- 1
- Ano ra ko Eripata Temani; i mea ia,
- 2
- E whai pai ano ranei te Atua i te tangata, e pera ano me te tangata e whai pai ana i a ia ano ki te mea he ngakau mohio tona?
- 3
- He oranga ngakau ranei tou tika ki a te Kaha rawa? hei taonga ranei ki a ia tou ara ki te meinga e koe kia tino tika?
- 4
- E wehi ranei ia i a koe, e tautohetohe ki a koe? e anga mai ranei ia ki to whakawakanga?
- 5
- He teka ianei he nui tou he? kahore hoki he pito whakamutunga o o kino?
- 6
- I tangohia noatia hoki e koe te mea a tou teina hei taunaha, huia ana e koe nga kakahu o te hunga e noho tahanga ana.
- 7
- Kihai i whakainumia e koe te hunga ngenge ki te wai; kaiponuhia ana e koe he taro ki te hunga e mate-kai ana.
- 8
- Te tangata marohirohi, i a ia te whenua; te kanohi nunui, noho ana ia i reira.
- 9
- Nga pouaru, ungā rawa-koretia atu ana e koe, whatiwhatiia ana nga ringaringa o nga pani.
- 10
- No reira, karapotia putia ana koe e nga mahanga, raruraru ana koe i te wehi pa whakarere;
- 11
- I te pouri ranei, tē kite ai koe; nui atu te wai te taupoki na i a koe.
- 12
- He teka ianei kei te wahi tiketike o te rangi te Atua? tirohia atu ano hoki a runga o nga whetu, to ratou teitei.
- 13
- A e mea na koe, Ma te aha te Atua ka mohio ai? e puta mai ranei tana whakarite whakawa i roto i te kapua pouri?
- 14
- Tona wahi ngaro ko nga kapua matotoru, tē kite ia; kei te taiawhio ano ia i nga rangi.
- 15
- Kua whakaaroa ranei e koe te ara o mua i haerea e nga tangata kino?
- 16
- I memeha atu nei i te mea kahore i rite nga ra; hurihia ana to ratou turanga e te waipuke?
- 17
- I mea nei ki te Atua, Mawehe atu i a matou: he mahi aha hoki ta te Kaha-rawa ki a ratou?
- 18
- Otiia i whakakiia ano e ia o ratou whare ki nga mea pai: matara atu i a au te whakaaro a te hunga kino.
- 19
- E kite ana te hunga tika, a koa ana: kataina iho ratou e te hunga hara-kore.
- 20
- Na, kahore to matou rawa kia whakangaromia; pau ake ia i te ahi te toenga o ratou.
- 21
- Waiho ia hei hoa mou, katahi koe ka ata noho; ma reira ka tae mai ai te pai ki a koe.
- 22
- Tahuri mai ra ki te ture a tona mangai, rongoatia ana kupu ki roto ki tou ngakau.
- 23
- Ki te hoki mai koe ki a te Kaha-rawa, tera koe ka hangā, ka nekehia atu e koe te kino i ou tapenakara.
- 24
- Katahi ka purangatia e koe te koura ano he puehu, te koura o Opira ano ko nga kohatu o nga awa.
- 25
- Ko te Kaha-rawa ano hei koura mou, nui noa ake ano hoki te hiriwa mou.
- 26
- Ko reira hoki koe ahuareka ai ki te Kaha-rawa, a ka ara ake tou mata ki te Atua.
- 27
- Ka inoi ano koe ki a ia, a ka whakarongo mai ia ki a koe. Ka whakamanā ano e koe o kupu taurangi.
- 28
- Ka whakatakotoria ano e koe he tikanga, a ka pumau tau, ka whiti ano te māramatanga ki runga ki ou huarahi.
- 29
- I nga wa o te whakaitinga, ka ki koe, Tenei ano he whakaarahanga ake; ka whakaorangia ano e ia te ngakau whakaiti.
- 30
- Mana ka ora ai te motu o te hara-kore; ma te ma ano o ou ringa ka ora ai.
Address: 
Phone: 
Email: