino hoki te mahi a nga tamariki a Hura ki taku titiro iho, e ai ta Ihowa; whakaturia ake e ratou a ratou mea whakarihariha ki te whare kua karangatia nei ki toku ingoa, whakapokea iho e ratou.
- 31
- Hangā ake e ratou nga wahi tiketike o Topete, o tera i te raorao o te tama a Hinomo, hei tahunga mo a ratou tamariki, mo a ratou tamahine, ki te ahi, he mea kihai nei i whakahaua atu e ahau, kihai ano hoki i puta ake i roto i toku ngakau.
- 32
- Mo reira, na, kei te haere mai nga ra, e ai ta Ihowa, e kore ai e karangatia i muri, Ko Topete, ko te raorao o te tama a Hinomo; engari ko te raorao i te parekura: ka tanu tangata hoki ratou ki Topete, a kia kore ra ano he wahi.
- 33
- A ka waiho nga tinana o tenei iwi hei kai ma nga manu o te rangi, ma te kararehe o te whenua; kahore hoki he kai whakawehi atu.
- 34
- Ka whakamutua ano e ahau i roto i nga pa o Hura, i nga huarahi ano o Hiruharama, te reo koa, te reo hari, te reo o te tane marena hou, te reo o te wahine marena hou: no te mea ka ururuatia te whenua.
Address: 
Phone: 
Email: