- 1
- Muri iho i enei mea ka whiti atu a Ihu i te moana o Kariri, ara, i to Taipiria.
- 2
- A he tini nga tāngata i aru i a ia, i kite hoki ratou i ana merekara i mea ai ia ki nga turoro.
- 3
- Na, ka haere atu a Ihu ki runga ki te maunga, a noho ana i reira ratou ko ana akonga.
- 4
- A kua tata te Kapenga, te hākari a nga Hurai.
- 5
- Na, te marangatanga ake o nga kanohi o Ihu, ka kite i te tini o te tangata e haere mai ana ki a ia; ka mea ia ki a Piripi, Ko hea tatou hoko ai i etahi taro, kia kai ai enei?
- 6
- I penei ai tana ki hei whakamatau mona; i mohio hoki ia ki tana e mea ai.
- 7
- Ka mea a Piripi ki a ia, E kore e ranea ma ratou nga taro o nga pene e rua rau, e kore e riro tetahi wahi iti i tenei i tenei o ratou.
- 8
- Ka mea tetahi o ana akonga ki a ia, a Anaru teina o Haimona Pita,
- 9
- He tamaiti tenei e rima ana taro pare, e rua ika nonohi; heoi hei aha enei ma tenei ope nui?
- 10
- Na, ka mea a Ihu, Meinga nga tāngata kia noho. He nui hoki te tarutaru i taua wahi. Na, noho ana nga tāngata ki raro, te tokomaha me te mea e rima nga mano.
- 11
- Na, ka mau a Ihu ki nga taro; a ka mutu te whakawhetai, ka tuwha atu ki nga akonga, a na nga akonga ki te hunga i noho ra; me nga ika ano hoki, ta ratou i pai ai.
- 12
- Ano ka makona ratou, ka mea ia ki ana akonga, Kohikohia nga toenga o nga whatiwhatinga, kei maumauria tetahi wahi.
- 13
- Na, kohikohia ana e ratou, a whakakiia ana nga kete tekau ma rua ki nga whatiwhatinga o nga taro pare e rima, ki nga toenga a nga tāngata i kai ra.
- 14
- A, te kitenga o aua tāngata i te merekara i meatia e Ihu, ka mea ratou, Ko ia ano tenei te poropiti e haere mai ana ki te ao.
- 15
- A i mahara a Ihu, meake ratou haere mai ki te hopu i a ia kia kingitia ai ia, na, haere ana ano hoki ia ki te maunga, ko ia anake.
- 16
- Ano ka ahiahi, ka haere ana akonga ki te moana.
- 17
- Na, ka eke ratou ki te kaipuke, ka whakawhiti atu ki tera taha o te moana ki Kaperenauma. A kua pouri noa ake, kahore ano hoki a Ihu kia tae noa ki a ratou.
- 18
- Na, ko te turanga o te moana, hē nui hoki no te puhanga o te hau.
- 19
- A, to ratou hoenga atu, e rua tekau ma rima, e toru tekau ranei paronga, ka kite i a Ihu e haere maori ana i runga i te moana, a e whakatata mai ana ki te kaipuke: na, ka mataku ratou.
- 20
- Na, ka mea ia ki a ratou, Ko ahau tenei; aua e mataku.
- 21
- Na, ka mea ratou kia eke ia ki te kaipuke: a kihai i aha kua u te kaipuke ki te wahi i hoe atu ai ratou.
- 22
- I te aonga ake, ka mahara te mano e tu ana i tera taha o te moana, kahore he poti ke atu o reira, ko tera anake i eke atu ai ana akonga, a kihai a Ihu i eke tahi atu ratou ko ana akonga ki te poti, engari ko ana akonga anake i haere atu;
- 23
- (He poti ke ra ia i u mai i Taipiria ki pahaki atu o te wahi i kai taro ai ratou, i muri iho i ta te Ariki whakawhetainga:)
- 24
- A, te kitenga o te mano kahore a Ihu i reira, kahore ano hoki ana akonga, ka eke ano hoki ratou ki nga kaipuke, ka rere ki Kaperenauma ki te rapu i a Ihu.
- 25
- A, to ratou kitenga i a ia i tawahi o te moana, ka mea ki a ia, E Rapi, no nahea koe i tae mai ai ki konei?
- 26
- Ka whakahokia atu e Ihu ki a ratou, ka mea, He pono, he pono taku e mea atu nei ki a koutou, Ehara i te mea he kitenga no koutou i nga merekara i rapu ai koutou i a au, engari no te mea i kai koutou i nga taro, a ka makona.
- 27
- Aua e mahia te kai memeha, engari te kai e mau tonu ana a te oranga tonutanga ra ano, ta te Tama hoki a te tangata e homai ai ki a koutou: kua oti hoki ia te whai tohu e te Atua e te Matua.
- 28
- Na, ka mea ratou ki a ia, Me aha matou e mahi ai i nga mahi a te Atua?
- 29
- Ka whakahokia mai e Ihu, a ka mea ki a ratou, Ko ta te Atua mahi tenei, kia whakapono koutou ki tana i tono mai ai.
- 30
- Na, ka mea ratou ki a ia, Ko tehea tohu te meatia ana e koe kia kite ai matou, kia whakapono ai ki a koe? tena koa tau mahi?
- 31
- I kai mana o tatou mātua i te koraha; ko te mea hoki tena i tuhituhia, I homai e ia he taro i te rangi hei kai ma ratou.
- 32
- Na, ko te meatanga atu a Ihu ki a ratou, He pono, he pono taku e mea atu nei ki a koutou, Ehara i a Mohi nana i hoatu tena taro ki a koutou i te rangi; engari tenei te hoatu nei te taro pono o te rangi e toku Matua ki a koutou.
- 33
- Ko te taro hoki a te Atua ko ia e heke iho ana i te rangi, e homai ana hoki i te oranga ki te ao.
- 34
- Na, ka mea ratou ki a ia, e te Ariki, homai tenei taro ki a matou i nga wa katoa.
- 35
- Ka mea a Ihu ki a ratou, Ko ahau te taro o te ora: ki te haere mai tetahi ki a au, e kore rawa ia e hiakai; ki te whakapono hoki tetahi ki a au, mutu ake tona mate wai.
- 36
- Otira i mea atu ano ahau ki a koutou, Kua kite hoki koutou i a au, a kahore i whakapono.
- 37
- Ko a te Matua e homai ai ki a au ka haere katoa mai ki a au; a ki te haere mai tetahi ki a au, e kore rawa e pangā atu e ahau ki waho.
- 38
- I heke iho hoki ahau i te rangi, ehara i te mea hei mahi i taku i pai ai, engari i ta toku kai tono mai i pai ai.
- 39
- A ko ta te Matua i pai ai, nana nei ahau i tono mai, koia tenei, kia kaua e ngaro i a au tetahi wahi o nga mea katoa i homai e ia ki a au; engari kia whakaarahia ake e ahau a te ra whakamutunga.
- 40
- A ko te pai tenei a toku kai tono mai, ko nga tāngata katoa e kite ana i te Tama, a e whakapono ana ano ki a ia, kia whiwhi ratou ki te oranga tonutanga; maku ano hoki ratou e whakaara ake a te ra whakamutunga.
- 41
- Na, ka korero komuhumuhu nga Hurai ki a ia, mona i mea, Ko ahau te taro i heke iho i te rangi.
- 42
- A ka mea ratou, Ehara oti tenei i a Ihu tama a Hohepa, e mohio nei tatou ki tona pāpā raua ko tona whaea? ha! He pehea tana i ki nei, I heke iho ahau i te rangi?
- 43
- Na, ka whakahokia mai e Ihu, ka mea ia ki a ratou, Kāti te komuhumuhu i roto i a koutou.
- 44
- Kahore he tangata e ahei te haere mai ki a au, ki te kahore ia e kumea e te Matua i tonoa mai ai ahau: a maku ano ia e whakaara ake a te ra whakamutunga.
- 45
- Kua oti te tuhituhi i roto i nga poropiti, A ka whakaakona katoatia ratou e te Atua. Na, nga tāngata katoa kua rongo ki te Matua, a kua akona, ka haere mai ki a au.
- 46
- Kahore hoki te tangata i kite i te Matua; ko ia anake i puta mai i te Atua, ko ia kua kite i te Matua.
- 47
- He pono, he pono taku e mea atu nei ki a koutou, Ki te whakapono tetahi ki a au, he oranga tonutanga tona.
- 48
- Ko ahau te taro o te ora.
- 49
- I kai mana o koutou mātua i te koraha, a kua mate.
- 50
- Ko te taro tenei e heke iho ana i te rangi, kia kai ai te tangata i a ia, a kia kaua e mate.
- 51
- Ko ahau te taro ora i heke iho i te rangi; ki te kai tetahi i tenei taro, e ora tonu ia: a, te taro, e hoatu e ahau ko oku kikokiko, e hoatu e ahau hei oranga mo te ao.
- 52
- Na, ka totohe nga Hurai tetahi ki tetahi, ka mea, Me pehea e homai ai e tenei tangata ona kikokiko kia kainga e tatou?
- 53
- Na, ko te meatanga atu a Ihu ki a ratou, He pono, he pono taku e mea atu nei ki a koutou, Ki te kahore koutou e kai i nga kikokiko o te Tama a te tangata, e inu i ona toto, kahore he oranga i roto i a koutou.
- 54
- Ko ia e kai ana i oku kikokiko, a e inu ana i oku toto, he oranga tonutanga tona; a maku ia e whakaara ake a te ra whakamutunga.
- 55
- He kai pono hoki oku kikokiko, he tino mea oku toto hei inumanga.
- 56
- Ko ia e kai ana i oku kikokiko, a e inu ana i oku toto, e noho ana i roto i a au, me ahau hoki i roto i a ia.
- 57
- Na te Matua ora hoki ahau i tono mai, no te Matua ano hoki toku oranga: whaihoki ki te kai tetahi i a au, kei a au he oranga mona.
- 58
- Ko te taro tenei i heke iho i te rangi: e kore e pera me o koutou mātua i kai mana nei, a kua mate: ki te kai tetahi i tenei taro, e ora tonu ia.
- 59
- I korerotia enei mea e ia i roto i te whare karakia, i a ia e whakaako ana i Kaperenauma.
- 60
- Na, he tokomaha o ana akonga i te rongonga ai, i mea, He kupu pakeke tenei; ko wai e ahei te whakarongo atu?
- 61
- A ka mohio a Ihu i roto i a ia, e komuhumuhu ana ana akonga ki tenei, ka mea ia ki a ratou, E hē ana koutou ki tenei?
- 62
- Ka pehea ra ki te mea ka kitea e koutou te Tama a te tangata, e kake atu ana ki te wahi i noho ai ia i mua?
- 63
- Ko te wairua te whakaora ana; kahore a te kikokiko wahi: he wairua he oranga nga kupu e korero atu nei ahau ki a koutou.
- 64
- Tenei ano ia etahi o koutou kahore o ratou whakapono. I mātau hoki a Ihu no te timatanga ano ki nga mea kahore o ratou whakapono, ki te tangata ano hoki e tukua ai ia.
- 65
- A ka mea ia, Na konei ahau i mea atu ai ki a koutou, Kahore he tangata e ahei te haere mai ki a au, ki te kahore e hoatu ki a ia e toku Matua.
- 66
- I taua wa he tokomaha o ana akona i hoki ki muri, a mutu ake ta ratou haere tahi me ia.
- 67
- Na, ka mea a Ihu ki te tekau ma rua, E mea ana ano ranei koutou kia haere?
- 68
- Na, ka whakahokia atu e Haimona Pita ki a ia, E te Ariki, me haere matou ki a wai? kei a koe nga kupu o te oranga tonutanga.
- 69
- A kua whakapono matou, kua mātau, ko te Karaiti koe, ko te Tama a te Atua ora.
- 70
- Ka whakahokia mai e Ihu ki a ratou, He teka ianei kotahi tekau ma rua koutou i whiriwhiria nei e ahau, a he rewera tetahi o koutou?
- 71
- Ko Hura Ikariote tama a Haimona tana i korero ai: ko te tangata hoki ia meake nei tuku i a ia; ko tetahi o te tekau ma rua hoki ia.
Address: 
Phone: 
Email: