- 1
- I mea mai ano hoki a Erihu,
- 2
- Tukua ahau, kia iti nei, a ka whakakitea atu e ahau ki a koe, he kupu ano enei aku mo ta te Atua.
- 3
- Ka tikina atu e ahau toku mohiotanga i tawhiti, ka whakatikaia e ahau ta toku Kai-hanga.
- 4
- E kore rawa hoki aku kupu e teka: tenei kei a koe te tangata kua tino nui tona matauranga.
- 5
- Nana, he pakari te Atua, e kore ano ia e whakahawea: pakari tonu tona kaha, tona matauranga.
- 6
- E kore te tangata kino e whakaorangia e ia; mana te hunga rawa-kore e whiwhi ai ki nga mea tika.
- 7
- E kore e mutu tana titiro ki te tangata tika: kei runga ngatahi ratou ko nga kingi i te torona; ka whakapumautia ano ratou e ia, a, ake ake, ka whakanekehia ake ano hoki ratou.
- 8
- Ki te mea kua herea ratou ki nga mekameka, mau pu i nga rahiri, ara, i nga mate,
- 9
- Na, ka whakakitea mai e ia ki a ratou ta ratou mahi, me a ratou hē kua neke rawa ake nei.
- 10
- Ka whakapuaretia e ia o ratou taringa ki te ako, a ka ki mai kia hoki atu ratou i te kino.
- 11
- Ki te whakarongo mai ratou, a ka mahi, ka pau o ratou ra i runga i te pai, o ratou tau i runga i nga ahuareka.
- 12
- A ki te kore ratou e whakarongo, ka ngaro ratou i te hoari, hemo iho ratou, kahore hoki he matauranga.
- 13
- Nga ngakau ngutu kau ia, puranga rawa i a ratou te riri; kahore o ratou tangi ina herea ratou e ia.
- 14
- Ka mate ratou i te taitamarikitanga, a i roto to ratou ora i te hunga poke.
- 15
- Tana, he whakaora i te rawa-kore ina mate, e whakapuaretia ana e ia o ratou taringa ina tukinotia.
- 16
- Me koe ano, kua riro mai ano koe i a ia i roto i te kuititanga, a, ki te wahi whanui, kahore nei he kuititanga; a, ki tonu i te ngako te mea e whakatakotoria ki runga ki to tepu.
- 17
- Ko tenei kua rite i a koe te tikanga o te tangata kino; a mau pu koe i nga tikanga, i te whakarite whakawa.
- 18
- He riri nei tenei: kei riro koe i te whiu, na, ahakoa nui te utu, e kore e taea e koe te karo.
- 19
- E whakaaroa ranei ou rawa? kahore, ahakoa koura, me nga kaha katoa e u ana.
- 20
- Kaua e hiahiatia te po, te wa e riro ai nga tangata i runga i to ratou wahi.
- 21
- Kia tupato, kaua e tahuri ki te kino; ki tau hoki he pai ake tenei i nga mate.
- 22
- Nana, te Atua, ko tona kaha hei whakanui. Ko wai te kai whakaako hei rite mona?
- 23
- Ko wai te kai tohutohu i te ara mona? Ko wai hei mea, Kua he to mahi?
- 24
- Kia mahara kia whakanuia e koe tana mahi, e tirohia nei e nga tangata,
- 25
- E kitea nei e nga tangata katoa; e matakitakina mai nei e te tangata i tawhiti.
- 26
- Nana, he nui te Atua, e kore ano e mohiotia e tatou; e kore ano hoki te maha o ona tau e taea te rapu atu.
- 27
- Ko ia nei hei whakaririki i nga pata wai; rite tonu ki tona kohu te ua e ringitia mai ana.
- 28
- He mea tuku mai na nga kapua, e maturuturu nui mai ana ki runga ki te tangata.
- 29
- E mohiotia ano ranei e tetahi nga horahanga o te kapua, te ngangau o tona tapenakara?
- 30
- Nana, e horahia ana e ia tona māramatanga ki runga ki taua kapua, e hipokina ana hoki e ia te takere o te moana.
- 31
- Ko ana mea hoki ena hei whakarite whakawa mo nga iwi, nui tonu te kai e homai ana e ia.
- 32
- E hipokina ana e ia ki ona ringa te uira, a whakahaua iho e ia te wahi e pa atu ai.
- 33
- Hei kai whakaatu i a ia tona harurutanga, he riri rongoa rawa mo te kino.
Address: 
Phone: 
Email: