- 1
- Ano ra ko Hopa; i ki mai ia,
- 2
- Ka maha nga mea pena kua rangona nei e ahau: he kai whakamarie whakararuraru koutou katoa.
- 3
- E whai mutunga ranei nga kupu tikanga-kore? na te aha ranei i maia ai koe ki te whakahoki kupu?
- 4
- E rite ana ano hoki ahau ki a koutou te whai korero: me i penei to koutou wairua me toku wairua, hono tonu aku kupu ki a koutou, ka oioi ano toku upoko ki a koutou.
- 5
- E whakakaha ano ia toku mangai i a koutou, ka ai ano hoki te oraoranga o oku ngutu hei pehi i to koutou mamae.
- 6
- Ahakoa korero ahau, kahore toku pouri e iti iho; ki te mutu taku, ko tehea wahi o toku mamae ka taharahara iho?
- 7
- Inaianei ano kua meinga ahau e ia kia ruha: moti iho i a koe toku whakaminenga katoa.
- 8
- Nau ahau i korukoru ai; ko enei ano hei kai whakaatu i toku he: whakatika mai ana ano hoki toku hirokitanga i roto i a au ki te whakapuaki i toku he.
- 9
- Haehaea ana ahau e ia i a ia e riri ana, e kino ana ia ki a au, pakiri ana ona niho ki a au; e whakakoi mai ana toku hoa riri i ona kanohi ki a au.
- 10
- Hamama mai ana o ratou mangai ki a au, whakahawea mai ana, kei te papaki ratou i toku paparinga, huihui ana ratou kia kotahi hei whawhai ki a au.
- 11
- Kua tukua atu ahau e te Atua ki te hunga he, whakarerea putia atu ana ahau ki nga ringa o te hunga kino.
- 12
- I runga ahau i te whenua rangatira; heoi kei te wawahi ia i a au; kua mau ia ki toku kaki, kei te rurerure i a au, whakaturia ana ahau e ia hei koperenga pere mana.
- 13
- Karapotia ana ahau e ana kai kopere, motumotuhia ana e ia oku whatumanawa, kahore hoki e tohungia; ringitia ana e ia toku au ki te whenua.
- 14
- He mea wawahi ahau nana, tenei wahanga ake iho ki runga ki tera wahanga, ano he tangata kaha ia e rere mai ana ki runga ki a au.
- 15
- Tuituia ana e ahau te kakahu taratara mo toku kiri, whakaititia iho e ahau toku haona ki te puehu.
- 16
- Waikorohuhu noa iho toku mata i te tangihanga, kei runga i oku kamo te atarangi o te mate.
- 17
- Ehara i te mea he whakahaere he kei oku ringa; e ma ana ano taku inoi.
- 18
- Kaua, e te whenua, e hipokina oku toto, kei whai wahi ano hoki taku karanga.
- 19
- Kei te rangi nei ano inaianei te kai whakaatu o taku, kei te wahi i runga toku kai titiro.
- 20
- E tawai mai ana oku hoa ki a au, maturuturu tonu ia nga roimata o toku kanohi ki te Atua.
- 21
- Aue, me i tika ma te tangata te totohe ki te Atua, te pera me ta te tama a te tangata ki tona hoa!
- 22
- Kia taka mai nga tau torutoru ake nei, ka riro au i te ara e kore ai ahau e hoki mai.
Address: 
Phone: 
Email: