- 1
- Nana, kua kitea katoatia tenei e toku kanohi, kua rongo toku taringa, kua mohio.
- 2
- To koutou mohiotanga, toku mohiotanga ano hoki, rite tahi; kahore hoki ahau i hoki iho i a koutou.
- 3
- Ina, e whai kupu ano ahau ki a te Kaha-rawa, minamina tonu ahau ki te korerorero ki te Atua.
- 4
- Ko koutou ia, he hunga tito i te teka, he rata horihori noa koutou katoa.
- 5
- Te pai, me i mutu rawa a koutou korero! ko to koutou whakaaro nui hoki tena.
- 6
- Tena ra, whakarongo mai ki taku tautohetohenga, maharatia iho nga whawhaitanga o oku ngutu.
- 7
- Ka whakatikatika koutou i ta te Atua kia kino koia te kupu? ka whakatika koutou i tana, kia tinihanga ianei nga korero?
- 8
- Ka whakapai kanohi koia koutou ki a ia? ma koutou ranei ta te Atua tautohe?
- 9
- E pai ana ranei kia rapua ta koutou e ia? e maminga ranei koutou ki a ia, e pera ranei me tetahi tangata ka maminga nei ki tetahi?
- 10
- Takoto rawa tana whakahe mo koutou, ki te whakapai puku koutou i te kanohi.
- 11
- E kore ranei koutou e mataku ki tona nui? e kore ranei te wehi ki a ia e tau ki runga ki a koutou?
- 12
- Nga maharatanga ki a koutou rite tonu ki te pungarehu; o koutou tinana, ano he tinana paru.
- 13
- Whakarongoa; kati te mea ki a au; ka korero hoki ahau, ahakoa pa mai te aha ki a au.
- 14
- He aha oku kikokiko i maua ai e ahau i roto i oku niho? he aha toku wairua i waiho ai e ahau i roto i toku ringa?
- 15
- Ahakoa whakamate noa ia i a au ka whakawhirinaki ano ahau ki a ia: ka tohea ia e ahau te tika o toku ara ki tona aroaro.
- 16
- Ko ia ano hoki hei oranga moku; e kore hoki te ngutu kau e tae ki tona aroaro.
- 17
- Ata whakarongo mai ki aku korero, kia anga mai o koutou taringa ki taku e whakapuaki atu nei.
- 18
- Na, kua oti nei taku korero mo te whakawa te whakatakoto atu; e mohio ana ano ahau tera ahau e whakatikaia.
- 19
- Ko wai hei totohe ki a au? Ki te whakarongo puku hoki ahau aianei, ka hemo ahau.
- 20
- Kaua raia enei mea e rua e meatia mai e koe ki a au; katahi au ka kore e piri atu kei kitea e koe.
- 21
- Kia matara atu to ringa i a au; kaua hoki ahau e whakawehia e te mataku ki a koe.
- 22
- Ko reira, mau e karanga, a maku e whakao atu; maku ranei e korero, a mau e whakahoki mai te kupu ki a au.
- 23
- Ka hia aku kino, oku hara? whakakitea mai ki a au toku he me toku hara.
- 24
- He aha tou mata i hunā ai e koe? he aha ahau i kiia ai e koe he hoa riri?
- 25
- E whatiia ranei e koe te pakawha e puhia haeretia ana? e whaia ranei e koe te papapa maroke?
- 26
- Kei te tuhituhi na hoki koe i nga mea kawa moku, e mea ana hoki koe kia riro mai i a au nga he o toku taitamarikitanga.
- 27
- Karapitia iho e koe oku waewae ki te rakau, he mea titiro iho nau oku ara katoa, tuhia iho e koe nga rekereke o oku waewae.
- 28
- Ko ia hoki, memeha noa iho ia, ano he mea pirau, ano he kakahu e kainga ana e te purehurehu.
Address: 
Phone: 
Email: